10.05.2017

БАНКЛАР КРЕДИТЛАРИ ЭВАЗИГА

ёшлар ўз лойиҳаларини амалга оширишмоқда, янги иш ўринлари яратилмоқда

Оққўрғон туманида Ўзбекистон Халқ демократик партия­си Тошкент вилоят кенгаши ва маҳаллий Кенгашлар депутатлари ҳамкорлигида «Партиянинг Сайловолди дастури ижроси: амалий ишлар ва мавжуд муаммолар» мавзуида семинар ўтказилди.

Унда ЎзХДП Марказий Кенгаши ходимлари, тумандаги тижорат банклари, Давлат солиқ инспекцияси, Савдосаноат палатаси ҳудудий бирлашмаси ва Бандликка кўмаклашиш маркази мутахассислари, жамоатчилик вакиллари иштирок этди.

Дастлаб Оққўрғон агросаноат ва тадбиркорлик касб-ҳунар коллежида меҳнат ярмаркаси ўтказилди. Унда барча ташкилот ва корхоналар ўзларининг бўш иш ўринлари билан қатнашди.

— Мактабгача таълим муассасамизда спорт, мусиқа йўналишлари каби бир неча тўгараклар фаолият кўрсатмоқда, — дейди 11-МТМ ходими Шоҳида Авилбекова. — Инг­лиз тили тўгараги ҳам ташкил қилмоқчимиз. Мазкур ярмаркага ушбу тилни чуқур биладиган мутахассис топиш мақсадида келдик. Ота-оналар ҳам фарзандлари инглиз тилини ўрганишини хоҳлашмоқда. Шунингдек, бизга олий маълумотли психолог ва ҳамшира ҳам керак.

— Меҳнат ярмаркасида олти бўш иш ўрни билан қатнашаяпмиз, — дейди Давлат санитария-эпидемиология назорат маркази туман бўлими иш юритувчиси Раъно Алиасқарова. — Тошкент тиббиёт академияси икки нафар битирувчиси билан уч томонлама шартнома имзоладик.

— Банкдан кредит олиб, ўз ишини бошлаганлар сафи кундан-кунга кенгаймоқда, — дейди«Агробанк» туман филиали бош мутахассиси Жалолиддин Толипов. — Кўпчилик иссиқхона қуриш, асал­ари боқиш ва паррандачиликни йўлга қўйиш мақсадида бизга мурожаат қилмоқда. Бугунги ярмаркада ҳам кредит олишни истаганларга маслаҳатлар ва амалий ёрдам бердик. Дастлаб банк ходимлари аҳолини тадбиркорликка жалб қилиш учун хонадонма-хонадон юрган эди. Бунинг натижасида туман аҳолисининг иш билан бандлиги сезиларли даражада ошди.

Меҳнат ярмаркаси якунлангач, шу ерда ўқувчилар иштирокида семинар ташкил этилди. Унда банклар томонидан тақдим этилаётган имтиёзли кредитлар, тадбиркорлик фаолиятини йўлга қўйиши юзасидан маслаҳатлар, маълумотлар берилди.

Семинар давомида кўчма Жамоатчилик қабулхонаси ташкил этилди. Унда Олий Мажлис Қонунчилик палатаси ҳамда маҳаллий Кенгашлар депутатлари томонидан фуқаролар қабул қилинди.

— Бугунги амалий семинарда иштирок этган ёшлар билан суҳбат қурганимизда уларнинг мустақил фикри, интилишлари, пишиқ-пухта ўйланган бизнес лойиҳалари борлигига гувоҳ бўлдим, — дейди ЎзХДП Тошкент вилоят кенгаши раиси Меҳрожиддин Дархонов. — Бундан кўриниб турибдики, ёшларимиз мамлакатимизда кечаётган ислоҳотларнинг кузатувчиси эмас, балки иштирокчисига айланмоқда. Марказий банкнинг вилоят бошқармаси билан ҳамкорликда ёшларнинг ташаббусларини қўллаб-қувватлаш, бандлигини таъминлаш мақсадида имтиёзли кредит олиш имкониятини берувчи сертификатлар топширдик.

— Одамларда эртанги кунга бўлган ишонч тобора мустаҳкамланмоқда, — дейди ЎзХДП Марказий Кенгаши Депутатлик бирлашмаларининг ишини мувофиқлаштириш ва Жамоатчилик қабулхоналари билан ишлаш бўлими мудири Боймурод Юсупов. — Семинарга банклар ходимларини бекорга таклиф қилганимиз йўқ. Улар ёшларга керакли йўл-йўриқларни кўрсатишади. Бу уларга нафақат ўзини, балки тенгқурларини ҳам иш билан таъминлаш имкониятини беради. Оддий бир мисол: битта яхши пайвандчи бўлса, эртага у ўзи ва 5-6 кишини иш билан таъминлайди. Ҳамма жойга пайвандчи керак. Демак, мана шу нуқтаи назардан ёшларга қўрқмасдан банклар томонидан таклиф қилинаётган имтиёзли кредитларни олиб иш бошлаш кераклигини тушунтиришимиз зарур.

— Тадбиркорлик билан шуғулланиш мақсадида «Микрокредитбанк»дан имтиёзли кредит олиш имкония­тини берувчи сертификатга эга бўлдим, — дейди Агросаноат ва тадбиркорлик коллежи битирувчиси Абдулазиз Холматов. — 20 сотих еримиз бор. Кичик иссиқхона қурганмиз. Мазкур кредитга иссиқхонани кенгайтирмоқчиман.

Семинар якунига етгач, банклар томонидан имтиёзли кредит олиб ишини бошлаган ёш тадбиркорларнинг уйларига борилди.

— Беданачилик билан шуғулланиш мақсадида «Микрокредитбанк»-дан 7 миллион 400 минг сўм миқдорида кредит олган эдим, — дейди Исломобод маҳалласида истиқомат қилувчи ёш тадбиркор Саиджон Шарифхўжаев. — Ушбу маблағга 2500 жўжа олдим. Бугун беданаларни парвариш қила бошлаганимга 20 кундан ошди, ўзгариш катта. Яна 20 кундан сўнг тухум олишни бошлаймиз. 50-55 кун ичида уларнинг 70-80 фоизи тухумга киради. Ишларимиз юришиб кетса, фаолиятимизни янада кенгайтиришни режалаштирганмиз.

— «Агробанк»дан 6 миллион сўм миқдорида имтиёзли кредит олганман, — дейди ёш тадбиркор Рустам Бакиров. — Ушбу маблағ ҳисобидан 2 сотих ерга 2 та иссиқхона барпо қилдик. Биттасига булғор қалампири, иккинчисига бодринг экдик.

— Ўғлим Рустамнинг ишларидан кўнглим тўқ, — дейди Раҳмонали Бакиров. — Ёшларимизга доимий эътибор бераётгани учун давлатимиздан миннатдорман. Тўғрисини тан олиш керак, бундан 3 ой олдин битта иссиқхона қуришга ҳам қурбимиз етмас эди. Банк кредити эвазига иссиқхонани тезда ишга туширдик. Бунинг натижасида оиламиз иқтисоди яхшиланди. Ҳамма фойдали меҳнат билан банд. Ўғлим келгусида фаолиятини ривожлантириб, янги иш ўринлари яратмоқчи. Мен ҳам унга ўз маслаҳатларимни бериб турибман. Келажакдан умидимиз катта...

 

Шаҳбоз САИДОВ,

«Ўзбекистон овози» мухбири.



DB query error.
Please try later.