Охирги сонда



Кўп ўқилган мақолалар



Долзарб мавзу



Мақолалар архиви

«    Avgust 2018   
Du Se Cho Pa Ju Sha Ya
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
16.01.2018

МАРД ЎҒЛОНЛАР ЁДИ

Ўзбекистон ХДП Марказий Кенгаши Мудофаа вазирлиги билан ҳамкорликда хизмат бурчини адо этиш чоғида ҳалок бўлган ҳарбий хизматчиларнинг хонадонларига бориб, уларнинг оила аъзоларидан кўнгил сўрашди.

Мирзо Улуғбек туманидаги «Юзработ» маҳалласи. Бу ерда майор Мухторжон Бозоровнинг рафиқаси Гулбаҳор опа икки нафар ўғли билан яшайди.

— Турмуш ўртоғим ҳалок бўлганида, кичик ўғлим Фирдавс уч ёшда эди, — дейди у. — Шунга қарамай, отасини яхши эслайди. Орзуси ҳарбий учувчи бўлиш. Тўнғич фарзандим эса Тошкент ахборот технологиялари университетининг махсус факультетида таҳсил оляпти.

У ҳам отасига ўхшаб садоқат билан хизмат қилишига ишонаман. Кўплаб танишларим ўғлингизнинг шу соҳадан кетишига йўл қўйиб бердингизми, деб сўрашади. Шунда мен «бу аввало тақдир, шарафли, матонатли инсоннинг тақдири», деб жавоб бераман.

«Султония» маҳалласида истиқомат қилаётган Улуғбек ва Ширин Жўраевлар хонадонида ҳам бўлдик.

 Меҳмонхона деразалари олдидаги фортепиано устида марҳум офицер Баҳром Жўраевнинг портрети турарди. Ширин опанинг сўзларига кўра, бу фортепианони унинг ўғли чалган экан.

— Фарзандларимизни садоқатли этиб тарбиялашга ҳаракат қилдик, — дейди Улуғбек ака. — Ўғлим катта бўлиб, Тошкент олий умумқўшин қўмондонлик билим юртига ўқишга кирди. У ерни битиргач, беш йил давомида ҳаво-десант қисмида жанговар гуруҳ командири бўлиб ишлади. Кейин эса Шар­қий ҳарбий округ штаби бўлим бошлиғи бўлди. Ўғли камолга етганини кўрган ҳар қандай ота-она уни уйлаш, бошини иккита қилиш ҳақида ўйлай бошлайди. Биз ҳам совчиликка боришга тайёргарлик кўраётганимизда мудҳиш ҳодиса рўй берди. Ўғлим ўз хизмат вазифасини бажариш вақтида мардларча ҳалок бўлди.

Улуғбек ака узоқ хаёлга чўмди, ўғлининг жасорати учун берилган орден ва ёрлиқларни кўрсатди.

— Боламни охирги марта кўрганим ҳамон ёдимда, — дейди ­Ширин опа маҳзун оҳангда. — Мана шу хонада ўтириб, дуо қилинг, ойи, мен кетишим керак, деди. Отаси уйда йўқ. Нима қилишимни билмасдим. Болам эса тинмай шоширарди. Остонада уни узоқ бағримга босиб турдим. Ҳеч қўйиб юборгим келмади. Уч кун ўтиб телефон қилди. Биз яхшимиз, тез орада қайтамиз, деди. Афсуски, унга янги кунни кўриш ҳам насиб қилмади...

Ўн уч йил бу оз фурсат эмас. Аммо уни таниган ва билган ҳарбий хизматчилар уйимизга келиб, ҳол-аҳвол сўрашади. Улар билан хотирлашамиз. Соғинч ва изтиробларим бироз аригандек бўлади. «Шундай ўғилни вояга етказганингиз учун раҳмат», дейишганда ғурурланамиз...

Жанговор хизмат чоғида ҳалок бўлган капитан Зуҳриддин Сотиқуловнинг хонадонида ҳам маҳзун хотиралар кезиб юради.

— Икки нафар қизим бор, — деди марҳум капитаннинг рафиқаси Раъно Сотиқулова. — Спортнинг сузиш турига қизиқишади. Барча фанлардан аъло баҳога ўқишади. Уларга доимо керакли инсон бўлиш ҳақида ўргатиб, насиҳат қилиб бораман. Катта қизим Муборакнинг шифокорликка меҳри бўлак. Келажакда ҳарбий врач бўлиб, отасининг изидан бормоқчи...

Учрашув мобайнида Олий Мажлис Қонунчилик палатасидаги ЎзХДП фракцияси аъзолари Комила Каромова, Нўъмон Акбаров, Турсунпўлат Норбоев, ЎзХДП Марказий Кенгаши бўлим бошлиғи Нилуфар Йўлдошева ҳарбий хизматчилар оила аъзоларининг турмуш тарзи билан яқиндан танишишди, эсдалик совғаларини топширишди.

 

Маҳлиё АЛИҚУЛОВА



DB query error.
Please try later.