Охирги сонда



Кўп ўқилган мақолалар



Долзарб мавзу



Мақолалар архиви

«    Avgust 2018   
Du Se Cho Pa Ju Sha Ya
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
31.07.2018

ҲЕЧ КИМ ЖИНОЯТЧИ БЎЛИБ ТУҒИЛМАЙДИ

Абдуғаффор ҚИРҒИЗБОЕВ, Олий Мажлис Қонунчилик палатасидаги Ўзбекистон ХДП фракцияси аъзоси, Фан, таълим, маданият ва спорт масалалари қўмитаси раиси:

— Мамлакатимиз Президенти Шавкат Мирзиёев 27 июль куни ўтказган видеоселектор йиғилишида жиноятчиликнинг олдини олиш борасидаги ишларнинг бугунги ҳолати, жиноятчиликнинг айрим турлари кўпайиб бораётгани, жиноятларнинг 30 фоизи ёшлар томонидан содир этилаётгани, ички ишлар тизими, ҳокимликлар, жамоат ташкилотларининг бу борадаги масъулиятини жиддий кучайтириш зарурлиги тўғрисида қатор таклифларни билдирди.

Президент таъкидладики, 2017 йилда мамлакатимизда жиноятлар 2016 йилга нисбатан 16 фоизга, жорий йилнинг 6 ойида эса ўтган йилнинг шу давридагига нисбатан 39 фоизга камайган бўлса-да, жиноятчиликнинг айрим турлари, жумладан, қасддан одам ўлдириш, оғир тан жароҳати етказиш, талончилик, босқинчилик, ўғрилик ва фирибгарлик каби жиноятлар сони ҳамон юқорилигича қолмоқда, бу ҳолат барчани ташвиш ва хавотирга солади.

Ҳеч ким жиноятчи бўлиб туғилмайди, ҳеч бир жиноят ўз-ўзидан содир бўлмайди. Ҳар бир жиноят маълум бир муҳитда юзага келади. Шунинг учун ҳам жиноятчиликнинг оқибатлари билан эмас, балки унинг келиб чиқиш сабаблари билан кўпроқ шуғулланиш талаб этилиши алоҳида таъкидлаб ўтилди. Бу жараёнда асосий эътиборни маҳалла, ички ишлар, таълим муассасалари, жамоат ташкилотлари ва оилалар ўртасидаги ўзаро ҳамкорликни қоғозда эмас, балки амалда тубдан яхшилашимиз лозим. Ўзибўларчилик ва бепарволик оғир оқибатларга олиб келишини ҳаётнинг ўзи кўрсатмоқда. Тушунтириш ва тарғибот ишларини замонавий технологиялар асосида таъсирчан қилиб олиб бориш талаб этилади.

Энг асосийси, шу жиноятларнинг келиб чиқиш сабабларини чуқур ўрганиб, таҳлил этишимиз, жиноят учун жазо муқаррарлигини одамлар онгига етказишимиз лозим. Маълумки, жазосиз қолган ҳар бир жиноят янги жиноят келиб чиқишига хизмат қилади. Президентимизнинг «Жиноят ҳақиқати ва адолат» рукнини ташкил этиш тўғрисидаги таклифи замирида катта маъно ва мақсад бор. «Жиноят ҳақиқати» деганда ҳар бир жиноятнинг туб илдизини билишимиз керак. «Адолат» эса жиноят жазосиз қолмасин, ўзига яраша жазосини олсин дегани.

Биз яна бир масала устида жиддий ўйламоғимиз керак. Жиноятларнинг катта қисми ёшлар томонидан содир этилаётганини ҳисобга олиб, янги тадбирлар дастурини ишлаб чиқишимиз керак. Айниқса, ёшлар ўртасида жиноятчиликнинг олдини олиш, ўқимаётган, ишламаётган, уюшмаган ёшлар билан олиб борилаётган ишларни тубдан такомиллаштириб бориш лозим. Биз, депутатлар ҳам жойларда аҳоли билан ўтказаётган турли тадбирлар давомида чуқур таҳлилга асосланган ҳаётий мисоллардан фойдаланишимиз талаб этилади.

Бугун ички ишлар тизимида эскича ишлаш қолипидан чиқолмаётган айрим ходимлар ҳам учраб турганлиги, одамларнинг дарду ташвишини ҳис қилмаслик, юзага келиши мумкин бўлган оқибатларни олдиндан кўра олмаслик каби иллатлар тизим ишининг боришига салбий таъсир ўтказмоқда. Шунингдек, тезкор ва холис қарор қабул қилиш борасида соҳа ходимларининг малака ва тажрибалари, билимлари ҳар доим ҳам кўзланган натижани бермаётгани таъкидлаб ўтилди.

Қўмитамиз аъзолари давлатимиз раҳбарининг мазкур йиғилишда билдирган фикрларидан келиб чиққан ҳолда, ёшлар ўртасида жи­ноятчиликнинг олдини олиш, ёшларнинг бўш вақтини мазмунли ва самарали ташкил этиш борасида таълим муассасалари, ички ишлар ва жамоат ташкилотлари билан ҳамкорликда амалга оширилиши керак бўлган вазифаларни белгилаб олдик. Бу масала бўйича қонуний асосларни мустаҳкамлаш юзасидан таклифлар тайёрлашга ҳам келишиб олинди.



DB query error.
Please try later.