14.05.2013

МУСОБАҚА ЯҚИН, ТАЙЁРГАРЛИК ҚИЗҒИН

Айни кунларда Қашқадарё вилояти терма жамоаси ҳам Бухорода бўлиб ўтадиган мамлакатимиз ёшла­рининг улкан спорт байрами — «Универсиада — 2013»да муносиб иштирок этиш учун пухта ҳозирлик кўрмоқда.

— Вилоятимизда учта олий ўқув юрти мавжуд, — дейди Қар­ши давлат университети маънавият ва тарбиявий ишлар бўйича проректори Амин Маллаев. — Бухорода бўладиган «Универ­сиада — 2013» мусобақаларида вилоя­тимиз шарафини ҳимоя қиладиган ёшлар ана шу олий таълим муассасалари талабалари орасидан саралаб олинди. Дастлаб ўн икки спорт тури бўйича баҳслар факультетлараро ташкил этил­ган бўлса, сўнгра иккинчи бос­қичда олий ўқув юртлари ўртасида мусобақалар уюштирдик. Ғолиб ва совриндорлар орасидан вилоят терма жамоаси шакл­лантирилди.

Яқинда «Универсиада — 2013» мусобақалари дастуридан жой олган футбол, қўл тўпи, волейбол ҳамда баскетбол сингари жамоавий спорт турлари бўйича минтақавий баҳслар Қарши шаҳрида бўлиб ўтди. Унда мезбонлардан ташқари, Сурхондарё ва Бухоро вилоятлари терма жа­моалари ўзаро куч синашди. Мусобақа низомига кўра, ғолибликни қўлга киритган жамоалар финал босқичи йўлланмалари билан тақдирланди. Жумладан, унда футбол, қўл тўпи (қизлар ва йигитлар) учрашувларида мезбонлар энг кучли деб топилган бўлса, баскетбол ва волейбол баҳсларида омад бухороликларга кулиб боқди. Афсуски, минтақавий мусобақада Сурхондарё вилояти талаба-ёшлари бирорта ҳам йўлланмани қўлга киритишнинг уддасидан чиқа олишмади.

— Бундан уч йил муқаддам Андижонда ўтказилган «Уни­вер­сиада — 2010» мусобақаларида футболчиларимиз бешинчи ўрин билан кифояланишганди, — дейди Қашқадарё вилояти футбол жамоаси бош мураббийи Шуҳрат Қиёмов. — Жамоа­миз аъзолари Бухорода фақат ғалаба учун курашишга шай туришибди. Қаршида ўтган минтақавий учрашувларда дастлаб сурхондарёликларни 2:1 ҳисобида енгган бўлсак, бухороликлардан 2:0 ҳисобида устун келдик.

Қашқадарёлик талаба-ёшлар мусобақанинг кураш, белбоғли кураш, теннис, шоҳмот каби турлари бўйича ҳам ғолибликка асосий даъвогарлар қаторида эътироф этилмоқда. Жумладан, шу кунларда кураш бўйича Давлат Абраев (66 кг), Рустам Саидов (90 кг), Аброр Бердиқулов (100 кг), Муҳриддин Бўтаев (+100 кг), дзюдо беллашувларида Раҳим Шеров (66 кг), Бекзод Дўстов (73 кг) каби мамлакат чемпионати ва халқаро турнирлар ғолиблари Бухорода ҳам ўзларини кўрсатиш учун жиддий тайёргарлик кўришаётир.

— «Универсиада — 2013» мусобақаларида шоҳмот бўйича қатнашаман, — дейди Қарши давлат университети амалий математика факультети 4-босқич талабаси Акмал Файзуллаев. — Бундан уч йил илгари Андижонда ўтган мусобақада бронза медалига сазовор бўлгандим. Энди мақсадим Бухородан олтин медаль билан қайтишдир.

Эркин ХОЛБОБО,

«Ўзбекистон овози» мухбири.



DB query error.
Please try later.