14.02.2017

ИЖТИМОИЙ СОҲАДАГИ ИСЛОҲОТЛАР ЯНАДА КЕНГАЯДИ

Мамлакатимизда олиб борилаётган ислоҳотлар самарасини янада ошириш, давлат ва жамият ривожини янги босқичга кўтариш, ҳаётнинг барча соҳаларини либераллаштириш, модернизация қилиш, бу борада энг муҳим устувор йўналишларни белгилаш мақсадида ишлаб чиқилган 2017-2021 йилларга мўлжалланган Ҳаракатлар стратегияси тарихий аҳамиятга эга. Бу муҳим ҳужжат давлатни янада барқарор ва жадал суръатлар билан ривожлантириш учун мутлақо янгича стратегик ёндашув ва тамойилларни амалга оширишни кўзда тутган.

Президентимизнинг «Ўзбекистон Республика­сини янада ривожланти­риш бўйича Ҳаракатлар стратегияси тўғрисида»ги фармонига кўра, Ҳаракат­лар стратегиясини беш босқичда ҳаётга татбиқ этиш назарда тутилмоқда. Хусусан, «Ижтимоий соҳани ривожлантириш» деб номланган тўртинчи йўналишда аҳоли бандли­ги­ни таъминлаш, фуқаро­ларни ижтимоий ҳимоя қилиш ва уларнинг сало­мат­лигини сақлаш, йўл-транспорт, муҳандислик-коммуникация ҳамда ижтимоий инфратузилмани ривожлантириш масала­лари бўйича ҳам муҳим чора-тадбирларни амалга ошириш белгиланган.

 

Қаҳрамон МИРЗАЕВ, Олий Мажлис Қонунчилик палатаси депутати, ЎзХДП фракцияси аъзоси:

— Президентимиз 2017 йилни юртимизда «Халқ билан мулоқот ва инсон манфаатлари йили» деб эълон қилганида, аҳоли билан ­доимий мулоқот қилиш, уларни қийнаётган муаммоларни ҳал этишнинг янги механизмлари ва самарали усулларини жорий этиш кераклигини алоҳида уқтириб ўтган эди. Бу барча даражадаги раҳбарлар, депутатлар олдига янги талабларни қўйди. Ишни тубдан кучайтириш, инсон манфаати ҳамма нарсадан устун эканлигини фаолиятимизнинг бош мезонига айлантириш бўйича муҳим вазифаларни белгилаб берди. 2017-2021 йилларга мўлжалланган ­Ҳа­ракатлар стратегияси бу борадаги устувор йўналишларни аниқ ва равшан ифода этди.

«Ўзбекистон Республикасини янада ривожлантириш бўйича Ҳаракатлар страте­гия­си тўғрисида»ги Президент фармони ҳамюртларимиз, тадбиркорлар, умуман, кенг ­жамоатчилик томонидан кўтаринки руҳ, миннатдорлик билан кутиб олинди. Жойларга чиқиб, аҳоли вакиллари билан ўтказган учрашувларимизда ҳам бунга яққол амин бўлдик. Одамлар Ҳаракатлар стратегиясини тараққиётимиз кафолатлари белгиланган ҳужжат сифатида юксак баҳоламоқда.

Ҳудудларни ҳар томонлама ривожлантириш бўйича қарийб 25 мингта инвестиция лойиҳасини рўёбга чиқариш ҳисобига 256,4 минг иш ўрни ташкил этиш, шу орқали аҳолини иш билан таъминлаш дастурларини тўлиқ ижро этишга алоҳида эътибор қаратилган. Мазкур чора-тадбирлар замирида ҳар томонлама чуқур ўйланган сиёсат, катта эзгу мақсад ётибди, десак тўғри бўлади.

Дарҳақиқат, ҳар қандай давлат бандлик масаласида барқарорликка эришиш учун пухта ишлаб чиқилган иқтисодий ислоҳотларни амалга ошириши талаб этилади. Эътибор берган бўлсангиз, ишсизлик даражаси энг юқори бўлган минтақаларда 46,8 минг янги иш ўрни ташкил этиш, тадбиркорлик ­фаолиятини бошлаш учун таълим муассасаларининг 10 минг нафар битирувчисига кредитлар ажратиш режалаштирилмоқда. Ҳудудларда таълим муассасалари битирувчиларини қўллаб-қувватлашга эътибор кучайиши, уларга тадбиркорлик фаолиятини ривожлантириш учун кредитлар ажратилиши ёшларнинг ўзига ишончини оширишга хизмат қилади, албатта.

Бу, айниқса, коллежни тамомлаб, иш топишда қийналаётган ёшларнинг кай­фия­тига ижобий таъсир кўр­сатади. Яна бир аҳамиятли томони, тадбиркорлик ривожланиши орқали ҳудудларда ишлаб чиқариш тараққий этади, зарур инфратузилма шаклланади. Одамларнинг турмуш тарзи яхшиланади, энг муҳими, халқимиз ҳаётдан рози бўлиб яшайди.

 

 

Зулайҳо АКРАМОВА, Олий Мажлис Қонунчилик палатаси депутати, ЎзХДП фракцияси аъзоси:

— Инсон манфаатини олий қадрият, деб биладиган давлат ва жамият ўз фуқароларининг фаровон турмуши, саломатлигини муҳофазалашга алоҳида эътибор қаратади. Ўзбекистон Республикасини янада ривожлантириш бўйича қабул қилинган Ҳаракатлар стратегияси бу борада муҳим ҳаётий аҳамиятга эгадир.

Эътибор беринг, катта ёшли авлодни қўллаб-қувватлаш, ижтимоий нафақалар бериш тартибини такомиллаштириш, соғлиқни сақлаш соҳасини ислоҳ қилиш чора-тадбирлари кўзда тутилган. Жумладан, 78 та туман тиббиёт бирлашмасини, 7 та шаҳар ва 2 та вилоят кўп тармоқли тиббиёт марказини қайта қуриш, тез тиббий ёрдам хизматини 1200 та махсус автотранспорт билан таъминлаш режалаштирилмоқда.

Демак, аҳоли саломатлигини муҳофаза қилиш, оилаларда соғ­лом турмуш тарзини қарор топтиришга йўналтирилган саъй-ҳаракатлар кўлами янада ортади. Ҳудудлардаги тиббиёт муассасаларининг жаҳон андозаларига мувофиқ, қайта қурилиши ор­қали қатор ҳаётий зарур масалаларга ечим топилади. Бир пайтлар қишда совуқ, ёзда иссиқ, бунинг устига ҳеч қандай шароитга эга бўлмаган даволаш муассасалари замонавий қиёфа, қулай муҳитга эга бўлади. Бу халқимиз турмуш фаровонлигини янада юксалтиришда айни муддаодир.

Ҳудудларда бўлганимизда тиббиёт муассасалари фао­лия­ти билан яқиндан танишдик. Бу борадаги мурожаатларни ўргандик. Хулоса ўрнида шуни айтишим керакки, халқ­имиз тиббиёт соҳасида катта ўзгаришларни кутяпти. Албатта, Ҳаракатлар стратегиясида бу масала алоҳида эътиборга олинган. Унга асосан кўплаб ҳудудларда тез тиббий ёрдам хизмати учун махсус автотранспорт воситалари ажратилади. Бу беморларга тез ва сифатли тиббий ёрдам кўрсатиш учун қулай имконият яратади.

Бизнинг олдимизда ҳам масъулиятли вазифалар турибди. Халқ депутатлари маҳаллий Кенгашларидаги пар­тия­миз гуруҳлари аъзолари билан ҳамкорликда ушбу муҳим ҳужжатнинг мазмун-моҳиятини аҳолига кенг тушунтириш бўйича тарғибот ишларини изчил йўлга қўйишимиз, унинг ижросида ҳар биримиз фаол қатнашишимиз талаб этилади.

 

«Ўзбекистон овози» мухбири

Лазиза ШЕРОВА ёзиб олди.



DB query error.
Please try later.