Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2017   
Du Se Cho Pa Ju Sha Ya
27 28 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
11.03.2017

ЭЛЕКТОРАТ МАНФААТЛАРИ ҲИМОЯСИ

партия ташкилотлари, депутатлардан улкан масъулият талаб этади

Жойларда кенг жамоатчилик томонидан Ўзбекистон Республикасини янада ривожлантириш бўйича Ҳаракатлар стратегияси, унда белгиланган вазифаларнинг ҳаётий аҳамияти қизғин ўрганилмоқда.

Ўзбекистон ХДП Қорақалпоғистон Республика кенгаши Ижроия қўмитасининг навбатдаги кенгайтирилган йиғилишида Ҳаракатлар стратегиясини амалга оширишда партия ташкилотлари ва депутатлик бирлашмалари олдида турган устувор вазифалар муҳокама қилинди.

 

Шарап УСНАТДИНОВ, Қорақалпоғистон Республикаси Жўқорғи Кенгесидаги ЎзХДП фракцияси аъзоси:

— Ҳаракатлар стратегиясида мамлакатимизни жадал ривожлантириш, халқимиз турмуш фаровонлигини ошириш билан боғлиқ келгуси 5 йилга мўлжалланган устувор вазифалар белгилаб берилди. Улар давлат ва жамият қурилишини такомиллаштириш, қонун устуворлигини таъминлаш ва суд-ҳуқуқ тизимини янада ислоҳ қилиш, иқтисодиётни ривожлантириш ва либераллаштириш, ижтимоий соҳани ривожлантириш, хавфсизлик, миллатлараро тотувлик ва диний бағрикенгликни таъминлаш сингари муҳим йўналишлардан иборатдир.

Қорақалпоғистон Республикасига 2017-2021 йиллар мобайнида 8 триллион 400 миллиард сўм инвес­тиция киритилиши мўлжалланган. Хусусан, 740 миллион доллар ҳисобига Тахиатош ИЭСда 2 та буғ генератори қурилади. Нукус шаҳридаги Ерназар Олакўз марказий кўчаси кенгайтирилиб, транспорт ҳаракати учун янада қулайлик яратилади. Йўл бўйида кўп қаватли уйлар, савдо ва маиший хизмат кўрсатиш шохобчалари барпо этилади.

Шу йилнинг ўзида 30 та кўп қаватли уйлар, келаси йил эса 20 та, жами 50 та кўп қаватли уйлар қад кўтаради. Шаҳарда қуриладиган полимер маҳсулотлари заводи йилига 8 минг тонна полиэтилен труба, қадоқлаш маҳсулотлари ишлаб чиқаради. Замонавий технология билан жиҳозланадиган ушбу корхонада юздан ортиқ иш ўрни яратилади. Шунингдек, Нукус аэропортини жаҳон стандартига мос тарзда қайта жиҳозлаш, темир йўл вокзалидаги хизмат турларини кўпайтириш, йўловчилар учун қулайликлар яратиш мўлжалланган.

Бу борада партиямиз ташкилотлари, депутатлик бирлашмалари ҳам талабчан бўлиши, режа ва дас­турларга киритилган чора-тадбирларнинг ўз вақтида амалга оширилишини ўрганиб бориши, айни пайт­да, қатъий позиция кўрсатиши талаб этилади.

Махсуд САЪДУЛЛАЕВ, халқ депутатлари Амударё туман Кенгашидаги ЎзХДП гуруҳи раҳбари:

— Сайловчилар билан учрашувлар ва мулоқот жараёнларида бир нарсага кўп гувоҳ бўлдим. Президентимизнинг Ўзбекистон Респуб­ликасини янада ривожлантириш бўйича Ҳаракатлар страте­гияси тўғри­сидаги фармони халқимиз томонидан катта кўтаринкилик билан кутиб олинди. Мазкур ҳужжат оддий одамларнинг хоҳиш-истакларини ўзида мужассам этгани билан ҳам алоҳида аҳамият касб этади.

