16.12.2017

«ҚЎЛИНГНИ УЗАТИБ, ҚУЁШНИ ТУТ!»,

деб номланган халқаро танловда биринчи ўринни эгалладим

Ўзбекистон ХДП Марказий Кенгаши истеъдодли ёшлар таълим олаётган масканлардан бири Тошкент шаҳар ихтисослаштирилган кўзи ожизлар мактаб-интернатида «Сиз билан доимо биргамиз!» шиори остида хайрия акцияси ўтказди. Тарбияланувчиларнинг ҳаёт тарзи ва қизиқишлари билан яқиндан танишди.

 

— Муассасамизда 17 нафар мактабгача таълим ёшидаги, 311 нафар мактаб ёшидаги бола тарбияланяпти,дейди маънавият-маърифат ишлари бўйича директор ўринбосари Замира Ғафурова. — Ҳар бир боланинг ўз дунёси, орзу-ҳаваслари бор. Ўқувчиларимиз дарсдан ташқари спорт машғулотларига боришади. Уларнинг кўпчилиги санъатга меҳр қўйган.

Ногиронлиги бўлган болаларга биринчи галда мустақил ҳаракатланиб, ўз-ўзига хизмат қилишни ўргатамиз. Бу баъзида ота-оналарда норозилик уйғотади. Биз барча уринишларимиз уларнинг фарзандлари келажаги учун эканини тушунтирамиз.

Ўқувчиларнинг мактабдаги ҳаёти мазмунли, қизиқарли ўтиши учун турли хил тадбирлар ташкил этганмиз. Ҳафтанинг ҳар жума кунида «Келинг, бирга китоб ўқиймиз», деб номланган давра суҳбати ўтказилади. Бунда бизга «Китоб олами» маънавий-маърифий савдо мажмуаси ходимлари яқиндан ёрдам беряпти. Шунингдек, оила қуриб, бахтли ҳаёт кечираётган собиқ ўқувчиларимиз билан ўтказиладиган учрашувлар тарбияланувчиларни олға интилишга, қийинчиликларни енгишга ўргатади.

— Оилада тўрт нафар фарзандмиз, — дейди мактаб-интернатнинг 10-синф ўқувчиси Азим Одилжонов. — Мен учинчисиман. Мусиқага қизиқиш болалигимдан бошланган. Амаким қўлини бармоқларим устига қўйиб, фортепиано чалишни ўргатган. Тўртинчи синфдан бошлаб устозлардан ғижжак сирларини ўргана бошладим. Республика ҳамда халқаро миқёсда ўтказилган танлов ва фестивалларда қатнашдим. Ота-онам жуда хурсанд. Ҳамиша уларнинг мендан фахрланишини ҳис этиб тураман. Бу менга куч бағишлайди.

— Жисмоний камчилигим ютуқларга эришишимда тўсиқ бўлмаслиги керак, деб ўйлайман, — дейди мактаб-интернатнинг 10-синф ўқувчиси Мухторов Мирсаид. — Онамнинг айтишича, уч-тўрт ёшлигимданоқ қўлимга тушган нарса борки, доира ўрнида чалар, қўшиқ хиргойи қилар эканман. Вақт ўтган сари мусиқага қизиқишим ортиб борди. Астойдил шуғуллана бошладим. Италияда ўтказилган «Қўлингни узатиб, қуёшни тут», деб номланган халқаро танловда «Дарвеш ва Рондо» куйини ижро этиб, биринчи ўринни олдим. Менга танловнинг номланиши жуда ёққан, уни тез-тез ёдга олиб тураман. Келажакда бастакор бўлишни ният қилганман.

Тадбир доирасида «Келинг, бирга китоб ўқиймиз» акцияси ўтказилиб, тарбияланувчиларга турли китоблар, бадиий асарлар совға қилинди.

 

Маҳлиё АЛИҚУЛОВА



DB query error.
Please try later.