14.05.2013

ФАРҒОНА: ИНВЕСТИЦИЯВИЙ САЛОҲИЯТ

хорижлик ҳамкорларни чорламоқда

Маълумки, Фарғона вилояти ўзининг ер ости ва ер усти бойликлари, ривожланган саноат ва коммуникация тармоқлари, бой меҳнат ресурслари билан мамлакатимиз тараққиётида алоҳида ўрин тутади. Кейинги вақтда биргина Фарғона нефтни қайта ишлаш заводи 89 миллион доллар миқ­дордаги инвестиция ва кредитлар ҳисобига тубдан модерниза­ция қилинди. Фарғона азот ишлаб чиқариш бирлашмасига қарийб 95 миллион долларлик инвестиция жалб этилиши унинг салоҳияти кескин юксалишига олиб келди.

Шунингдек, охирги беш йилда «Қува­сойцемент», «Кварц», Қўқон суперфосфат, Қўқон механика заводи каби 10 дан ортиқ йирик саноат корхоналарида 128 миллион доллардан зиёд инвестиция маблағи сарфланиб, модернизация ишлари амалга оширилди. Шу билан бирга, таркибий ўзгартириш ва диверсификация ҳисобидан ви­лоятда саноат маҳсулотлари ишлаб чиқариш ҳажми 2000 йилга нисбатан 1,5 баробар кўпайди.

Айниқса, «2013-2015 йилларда Фар­ғона вилояти саноат салоҳиятини оши­риш Дастури» ва «Фарғона вилоятида 2013 йилда хизмат кўрсатиш ва сер­вис соҳасини ривожлантириш Дас­туриларнинг қабул қилиниши алоҳида аҳамиятга эга. Ушбулар асосида жами 479 та лойиҳа, жумладан, 2013 йилга 449 та лойиҳа белгиланди. 238 миллион долларлик инвестиция ўз­лаштирилиши орқали 10,5 мингта ян­ги иш ўринлари яратилиши, 2147 та хизмат ва сервис шохобчалари ишга тушиши кўзда тутилган. Шу маънода яқинда «Фарғона вилоятининг ин­вестицион салоҳияти» мавзуидаги ­Халқаро бизнес форумнинг ўтказилиши бежиз эмас. Унда дунёнинг 20 га яқин мамлакатидан келган сиёсатчи, иқтисодчи, тадбиркор, ишлаб чиқарувчилар ва савдо агентлари иштирок этди.

Ушбу учрашувда «Индорама Қўқон» Ўзбекистон-Сингапур, «UzSungWoo» Ўзбекистон-Жанубий Корея қўшма корхоналари раҳбарлари вилоятда инвестиция лойиҳаларини амалга ошириш борасида эришган муваффақиятлари, чет эллик сармоядорлар учун яратилган қулай инвестицион муҳит хусусида самимий фикр-мулоҳазаларини билдириб ўтди.

Меҳмонлар Ўзбекистон халқаро саноат ярмаркаси ва кооперацион биржасининг вилоят саноат ярмаркасида иштирок этди. Ярмаркада 200 га яқин тадбиркорлик субъектлари қурилиш, енгил саноат, озиқ-овқат ва ноозиқ-овқат, мебель ва спорт жиҳозлари, маиший техника каби 700 дан ортиқ маҳсулотлари кўргазмаси билан қатнашди.

— Германия, Япония технологиялари асосида ишловчи корхонамизда маҳсулотларнинг 700 хил модели яратилган, — дейди «Бешариқтекстил» Ўзбекистон — Буюк Британия қўшма корхонаси савдо бўлими мутахассиси Акмал Муҳаммаджонов. — Ярмаркада энг сўнгги русумдаги маҳсулотларимиз билан иштирок қилдик.

Форум давомида вилоятда ёқилғи энергетикаси, электротехника, кимё, енгил саноат тармоқларига кенг миқ­ёсда хориж сармоясини киритиш борасида ўзаро манфаатли ҳамкорлик алоқаларини ўрнатиш юзасидан келишувлар амалга оширилди, меморандум имзоланди. Умумий суммаси 52 миллион 220 минг доллари миқдорида 43 та шартнома имзоланди. Шунингдек, 10 миллион доллар миқдорида экспорт шартномаси тузилди.

— Ҳудудий саноат ярмаркасида нафақат хорижлик сармоядорлар, балки маҳаллий тадбиркорлар билан ҳам кўплаб шартномалар имзолангани эътиборлидир, — дейди «Чимён-Форум» МЧЖ вакили Офарин Абдураҳмонов. — Хусусан, Олтиариқнинг «Файз-Бинокор» қурилиш корхонаси билан йўлак плиталари, деворлар учун керамзит бетон етказиб бериш мақсадида 420 миллион сўмлик шартнома имзоладик.

— Ўзида иқтисодиётнинг турли йў­налишларини мужассам этган ушбу халқаро бизнес форум, ҳудудий саноат ярмаркаси барчага маъқул бўлди, — дейди биз билан суҳбатда америкалик меҳмон Руди Маттон. — Маҳсулотларнинг ранг-баранглиги, янги технология, ускуна ва жиҳозлар кўплиги, тадбиркорларингизнинг ташаббус ва ғоялари бизда катта таассурот қолдирди. Жаҳон андозалари даражасидаги маҳсулотлар, замонавий дастгоҳ ва технологик ускуналар намойиши юртингизда инвестициявий салоҳият юқори эканидан далолатдир.

Дарҳақиқат, фарғоналик тадбиркорлар томонидан ишлаб чиқарилаётган маҳсулотлар сифати, дизайни, табиий тоза хомашёси жиҳатидан ҳар қандай хориж маҳсулотларидан қолишмайди. Бу ҳам диёримизда тадбиркорликни ривожлантириш, ишбилармонлик муҳитини шакллантириш орқали қўшимча иш ўринларини яратишга жиддий эътибор қаратилаётгани самараси эканининг яна бир тасдиғидир.

Муҳаммаджон ОБИДОВ,

«Ўзбекистон овози» мухбири.



DB query error.
Please try later.