Жумладан, унда халқ билан мулоқот қилишнинг самарали механизмлари ва жамоатчилик назоратининг замонавий шаклларини жорий этиш бўйича аниқ вазифалар белгиланган. Бу биз, депутатлар зиммасига катта масъулият юклайди.

Партия гуруҳлари ҳудудларни ижтимоий-иқтисодий ривожлантириш дастурларини чуқур таҳлил этиши, уларнинг қай даражада самарали амалга оширилаётганини тизимли мониторинг қилиши талаб этилади. Яна бир муҳим жиҳат. «Масалани ўргандим, маълумотлар ­йиғдим», қабилида иш тутиш билан вазифани тўлиқ адо этиб бўлмайди. Биз нафақат ҳудудлардаги ­муаммоларни ўрганишимиз, балки ечимини кутаётган, аҳолини ўйлантираётган масалалар юзасидан аниқ тавсиялар ишлаб чиқишимиз, давлат органлари билан биргаликда муаммоларни жойида ҳал этишимиз керак бўлади. Шунда ишимизда самара, натижа кўринади.

Бундан ташқари, жойларда партия электорати орасида Ҳаракатлар стратегиясининг мазмун-моҳиятини, «Халқ билан мулоқот ва инсон манфаатлари йили» Давлат дастурида амалга оширилиши белгиланган тадбирларнинг аҳамиятини кенг тарғиб қилишимиз зарур. Бунинг учун ҳар бир йўналиш ­бўйича тадбирлар режасини ишлаб чиқиб, унинг ижросини таъминлаш чораларини кўришимиз зарур.

Шунингдек, оммавий ахборот воситалари билан алоқаларни янада мустаҳкамлаш, уларда Ҳаракатлар стратегияси ва Давлат дастурининг ижросини таъминлашда депутатлик гуруҳларининг иштирокини кенг ёритиш бўйича таҳлилий материаллар бериб боришимиз лозим.

Қуватбой ҚУРБАНБАЕВ, ЎзХДП Нукус шаҳар кенгаши раиси:

— Партиямиз Марказий Кенгаши томонидан Давлат дастурининг асосий устуворликларидан келиб чиқиб, бир қатор муҳим вазифалар белгилаб берилди. Биз уларни амалга оширишда расмиятчиликка йўл қўймаслигимиз, номига тадбир ўтказиш билан чекланиб қолмаслигимиз керак.

Маълумки, Ҳаракатлар страте­гия­си Президентимизнинг виртуал қабулхонасига келиб тушган ши­коятлар, мутахассисларнинг барча соҳаларни чуқур ўрганиши, аҳолини ўйлантираётган муаммоларни ҳал этиш ҳақидаги таклифлари асосида ишлаб чиқилган. Ушбу муҳим ҳужжатда мамлакатимизни ривожлантиришнинг бешта устувор йўналиши бўйича вазифалар белгилаб олинди. Шунга асосан биз ҳам ­фао­­лиятимизни тубдан ўзгартиришимиз ва аниқ амалий ҳаракатларга асосланган лойиҳалар ишлаб чиқиб, уларни ҳаётга татбиқ этишимиз керак, деб ўйлайман. Яъни энди кўпроқ халқнинг ичига кириб боришимиз, одамларни қийнаётган муаммоларни ўрганиб, таҳлил қилишимиз ва аниқ ечимга қаратилган тадбирларни ўтказишни йўлга қўйишимиз зарур. Чунки ҳозирги замон, белгиланган долзарб вазифалар амалий фаолиятни талаб қилмоқда.

Йиғилишда партия ташкилотлари ва депутатлар фаолиятини тубдан такомиллаштириш масалалари бўйича тегишли қарорлар қабул қилинди.

 

Мнажатдин ҚУТЛИМУРАТОВ,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: