Охирги сонда



Кўп ўқилган мақолалар



Долзарб мавзу



Мақолалар архиви

«    Yanvar 2020   
Du Se Cho Pa Ju Sha Ya
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
14.01.2020

ЖАМОАТЧИЛИК ҚАБУЛХОНАЛАРИ

халқ манфаатларига хизмат қилмоқда

ЎзХДПнинг Бухоро шаҳар кенгаши жамоатчилик қабулхонасига келган Зулхумор Саидованинг миннатдорлик мактуби диққатимизни тортди:

“Ўғлим Озодбек Ҳамроевни жарроҳлик йўли билан даволашга зарурат туғилса-да, моддий шароитимиз оғирлиги сабабли бу ишни орқага суриб келардик. Ҳудудимиздан сайланган депутат Робия Казимова томонидан ўтган йилнинг август ойида ўтказилган сайёр қабулда оиламизни қийнаб келаётган муаммо юзасидан ёрдам сўрадим. Опа орадан кўп ўтмай, вилоят болалар касалхонасига боришимизни айтди. 2019 йилнинг 2 октябрь куни ўғлимнинг жарроҳлик операцияси муваффақиятли ўтди. Ҳар дақиқада қўнғироқ қилиб, унинг аҳволидан хабардор бўлиб тургани, инсонпарварлик ёрдам кўрсатгани учун ундан бир умр миннатдорман. Депутат опамизга раҳмат!”.

— Ҳаётнинг ўз машаққатлари бор экан, — дейди Бухоро шаҳри Жомий кўчаси 40 хонадонда яшовчи онахон ­Муяссар ­Аслонова. — Неварам ­Муҳаммаджоннинг бурнини зудлик билан операция қилдириш зарур бўлиб қолди. Шифокорлар Тошкентга йўлланма беришди. Моддий жиҳатдан қийналиб турганимиз учун пойтахтга боролмадик. Шундай муаммолар гирдобида қолганимизда депутатларнинг сайёр қабули бўлиб ўтди. Мурожаат этганлар қаторида ЎзХДП Бухоро шаҳар кенгаши раиси Робия опа Казимовадан мен ҳам ёрдам сўрадим. У кишининг тавсияси билан вилоят болалар касалхонасида неварамни операция қилишди. Болажонимизнинг кундан-кунга соғаяётгани барчамизни бениҳоя хурсанд қилаётир.

— Бухоро туманида истиқомат қиламан, — дейди кекса онахон Болтаева Ҳикматой. — Мана, партия тавсияси билан асаб касалликлари клиникасида даволандим. Умрларидан барака топишсин, менга ўхшаган кўплаб қариялар келиб, невропатолог шифокорига кўриниб, бепул даволанмоқда. Партия ана шунақа амалий ишларни қилаётгани яхши-да, ташкилотчилар биздек кексаларнинг дуоларини олаяпти.

Дарҳақиқат, бу каби мисолларни кўплаб келтириш мумкин. Муҳими, мурожаатларни ечиш орқали кенг жамоатчилик билан алоқа ўрнатилиб, аҳоли орасига кириб борилаяпти, уларнинг ишончи ортиб бораётир.

Хўш, ЎзХДП ташкилотларида ўтган йилда мазкур йўналишда қандай ишлар олиб борилди? Аҳоли мурожаатлари билан ишлашда жорий йилда яна нималарга эътибор қаратиш лозим?

— Янги йилни кутиб олар эканмиз, ўтаётган йилда амалга оширган ишларимизни сарҳисоб қилиб, янги режалар ҳақида ўйлаймиз, албатта, — дейди Ўзбекистон ХДП Бухоро вилоят кенгаши раиси Зулфия ­Туйева. — ЎзХДП вилоят кенгашининг барча даражадаги ташкилотлари йил давомида электоратимиз манфаатини ҳимоя қилиш борасида қатор амалий ишларни олиб борди. Хусусан, партиямиз маҳаллий кенгашларида ташкил этилган Жамоатчилик қабулхоналарининг электоратни ўйлантираётган масалаларни бартараф этиш борасидаги таъсирини ошириш бўйича катта тажриба тўпладик. Ўтган йили 648 нафар фуқаро қабулхоналаримизга турли масалаларда мурожаат қилди. Уларнинг 441 таси ижобий ҳал этилди, қолганларига ҳуқуқий маслаҳатлар берилди.

Айтиш жоизки, ҳар бир мурожаат партия фаоллари ва депутатлар томонидан пухта ўрганилиб, уларнинг аксарияти тегишли идора ва ташкилотлар ёрдамида ҳал этилди.

Мазкур мурожаатларда кўтарилган масалалар депутатлар кўмагида тегишли идора ва ташкилотлар орқали ҳал этилаётгани Жамоатчилик қабулхоналарига ишончни янада мустаҳкамламоқда.

Муҳими, электоратни ўйлантираётган масалаларни ҳал этиш йўлларини барча манфаатдор ташкилотлар билан биргаликда муҳокама қилиш, аввал партия гуруҳларида, вилоят, туман, шаҳар Кенгашларидаги доимий комиссияларда, зарур бўлса, сессияларда кўриб чиқиш орқали фуқаролар мурожаатлари билан ишлашни янги босқичга кўтариш мумкин.

 

Ўзбекистон ХДП

Бухоро вилоят кенгаши

Ахборот хизмати.


Фикр ва мулохазалар

Защита от автоматических сообщений

Сўнгги янгиликлар: