13.05.2017

ЭЛЕКТОРАТ ВАКИЛЛАРИ БИЛАН МУЛОҚОТ

Одамлар билан мулоқот қилиш, уларнинг муаммоларини тинг­лаб, оғирини енгил қилиш барча даражадаги раҳбарлар ва депутатлар фаолиятининг устувор йўналишларидан бирига айланди. Ушбу жараёнда Ўзбекистон Халқ демократик партияси ҳам қатор ташаббусларни илгари суряпти. Партия Марказий Кенгаши томонидан турли лойиҳалар, акциялар ўтказилмоқда.

«Ҳар бир инсонга меҳр-мурувват кўрсатиш бурчимиз!» лойиҳаси доирасида имконияти чекланган кишилар, ижтимоий ҳимояга эҳтиёжманд хотин-қизлар ҳолидан хабар олиниб, уларни ўйлантираётган муаммоларни ҳал этишга кўмаклашилмоқда. Жиззах вилоятининг Зомин туманида ўтказилган тадбирда ҳам электорат вакилларининг хонадонларига борилди. Партия Марказий Кенгаши масъул ходимлари, Ўзбекистон Ёзувчилар уюшмаси аъзолари, Миллий академик драма театри актёрлари, Ўзбекис­тон Ногиронлар жамияти Жиззах вилоят ҳудудий бўлими, Ўзбекистон Қизил Ярим Ой жамияти Жиззах вилоят ташкилоти, «Маҳалла» хайрия жамоат фонди, депутатлар ва яна қатор ҳамкор ташкилотлар ходимлари, партия фаол­лари электорат вакиллари билан суҳбатлар давомида ижтимоий ҳимоя билан боғлиқ масалаларни ўрганишга эътибор қаратди. Меъёрий-ҳуқуқий ҳужжатларда белгиланган имтиёзлар тўғрисида атрофлича тушунчалар берилди.

Кўплаб хонадонларда бўляпмиз, опа-сингилларимиз билан суҳбатлашяпмиз, уларнинг кундалик ҳаёт тарзига гувоҳ бўляпмиз, — дейди ЎзХДП Марказий Кенгаши сектор мудири Гулшан Асатова. — Учрашувлар давомида шунга амин бўлдикки, хотин-қизларнинг ижтимоий фаоллиги ошмоқда. Улар юртимизда рўй бераётган ўзгаришлар, олиб борилаётган ислоҳотлар иштирокчисига айланиш истаги билан яшамоқда. Аксарият хотин-қизларимиз бекор ўтиришни ёқтирмайди. Қайси хонадонга бормайлик, уларнинг бирор-бир юмуш билан бандлигини кўряпмиз. Асосийси, оиласига, жамиятга наф келтириш иштиёқи билан ёнмоқда.

Ана шундай инсонларга яқин кўмакчи бўлишимиз, уларнинг ҳуқуқ ва манфаатларини ҳимоя қилишимиз лозим. Иш бошлаш ниятида бўлган хотин-қизларни қўллаб-қувватлаб, йўл-йўриқ кўрсатишимиз керак. Хусусан, уйда ўтирган аёлларни касаначилик, оилавий бизнесга жалб қилиш, пенсия, нафақа пулларини ўз вақтида берилишини таъминлаш масалаларида депутатлик ва жамоатчилик назорати кучайтирилмоқда.

— Каттабоғ маҳалласида яшовчи Марҳамат ва Назокат Самиевалар хонадонида томорқадан унумли фойдаланиш, чорва боқиш, боғдорчилик масалаларида суҳбат бўлди, — дейди ЎзХДП Жиззах вилоят кенгаши сектор мудири Жамила Ёдгорова. — Мурожаатлар депутатлар томонидан ёзиб олинди. Навбаҳор маҳалласида истиқомат қилаётган 2-гуруҳ ногирони Мавлуда Раҳмонова имтиёзли даволаниш бўйича ёрдам сўради. Мазкур мурожаат ҳам депутатлик сўрови юбориш орқали ҳал этиладиган бўлди.

Шу куни ташкилотчилар Куччи қишлоғида яшовчи 92 ёшли Ўрозали Йўлдошовни йўқлашди. Отахонга ногиронлик аравачаси топширилди.

— Юртимизга кўз тегмасин. Тинчлигимиз, фаровонлигимиз абадий бўлсин, — дейди Ўрозали ота. — Ҳамиша эъзозу эътибордамиз. Маҳалладошлар, турли ташкилотлар вакиллари ҳолимдан хабар олиб туришади. Мана шу ташаббусни йўлга қўйганлардан миннатдорман.

Ҳар бир хонадон эгаларига ҳомийлар томонидан озиқ-овқат маҳсулотлари, рўзғор буюмлари тар­қатилди. Оилавий тадбиркорлик, касаначилик меҳнати билан шуғулланиш нияти бор фуқароларга амалий кўмак бериладиган бўлди.

Шуни алоҳида таъкидлаш жоизки, лойиҳа доирасидаги тадбирларда ногирон хотин-қизлар бандлигини таъминлаш масаласи диққат марказида турибди. Маҳаллий Кенгаш депутатлари томонидан тегишли корхона ва ташкилотларга депутатлик сўровлари юбориляпти. Ижтимоий масалалар партиямиз гуруҳларида атрофлича ўрганилмоқда, таклифлар тайёрланмоқда. Муаммоларни сессия­лар муҳокамасига олиб чиқиш режалаштирилган.

Куннинг иккинчи ярмида ташкилотчилар тумандаги Мурувват ногирон аёллар уйига боришди ва у ердаги опа-сингиллар билан суҳбатлашишди. Улар учун яратилган шароитлар билан яқиндан танишишди.

— Бу ерда 322 нафар ногирон аёл яшайди, — дейди Мурувват ногирон аёллар интернат уйи раҳбари Нишонбой Фозилов. — Уларга 6 нафар малакали шифокор, 80 нафар тарбиячи, 25 нафар ҳамшира хизмат кўрсатади. Давлатимиз томонидан аёлларнинг яшаши, озиқ-овқатлар билан таъминланиши учун барча шароит яратилган. Ҳомийлар томонидан турли концерт дастурлари, маданий-маърифий тадбирлар ўтказиб турилади.

Шу куни мурувват уйида санъаткорлар иштирокида концерт дастури намойиш этилди.

 

Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.