02.04.2013

ҚУЙИ БЎҒИН ФАОЛЛИК ВА ТАШАББУС КЎРСАТМАСА

сиёсий партия кўзлаган мақсадига ета олмайди

Фуқаролик жамияти шаклланишини мониторинг қилиш мустақил институти ҳамда ЎзХДП Тошкент вилоят кенгаши ҳамкорлигида ўтказилган семинар-тренингда бошланғич ташкилотлар фаолиятини кучайтириш ҳақида фикр юритилди. Тадбирда иштирок этган институт илмий ходимлари, экспертлари, партия фаоллари бошланғич ташкилотлар олдидаги ижтимоий-сиёсий вазифалар ва уларни амалга ошириш йўллари ҳақида фикр алмашишди.

— Мамлакатимиздаги демократик жараёнлар сиёсий партиялар зиммасига жиддий вазифалар юклади, — деди Фуқаролик жамияти шаклланишини мониторинг қилиш мустақил институти Тошкент вилояти ҳудудий бўлинмаси бош мутахассиси Баҳриддин Холбўтаев. — Уларни самарали бажаришда бошланғич ташкилотлар муҳим аҳамиятга эга. БПТ электоратнинг муаммоларини ич-ичидан билади. Шу боис бошланғич ташкилотларнинг мавжуд имкониятларидан самарали фойдаланиш талаб этилади.

Айрим масалаларни барча даражадаги депутатларнинг ва бошланғич партия ташкилотларининг куч ва имкониятларини бирлаштириш орқали ечиш мумкин. Электорат манфаатини ҳимоя қилиш, ижтимоий масалаларни ҳал этиш учун елкама-елка туриб курашиш, ижтимоий масъулиятни кучайтиришни замоннинг ўзи талаб этмоқда.

Шундай экан, вилоят, туман ва шаҳар партия кенгашлари партия Дастури ва Уставида белгиланган вазифаларни адо этиш бўйича асосий фаолият марказини қуйи бўғинга кўчиришлари зарур.

— Ҳозир туманда партиямизнинг 40 га яқин қуйи ташкилоти иш олиб бораяпти, — деди ЎзХДП Қибрай туман кенгаши раиси Заҳро Нурматова. — Ижтимоий-сиёсий тадбирларни тизимли ташкил қилиш, электорат манфаатларини ҳимоялашга қаратилган таклифларни ишлаб чиқишда улар ташаббускорлигини кучайтиришга ҳаракат қилаяпмиз.

БПТлар орасида фаолиятини тизимли йўлга қўйган, юқори партия ташкилоти ва электорат олдидаги масъулиятини чуқур ҳис этадиган, ташаббус кўрсатаётганлари оз эмас. Қибрай шаҳарча, «Байтқўрғон» қишлоқ фуқаролар йиғини, халқ таълими муассасалари фаолиятини методик таъминлаш ва ташкил этиш бўлими, туман тиббиёт бирлашмасидаги бошланғич ташкилотларни бунга мисол қилиб келтириш мумкин. Аммо ана шундай фаол ишлаётган бошланғич ташкилотлар тажрибасини оммалаштириш бўйича ишларимиз кўнгилдагидек эмас. 

— Бошланғич ташкилот атрофида бирлашган аъзолар юртимиздаги ижтимоий-сиёсий ислоҳотлар мазмун-моҳиятини чуқур англаши, партия дас­турий мақсадларини амалга оширишда фаол бўлиши лозим, — деди Бўка туманининг «Гулистон» маҳалласидаги ЎзХДП ҳудудий бошланғич ташкилоти етакчиси Фахриддин Ҳақбердиев. — Шу боис аъзоларнинг сиёсий-ҳуқуқий билимини ошириш, фуқаролик позициясини мустаҳкамлаш, қонунлар ва ҳудудларни ижтимоий-иқтисодий ривожлантириш дастурлари ижросига кўмаклашишга ҳаракат қилаяпмиз. Маҳалладаги электорат вакилларини ўйлантираётган масалаларни туман ва вилоят партия кенгаши, депутатлар ҳамда мутахассислар ёрдамида ҳал этишга уринаяпмиз.

Партиянинг аҳоли ўртасида доимий ишлайдиган, унинг муаммоларини ўрганиб, таклифларини юқори партия ташкилотлари ва давлат ҳокимиятининг вакиллик органларидаги депутатларга етказадиган асосий бўғини бошланғич ташкилотлардир. Улар фаоллик ва ташаббус кўрсатмас экан, сиёсий партия кўзланган мақсадга ета олмайди.

Гулруҳ ОДАШБОЕВА,

«Ўзбекистон овози» мухбири.



DB query error.
Please try later.