25.04.2013

ДАСТУРИЙ МАҚСАДЛАРГА ЭРИШИШ УЧУН

бошланғич ташкилотлар фаолиятини янада кучайтириш зарур

Наманган вилоят партия кен­гашининг тўққизинчи пленуми бўлиб ўтди. Унда бошланғич партия ташкилотлари фаолиятини кучайтириш орқали дастурий мақсадларни рўёбга чиқариш самара­дорлигини ошириш масаласига алоҳида эътибор қара­тилди.

Бошланғич ташки­лотлар фао­лиятини жонлантириш, йўл қўйилган айрим камчиликларни бартараф этиш, бу борада депутатлик гуруҳлари билан ҳамкорликни изчил йўлга қўйиш, тарғибот ишлари таъсирчанлигини ошириш хусусида фикр алмашилди.

Бошланғич ташкилотнинг ишини жонлантирмай, фаоллаштирмай туриб, дастурий мақсадларга эришиб бўл­майди. Тўғри, БПТнинг сонини шунчаки кўпайтиришдан партия манфаатдор эмас. Энг муҳими, аъзоларни янада жипслаштириш, етакчилар салоҳиятини ошириш, тажрибали кадрлар тайёрлашда, партиянинг дас­турий мақсадларини амалга оширишда уларнинг кучидан самарали фойдаланишдир.

Пленумда бу борада турли таклиф ва тавсиялар билдирилди. Сиёсий ва фуқаролик маърифати тизимидаги ўқувларни бошланғич ташкилотларда мунтазам ўтказишни ташкил этиш, юқори партия кенгашларидан юбориладиган услубий тавсиялар, қўлланмаларни қуйи бўғинга ўз вақтида етказиб бериш каби масалалар атрофлича муҳокама этилди.

Халқ депутатлари маҳаллий Кенгашларидаги партия­миз депутатлик гуруҳларининг фаолиятини жонлантириш ҳам бугун олдимизда турган энг муҳим вазифалардан биридир.

Партиянинг 2011-2014 йилларга мўлжалланган Ҳа­ракат дастурига мувофиқ, депутатлик гуруҳлари томонидан ўтган давр мобайнида вилоят, шаҳар ва туман Кенгашлари сессиялари ва доимий комиссиялар муҳокамасига 21 та масала киритилган ҳамда қабул қилинган қарорлар ижроси назоратга олинган.

Халқ депутатлари Уйчи, Тўрақўрғон, Чортоқ, Янги­қўр­ғон, Чуст, Норин туман Кенгашлари сессиялари ва доимий комиссиялари йиғилишларида партиямиз депутатлари ташаббуси билан электоратимиз манфаати билан бевосита боғлиқ қатор масалалар кўриб чиқилди.

Аммо бу етарли эмас, албатта. Партия ташкилотлари ва депутатлик гуруҳлари ишини талаб даражасида ташкил этиш, партия Сай­лов­олди дастурида белгиланган вазифаларни кўнгилдагидек бажаришда улардан янада фаол ва ташаббускор бўлиш талаб этилади.

Пленумда вилоят партия кенгаши раиси, халқ депутатлари вилоят Кенгашидаги депутатлик гуруҳи раҳбари Абдурашид Убайдуллаев депутатлик гуруҳлари ҳамда бошланғич ташкилотлар фаолиятини комплекс равишда кучайтириш зарурлигини таъкидлади.

Бу борада махсус чора-тадбирлар режаси ишлаб чиқиш, тажриба кунлари ўтказиш, депутатлар билан бошланғич ташкилотларни ўзаро боғлайдиган механизм яратиш таклифи ўртага ташланди.

Кун тартибидаги масалалар бўйича сўзга чиққан Олий Мажлис Қонунчилик палатаси депутати Зиёвуддин Мансуров, партия Марказий Кенгаши ташкилий-кадрлар ишлари бўлими мудири Зокиржон Холматов, вилоят Кенгаши депутати Шоира Абророва, Чуст туман партия кенгаши раиси, туман Кенгашидаги депутатлик гуруҳи раҳбари Муҳсинжон Бобохонов олдинда турган вазифалар хусусида фикр юритиб, уларни амалга оширишда ўзаро мустаҳкам ҳамкорлик ва ташаббускорлик зарурлигини таъкидлашди.

Пленум муҳокама этилган барча масалалар юзасидан қарорлар қабул қилди.

Носиржон ДЕҲҚОНОВ,

«Ўзбекистон овози» мухбири.



DB query error.
Please try later.