07.05.2017

ЭЛЕКТОРАТ ВАКИЛЛАРИНИНГ ИШОНЧ ВА ТАЯНЧ МАСКАНИ

Ўзбекистон Халқ демократик партияси қошидаги Жамоатчилик қабулхоналари аҳоли муаммоларини ўрганишнинг самарали механизмига айланганига анча бўлди. Аммо шиддат билан илдамлаб бораётган ҳаёт қабулхоналар ишини тубдан такомиллаштиришни тақозо этмоқда. Сурхондарё вилоятида ҳам бу борада бир қатор ишлар амалга ошириляпти.

— 2017 йилнинг Халқ билан мулоқот ва инсон манфаатлари йили, деб эълон қилиниши аҳолининг ижтимоий ёрдамга эҳтиёжманд қатлами манфаатини ҳимоя этиш ғоясини илгари сураётган партиямиз зиммасига ҳам катта масъулият юклайди, — дейди ЎзХДП Шўрчи туман кенгаши раиси Ботир Ражабов. — Туманимизда партиямизнинг 2500 нафарга яқин аъзоси, 41 бошлан­ғич ташкилоти бор. Партиямиздан сайланган 10 нафар депутат фаоллар билан ҳамкорликда Жамоатчилик қабулхоналарига бўлаётган мурожаатларга ечим топишнинг янгича усулларидан фойдаланишга ҳаракат қилмоқда. Хусусан, жойларда кўчма Жамоатчилик қабулхоналари ташкил этиляпти. Унда депутатлар, ҳуқуқшунослар иштирок этяпти. Бу орқали халққа яқин бўлиш, аҳолини ўйлантираётган муаммоларни эрта аниқлаш имкони ортмоқда.

Қабулхоналарга бўлаётган мурожаатлардан маълум бўлишича, одамларни коммунал хизмат, соғлиқни сақлаш, таълим тизимидаги камчиликлар кўпроқ ташвишга солмоқда.

— Жамоатчилик қабулхонаси шахсан менга ҳам ёрдам берган, — дейди «Бахтлитепа» маҳалласидан Нурулло Холбоев. — Оилада ўн кишимиз. 2009 йилда хонадонимизни табиий газ тармоғидан уздирдим. Ҳолат юзасидан 2009 йилнинг 8 августида мутасаддилар иштирокида далолатнома ҳам тузилган.

2017 йилнинг бошларида «Шўрчитумангаз» филиали томонидан 1 миллион сўм қарзимиз борлиги ҳақида хабар келди. Шунинг учун бизга суюлтирилган газ баллони берилмас экан. Масала юзасидан филиал мансабдорларига бир неча марта учрашдим. Улар бугун ҳал бўлади, эртага келинг, деган баҳоналар билан анча овора қилишди.

Шундан кейин ЎзХДП Шўрчи туман кенгашида ташкил қилинган Жамоатчилик қабулхонасига бордим. Кўп ўтмай табиий газ тўловидан қарзимиз йўқлиги аниқланди ва газ баллони берилди.

— Айрим маҳаллий раҳбарларда ҳамон лоқайдлик кузатилмоқда, — дейди Бобур маҳалласидан Насиба Очилдиева. — Буни табиий газ ва электр энергияси тизимида учраётган сунъий тўсиқларда яққол кўриш мумкин. Табиий газдан қарзимиз йўқлиги ҳақида маълумотнома керак бўлиб қолди. Хуллас, бир ойга яқин «Шўрчитумангаз» филиалидан ҳужжат ололмадим. Жамоатчилик қабулхонасига мурожаат қилганимдан кейин масала ижобий ечим топди.

— Жамоатчилик қабулхонасида ҳар бир мурожаат тезкорлик билан ҳал қилинар экан, — дейди«Оққўрғон» маҳалласидан Қизлархон Ҳотамова. — 2016 йилнинг сентябрь ойидан вилоят кўзи ожиз ва заиф кўрувчи болалар мактаб- интернатида фаррош бўлиб ишлай бошладим. Жорий йилнинг январига қадар маош беришмади. Масала юзасидан бир неча марта раҳбариятга учрашдим. Аммо фойдаси бўлмади.

Жамоатчилик қабулхонасига бордим. Депутатлар ҳамда партия фаоллари кўмаги билан ойлик маошим тўлиқ ундириб берилди. Бундан оила аъзоларимиз ҳам хурсанд бўлди...

Электорат вакилларини қўллаб-қувватлаш, уларнинг дардини тинглаш ва муаммоларига ечим топишда партиямиз мутасадди ташкилотлар билан мустаҳкам алоқа ўрнатган. Жорий йилнинг ўтган даврида «Какан» ва «Қўштегирмон» маҳалласида ташкил этилган кўчма Жамоатчилик қабулхонаси туфайли ўнга яқин муаммо жойида бартараф этилди.

Шу билан бирга, қабулхоналарга мурожаат қилганларга касаначиликни ривожлантириш, қишлоққа саноатни олиб кириш, хотин-қизлар ва ёшларни иш билан таъминлаш борасида ҳуқуқий маслаҳат ва амалий ёрдам кўрсатилмоқда.

 

Абдумалик ҲАЙДАРОВ,

«Ўзбекистон овози» мухбири.



DB query error.
Please try later.