25.04.2013

ХОТИН-ҚИЗЛАР МАНФААТИ

биз учун муҳим масала

Обод турмуш йилида давлат ва жамоат ташкилотлари олдида турган асосий вазифалар ёш оилалар, хотин-қизлар манфаати билан бевосита боғлиқ. Айниқса, оилаларни қўллаб-қувватлаш, аёлларнинг ижтимоий-сиёсий жараёнларда фаол иштирокига эришиш, улар бандлигини таъминлаш долзарб аҳамиятга эгадир.

ЎзХДП Бухоро вилоят кенгаши «Фаол аёллар» қаноти ва Бухоро шаҳар партия кенгаши ҳамкорлигида ўтказилган давра суҳбатида мазкур йўналишлардаги ишларда «Фаол аёллар» қанотининг иштирокини кенгайтириш масаласи муҳокама этилди.

Сўзга чиққанлар жорий йилда мамлакатимизнинг чекка ҳудудларида истиқомат қилаётган аёллар манфаатини ҳимоя қилишга алоҳида эътибор қаратиш зарурлигини таъкидлашди. Шунингдек, хотин-қизлар фаоллиги, тадбирлар таъсирчанлигини ошириш ва аниқ мақсадга йўналтирилган ташаббусларни кўпайтириш кераклигини алоҳида қайд этишди.

— Давлат ва жамият бошқарувида хотин-қизларнинг ўрни ва ролини янада мус­таҳкамлаш, ижтимоий фаоллигини кучайтиришда бизнинг алоҳида иштирокимиз бўлиши зарур, — дейди вилоят партия кенгаши раиси Саида Жўраева. — Бунинг учун хотин-қизларнинг сиёсий-ҳуқуқий билимини юксалтириш, уларни ўйлантираётган масалаларни ҳал қилишда халқ депутатлари маҳаллий Кенгашларидаги депутатларимиз ваколати ва имкониятларидан самарали фойдаланиш, ҳамкор ташкилотлар билан ижтимоий шерикчилик асосидаги муносабатларни ривожлантириш зарур.

— Хизмат кўрсатиш ва сервис соҳасини ривожлантириш кўплаб янги иш ўринлари яратишга замин ҳозирлайди, — дейди ­Бухоро шаҳар партия кенгаши раиси ­Робия Козимова. — Айни кунда вилоятимизда 1037 та хизмат кўрсатиш шохобчаси фаолият юритмоқда. Соҳада иш билан банд аёллар сони 11 мингдан ортиқ. Бу кўрсаткич шаҳар миқёсида 600 га яқинни ташкил этади.

Таҳлиллар шуни кўрсатадики, ҳудудларнинг ижтимоий-иқтисодий тараққиёти ва эҳтиёжидан келиб чиқиб, соҳани янада ривожлантириш керак. Бунда энг асосий эътибор ҳар бир ҳудуднинг ўзига хос хусусиятларини инобатга олган ҳолда самарали ло­йиҳаларни илгари суришга қаратилиши зарур, деб ҳисоблайман.

— Партиямиз ижтимоий ҳимояга муҳтож фуқароларни ўз электорати деб билади, — дейди Бухоро шаҳридаги «Жўйбор» маҳалла фуқаролар йиғини маслаҳатчиси Ойша Усмонова. — Шу боис ЎзХДП депутатлик гуруҳи ва партия кенгашлари ижтимоий кўмакка муҳтож фуқароларни манзилли қўллаб-қувватлаш масаласига алоҳида эътибор қаратиб келади.

Биргина мисол. Маҳалламизда 35 нафар аёл вақтинча ишсиз. Ўрганиш жараёнида уларнинг 18 нафари ишлаш истагини билдирди. Маҳаллада ташкил этилган ҳудудий партия ташкилоти бу борада ўз таклифларини ишлаб чиқиб, халқ депутатлари шаҳар Кенгашидаги ЎзХДП депутатлик гуруҳига тақдим этди. Айни кунда депутатлар тегишли ташкилотлар билан ҳамкорликда хотин-қизларни касаначиликка жалб этиш бўйича амалий иш олиб бормоқда.

Семинарда ҳудудларда касаначилик ва оилавий тадбиркорликни ривожлантириш орқали янги иш ўринлари яратишга кўмаклашиш, бу борада қанотнинг амалий иштирокини таъминлаш, ижтимоий ҳамкор ташкилотлар билан мустаҳкам алоқа ўрнатиш лозимлиги таъкидланди. Шу асосда таклиф ва тавсиялар тайёрланиб, кейинги режалар белгилаб олинди. 

Шаҳло БАКАЕВА



DB query error.
Please try later.