20.04.2013

ДУНЁ БАҲОДИРЛАРИ ЎЗБЕКИСТОНДА

Мамлакатимизда бугун баҳодирлар ўйини ва тош кўтариш бўйича мусоба­қалар ўтка­зишга алоҳида эътибор қаратилаётганлиги боис янги-янги истеъдод­лар кашф этилмоқда.

Ўтган йилларда Тошкент шаҳри икки марта баҳодирлар ўйинлари бўйича жаҳон кубоги босқичига мезбонлик қилди. Бу нуфузли мусобақаларда иштирок этган ҳамюртимиз Сергей Трубицин биттадан бронза ва кумуш медалга сазовор бўлди. 2012 йили Италияда тош кўтариш бўйича ўтказилган жаҳон чемпионатида Муҳтарам Алие­ва олтин медални қўлга киритиб, уч карра жаҳон чемпиони бўлди. Маҳфират Иноятуллаева ва Нуриддин Эргашевлар эса шоҳсупанинг учинчи по­ғо­на­сидан жой олди.

Куни кеча пойтахтимизда Хал­қаро баҳодирлар ўйинлари ва тош кўтариш федерацияси (WSF), Ўзбекистон Республикаси Маданият ва спорт ишлари вазирлиги, Баҳодирлар ўйинлари ва тош кўтариш федерацияси ҳамкорлигида илк маротаба жаҳон чемпионати ўтказилди. Унда дунёнинг ўт­тизга яқин давлатидан икки юз нафардан зиёд спортчи ёшлар, катталар ва фахрийлар ғолиблик учун куч си­нашди­лар.

— Қадимдан ҳар бир халқ ­ўз паҳлавонлари билан ғу­рур­ланган, уларни олқишлаган, — дейди Ўзбекистон баҳо­дирлар ўйини ва тош кўта­­­­­­­­­риш фе­де­рацияси президенти ­Во­­ҳид­дин Нажмиддинов. — Мамлакатимиз спортчилари бугун халқ­аро майдонда ўз маҳорат­ларини кўрсатишмоқда. Халқаро турнир ва жаҳон чемпионатларида кучлилар қаторида эътироф этилмоқда. Бу эса мазкур нуфузли мусобақанинг Тошкентда ўтказилишига замин яратди.

Жаҳон чемпионати дастуридан жой олган баҳодирлар ўйинида полвонлар ўз вазнидан бир неча баробар оғир буюмларни кўтариш, ўрнидан силжитиш, белгиланган масофагача кўтариб бориш каби жисмоний қувват, кучли ирода ва сабр-тоқат талаб қиладиган мураккаб маш­қ­ларни бажариб, мухлислар ол­қишига сазовор бўлдилар. Унда ҳамюртимиз Сергей Трубицин яна бир бор ўзини кўрсатиб, жаҳонда тенгсизлигини намойиш қилди. Иккинчи ва учинчи ўринларни Рафаэль Кобильяш (Польша), Александр Лашин (Украина)лар эгаллади. Яна бир ҳамюртимиз Ҳамза Примов кучли тўртликдан жой олди.

— Ўзбекистон ҳақида жуда кўп эшитгандим, — дейди жаҳон чемпионати кумуш медали сов­­­рин­дори, италиялик Крис­тиан Бургалио. — Тош­кент­­га келгач, хал­­қингиз­­нинг спортсеварлиги мени лол қолдирди. Жаҳон чемпионати мобайнида бизга яратилган шарт-шароит, ташкилотчилик ишларини кў­риб, ҳайратим­ни яшира олмадим. Агар Ўзбекис­тонда бу каби мусобақалар яна ўтказилса, бажонидил қатнашаман.

Жаҳон чемпионати якунида фахрийлар ўртасида ҳамюртларимиздан Ҳусанбой Назиров ва Фатҳиддин Нажмиддинов — биринчи, Сардор Эрқулов, Ўт­кир Абдураҳмонов, Хўжамберди Пардаев, Эргаш Мўйиддинов ва Тоҳир Одилжонов — иккинчи, Ойбек Эргашев, Шуҳрат Абдураҳимов, Жаҳонгир Зак­риё­қулов, Эркин Намозов, Абдулла Раҳматов, Шуҳрат Бердиев ва Бурҳон Отахонов учинчи ўрин­ларни эгаллади.

Катталар ўртасида Аваз Ўр­монов, Баҳодир Йўлчиев, Лочин Ҳусанов сингари полвонла­римиз ҳам совриндорлар сафи­дан жой олди. Шунингдек, мусобақанинг хотин-қизлар беллашувида Муҳтарам Алиева 60 килограммгача бўлган фахрийлар баҳсида шоҳсупанинг энг юқори поғонасига кўтарилиб, тўртинчи бор жаҳон чемпиони бўлди. Катталар ўртасида эса кумуш медаль билан тақдирланди. Қизларимиздан Маҳ­фират Иноятуллаева, Шаҳло Парданова кумуш, Дилноза Исмоилова ҳамда ­Нигора Худойбердиева бронза медалини қўлга киритди.

 Эркин ХОЛБОБО,

«Ўзбекистон овози» мухбири.



DB query error.
Please try later.