14.02.2017

АҲОЛИДАН ТУШАЁТГАН ТАКЛИФЛАР

ҳудудларни ривожлантиришга асос бўлади

Олий Мажлис Қонунчилик палатаси­даги Ўзбекистон ХДП фракцияси аъзолари Ёқуб Умаров, ­Саҳобиддин Арзиқулов, Дилмурод Саъдуллаев Иштихон туманида бўлиб, аҳоли ва электорат вакиллари билан бевосита мулоқот ўтказишди. Сайловчиларни ўйлантираётган масалаларни, ижро ҳокимияти фаолиятини атрофлича ўрганишди.

Олий Мажлис Қонунчилик палатаси депутати Ёқуб Умаров Ҳақиқат қишлоғидаги маҳалла, қишлоқ врачлик пункти, мактаб ва мактабгача таълим муассасаларидаги ҳа­қиқий аҳволни ўрганди. Бойлар, Қиёт ва Чиноқ қишлоқлари вакиллари эса аҳолини иш билан таъ­минлаш масаласи бўйича фикр билдиришди. Чиноқ, Тоғайкўл қишлоқларида электр ва табиий газ таъминотидаги узилишлар ҳақида мурожаатлар бўлди.

Қиёт қишлоғи аҳли номидан Бахроил Бобоев табиий газ босими паст экани, айрим ички йўлларнинг носозлигини баён этди.

— Суюлтирилган газ баллонлари етишмайди, — деди Тоғайкўл қишлоғидан Толлибой Омонов. — Мавжуд газ баллонларини аҳолига етказиб бериш ишлари ҳам кўнгилдагидек эмас. Бундан ташқари, баллонларни газ билан тўлдиришда белгиланган нархларга амал қилинмаяпти.

Зарафшон қишлоқ врачлик пункти ходимлари электр энергиясидаги узилиш сабабли иш вақтида тиббий асбоб-ускуналарни ишлатиш имкони йўқлигини маълум қилишди.

Мазкур қишлоқда истиқомат қилувчи меҳнат фахрийси Келдиёр Убайдуллаев сенаторлар ва депутатларнинг аҳоли билан учрашувлар ташкил этаётганини маъқуллаб, бундай эзгу иш ташаббускори Президентимиздан миннатдор эканини билдирди.

— Учрашув ва мулоқотларда халқ дарди тингланади, орзу-умидларига эътибор қаратилади, — деди у. — Қишлоқдаги оилаларни қўллаб-қувватлаш муҳим аҳамиятга эга.

Депутат билан мулоқотларда таълим соҳасидаги айрим муаммолар ҳақида ҳам сўз юритилди. Масалан, мактаблар ва болалар боғчалари бинолари таъмирга муҳтожлиги ва етарли даражада жиҳозланмагани, Чиноқ қишлоғида жойлашган 47-мактабда спорт зали ва турли тадбирлар ўтказиш учун ­фаоллар зали йўқлиги таъкидланди. Қишлоқ аҳли ушбу масалани давлат дастурига киритишни илтимос қилди.

— Мулоқотлар давомида кўплаб таклифлар билдирилди, — деди депутат Ёқуб Умаров. — Ҳақиқат қишлоғи 4 та маҳалладан иборат. Бу ерда 15 минг нафардан ортиқ аҳоли истиқомат қилади. Қишлоқ фуқаролар йиғини ҳудудида 8 та умумтаълим мактаби мавжуд бўлиб, уларни 2016 йилда 450 нафар ўқувчи битирган. Лекин ушбу ҳудудда касб-ҳунар коллежи ёки академик лицей мавжуд эмас. Ўқувчилар узоқ қишлоқлардаги коллежларга қатнаб ўқиш­га мажбур бўлишмоқда. Маҳаллий аҳоли ушбу масаланинг энг мақбул ечими ҳудуднинг маркази Дўрмон қишлоғида машинасозлик ёки қишлоқ хўжалиги маҳсулотларини қайта ишлашга ихтисослашган касб-ҳунар коллежи бунёд этиш эканини таъкидлади. Бу масалани давлат дастурига киритиш бўйича ўз таклифларини айтишди.

Аҳоли билан мулоқотлар муаммоларни ўрганиш, уларга ечим топишда ­катта самара беради. Фуқаролар томонидан билдирилаётган таклифлар ҳудудларни ижтимоий-иқтисодий ривожлантиришда албатта эътиборга олинади.

 

Абдурасул САТТОРОВ,

«Ўзбекистон овози» мухбири.



DB query error.
Please try later.