10.05.2017

ТИНЧЛИК УЧУН КУРАШГАНЛАР

ҳеч қачон унутилмайди

ЎзХДП аъзолари, бир гуруҳ кўнгилли ёшлар Иккинчи жаҳон уруши қатнашчиларини байрам билан табриклаш мақсадида хонадонларга боришини эшитиб, биз ҳам уларга ҳамроҳ бўлдик.

Йўлда ЎзХДП Тошкент шаҳар кенгаши раиси Ҳайдар Бобохонов билан суҳбатлашиб кетдик.

— Чилонзор туманида умргузаронлик қилаётган 20 нафар уруш қатнашчиси ҳамда меҳнат фахрийларининг хонадонида бўламиз, — дейди у. — Биз уларни тез-тез йўқлаб туришга ҳаракат қиламиз. Кўнгилли, ташаббускор ўқувчи-ёшлар, партия фаоллари нуронийларнинг уруш хотираларини диққат билан тинглашади ва ҳар гал ўзларига керакли хулосаларни чиқариб олишади. Бугун ҳам халқ депутатлари Тошкент шаҳар Кенгаши депутатлари, Чилонзор туман кенгаши фаоллари ва Чилонзор туман автомобиль йўллари касб-ҳунар коллежи ўқитувчи ва ўқувчилари ҳамроҳлик қилишмоқда.

Дастлаб Чарх Комолон-3 маҳалласида истиқомат қилаётган, уруш йилларида ҳамшира бўлиб хизмат қилган Қумри Усмонованинг уйига кирдик. Юзидан нур ёғилиб турган онахон ўз хотираларини ҳаяжон билан сўзлаб берди.

— Отам урушга кетиб қайтиб келмади, — дейди у. — Онам 28 ёшида бева бўлиб қолди. Беш бола етимликда вояга етдик. Эсласам, ҳали-ҳамон этим жунжикади. Онам кундузи ҳамширалик қилар, кечалари тикувчилик қиларди. Онамга ёрдам бўлиши учун мен ҳам ҳамширалик қила бошладим. У кунларни эслашнинг ўзи даҳшат. Кимнингдир қўли йўқ, яна кимлардир оёғини урушда қолдириб келган. Дори-дармон тақчил, қорни тўйиб ов­қат ея олмаган ярадорларнинг оғриқдан инграганлари қулоқларим остидан ҳалигача кетмайди. Уларнинг ҳар бирининг ўз тарихи, йўлига кўз тиккан яқинлари бор эди. Ногирон бўлиб қолгач, мени оиламга ҳалок бўлди, деб айтинг, деганлар ҳам бўлди. Бир ярадорнинг сўзлари ҳеч ёдимдан чиқмайди. Икки қўлидан айрилган ёш йигит илтимос қилди. Бир умр менга қараб эзилгандан кўра, бир марта куйишсин. Урушда ҳалок бўлди, деб хат ёзиб беринг, деди...

Уруш йилларида ҳар бир аёл тинчлик учун, болалари келажаги учун курашди.

Шу куни партия фаоллари ва йигит-қизлар билан биргаликда Любовь Иванова, Муродхўжа Ишонходжаев, Шаҳло Тўлаганова хонадонларида ҳам бўлдик. Шундан сўнг Тошкент шаҳар Кенгаши депутати Жасур Қулмуҳаммедов бизни Хотира ва қадрлаш куни муносабати билан ўтказилаётган коллеждаги тадбирга таклиф этди.

Хотира ва қадрлаш куни муносабати билан ўтказилаётган тадбирлар чоғида шунга амин бўлдикки, юрт учун, халқ учун хизмат қилган, ҳаётини бағишлаганлар ҳеч қачон унутилмайди.

 

Маҳлиё АЛИҚУЛОВА



DB query error.
Please try later.