18.12.2018

ЯНГИ ВА ЁШ АЪЗОЛАР КУЧИМИЗГА КУЧ ҚЎША ОЛАДИ

Партияга янги аъзоларни жалб қилиш долзарб масалалардан биридир. Бу жараёнда қандай технологиялардан фойдаланиш лозим?

Назаримда, партия сафига қўшилишга интилиш, аввало, унинг фаолияти, илгари сураётган ташаббус ва ғоялари аҳолининг мушкулини қанчалик осон қилишга қаратилганини билишдан бошланади. Яъни партия фаолиятидан хабардорлик даражаси бу борада ҳал қи­лувчи аҳа­миятга эга. ХДПнинг ижтимоий ҳимояга йўналтирилган сиё­сати кўпчилик учун қизиқ ва муҳим бўлсада, ­жой­ларда олиб борилаётган тарғибот тадбирлари одам­­ларни қониқтирмайди.

Ўйлашимча, партия сафига кўпроқ ёшларни жалб этиш керак. Чунки улар янгича фикрлаши билан ажралиб туради. Демак, янгиликсевар, ўз ёндашуви, қарашлари ва муносабати шаклланган йигит-қизлар тарафдорларимиз сафини кенгайтириб, улар билан ишлаш механизмини ҳам ўзгартиради.

Тўғри, бугунги кунда партиянинг айнан ёшлар фаоллигини оширишга қаратилган бир неча ло­йиҳалари мавжуд. Бунда «Ёш сиёсатчи» кўрик-танлови алоҳида аҳамиятга эга. Сафимизга янги аъзоларни қабул қилишда танлов иштирокчиларининг имкониятларидан фойдаланиш яхши самара беришига ишонаман. Чунки тенгдош тенгдошнинг фикрига қўшилади. Тенгдош тенгдош учун тушунарли тилда тарғиб қила олади.

Шунингдек, Олий Мажлис Қонунчилик палатасидаги фракциямиз фаолияти билан яқиндан танишиш ҳам аъзоларимиз сафини кенгайтиришга ёр­дам беради, деб ўйлайман. Боиси бугун депутатлар сайловчилар олдига кўпроқ боряпти. Уларни қийнаётган муаммолар ўрганиляпти, имкон қадар ҳал этиляпти. Янгидан-янги қонунчилик ташаббуслари ҳам айнан юзма-юз учрашувлар натижасида юзага келмоқда. Демак, фракция ташаббуси билан қабул қилинган қонунларни тарғиб этиш, аҳолига улар айнан бизнинг депутатлик гуруҳимиз орқали кўтариб чиқилган масала ёки муаммонинг ечими эканини тушунтириш ҳам тарафдорларимизни кўпайтиради.

Одам ўз табиатига кўра, айтилган гапдан қилинган ишни устун қўяди. Партия фракцияси томонидан илгари сурилган ва ўз вақтида қонуний асослари топилган масалалар кишиларда сиёсий тузилмамизга нисбатан ишончни кучайтиради. Масалаларнинг айнан халқ билан мулоқот давомида ҳал этилиши бунга янада туртки беради.

Партиямиз томонидан олиб борилаётган тадбирлар ва ижтимоий ло­йиҳаларни ижтимоий тармоқларда кенг тарғиб қилиш ҳам мақсадга мувофиқ. «Фалон ерда фалон тадбир бўлиб ўтди» тарзидаги жонсиз хабарлар эмас, аниқ қаҳрамонлар тақдири мисолида ёритилган лавҳалар кўпроқ эътибор тортади. Муайян ташаббус кимнинг тақдирини ўзгартирди? Кимга амалий ёрдам берди? Натижаси қандай? Ахборотда шу каби саволларга жавоб бўлиши зарур. Партиямиз фаолиятини ёритиш жараёнида тез унутиладиган хабарлардан қочган афзал.

Албатта, ҳар бир сиёсий партия ривожланишни ва ўз тарафдор­ла­рининг кўпайишини истайди. Жамият тараққиётига ҳисса қўшиш истагида бўлганлар учун сиёсий партияга аъзолик энг маъқул йўлдир. Чунки партия аъзоси сифатида у сайловларда тақдим этилган тайёр дастурларга овоз беришдан кўра, муҳим сиёсий қарорларни қабул қилишда шахсан иштирок этиш имконини қўлга киритади.

Бугунги кунда халқаро амалиётда кенг қўлланилаётган тарғибот усулларидан бири жамоа бўлиб ишлаш усулидир. Бунинг учун нима қилиш керак? Менимча, партиянинг дас­турий мақсад ва вазифаларидан яхши хабардор кишилардан ишчи гуруҳ тузишимиз лозим. Улар жойларга бориб, партия ғояларини тарғиб қилади. Сайловчилар томонидан қандай мавзуда савол берилмасин, пухта ҳозирлик кўрган мутахассислар батафсил жавоб бериши талаб этилади. Айнан уларнинг фаолияти ёшларнинг партиямиз ҳақидаги тасаввури кенгайишида муҳим ўрин тутади.

Биз доим партиямиз сафига янги аъзоларни жалб қилиш, бу борада янги усулларни жорий этиш ҳақида ўйлашимиз керак. Акс ҳолда, бир жойда қотиб қоламиз.

 

Эгамберди ЭРНАЗАРОВ,

Ўзбекистон ХДП Ўрта Чирчиқ туман кенгаши раиси.



DB query error.
Please try later.