Хабарингиз бор, икки кун давомида, аввал сиёсий партиялар фракцияларида, кейин эса парламент қуйи палатасининг ялпи мажлисида Давлат бюджетининг ва давлат мақсадли жамғармалари бюджетларининг 2020 йил 9 ойи якунлари ижроси тўғрисидаги ҳукумат ҳисоботи муҳокама қилинди. Ютуқли жиҳатлар эътироф этилди, бу ҳақда узоқ гапириш мумкин.

Аммо, муҳокамалар пайтида аксарият аниқ саволларга умумий, тўлиқ бўлмаган ҳолда жавоб берилди.

Хусусан, фракциямиздаги муҳокамада депутатлар ҳукумат вакиллари, вазирлик ва идоралар мутасаддиларига бандлик, соғлиқни сақлаш, миграция, таълим, спорт, молия-иқтисодиёт каби 10 дан ортиқ масалаларда манзилли саволлар беришди. Афсуски, аксарият саволларга тайинли жавоб ололмадик. Ижтимоий тармоқларда бошқа фракцияларнинг аъзолари ҳам саволларга жавобдан қониқмаганликларини билдиришди.

Бюджет ижроси ҳақидаги муҳокамаларда шу нарса яққол сезилдики, вазирликлар ўртасида хабардорлик муҳити етишмайди, айрим маълумотларда номувофиқликлар келиб чиқди. Яъни, айни бир масала бўйича бир вазирлик берган маълумот бошқасининг кўрсаткичига тўғри келмайди. Бу камчиликлар ҳукуматдан Бюджет ижроси бўйича вазирликларнинг масъулиятини ошириш зарурлигини кўрсатади.

Мазкур ҳолат Қонунчилик палатасининг ялпи мажлисида ҳам давом этди. Қарийб икки соатдан ортиқ вақт давомида муҳокамада бўлган масала юзасидан депутатлар томонидан берилган аниқ ва лўнда саволларга жавоблар саёз ва умумий тарзда бўлди. Ҳолбуки, ҳар бир савол ортида минглаб юртдошларимизни ўйлантираётган муаммолар турибди.

Демак, бюджет ижросига нисбатан танқидий ёндашувни кучайтириш, масъул вазирлик-идоралар раҳбарлари зиммасига шахсий жавобгарликни юклаш керак. Юзага келган салбий ҳолатларни чуқур таҳлилдан ўтказиш, очиқ ва таъсирчан чоралар кўриш ва депутатлар саволларига аниқ жавоблар керак.

Фирдавс ШАРИПОВ,

Олий Мажлис Қонунчилик палатаси депутати,

ЎзХДП фракцияси аъзоси.