29.06.2017

ДЕМОКРАТИК ИСЛОҲОТЛАР ВА ЖУРНАЛИСТ МАСЪУЛИЯТИ

Миллий матбуот марказида Ўзбекистон ХДП Марказий Кенгаши томонидан «Оммавий ахборот воситалари — халқ билан мулоқотнинг муҳим воситаси» мавзусида давра суҳбати ўтказилди.

Унда Ўзбекистон ХДП Марказий Кенгаши ходимлари, Олий Мажлиси Қонунчилик палатасидаги партия фракцияси аъзолари, халқ депутатлари Тошкент шаҳар Кенгаши депутатлари ҳамда оммавий ахборот воситалари вакиллари иштирок этди.

Тадбирда Ўзбекистон ХДП Марказий Кенгаши раиси, Олий Мажлис Қонунчилик палатасидаги партия фракцияси раҳбари Хатамжон Кетмонов журналистларни Матбуот ва оммавий ахборот воситалари ходимлари куни муносабати билан самимий муборакбод этди. Партиянинг ғоя ва мақсадлари, амалга оширган ишларини кенг жамоатчиликка етказишда оммавий ахборот воситалари муҳим ўрин эгаллашини таъкидлади. Партия фаолиятини холис ва таҳлилий ёритиш, унинг барча бўғинларидаги сўнгги янгиликлардан аҳолини хабардор этишда журналистлар фаол иштирок этаётгани алоҳида эътироф этилди.

Олий Мажлис Қонунчилик палатаси депутати, ЎзХДП фракцияси аъзоси Комила Каромова оммавий ахборот воситалари фаолиятининг қонуний асосларини мустаҳкамлаш ҳақида тўхталиб ўтди. Қайд этилдики, бугунги кунда мамлакатимизда 1500 дан зиёд оммавий ахборот воситаси фаолият юритмоқда. Конституциямизда матбуот ва сўз эркинлигини таъминловчи қоидаларнинг мустаҳкамлаб қўйилгани уларнинг эркин фаолият юритишида муҳим аҳамият касб этмоқда. Тегишли қонунлар ва меъёрий ҳужжатлар соҳани изчил ривожлантиришда катта асос бўлиб хизмат қиляпти. Айни пайтда Ҳаракатлар стратегияси асосида соҳага оид қонунчиликни янада такомиллаштириш чоралари кўрилмоқда.

«Ўзбекистон овози» ва «Голос Узбекис­тана» газеталари Бош муҳаррири Сафар Остонов ҳаёт ўзгариб, ривожланиб бораётган бугунги шароитда журналист масъулияти ҳақида сўз юритди. Ҳозирги замон соҳа ходимларидан янада чуқур билим ва маҳоратга эга бўлишни, аҳолини ўйлантираётган муаммоларни таҳлил эта билишни тақозо этмоқда. Шунинг учун журналист ҳар қачонгидан ҳам фаол ва изланувчан, фидойи бўлиши кераклиги таъкидланди.

Давра суҳбатида партиянинг барча жаб­ҳалардаги фаолиятини жамоатчилик орасида янада кенг тарғиб қилиш, бу борада ОАВ билан ҳамкорликни мустаҳкамлаш масалалари юзасидан фикр алмашилди.

Тадбир якунида партия фаолиятини ёритишда фаол қатнашаётган оммавий ахборот воситалари вакилларига эсдалик совғалари топширилди.

 

Ўз мухбиримиз.



DB query error.
Please try later.