Ўзбекистон Республикаси Ички ишлар вазирлиги Қоровул қўшинларига қарашли ҳар­бий қисмда аскарларнинг ҳарбий қасамёд қабул қилиш маросими бўлиб ўтди. Унда ҳарбийлар, ота-оналар ва кенг жа­моатчилик вакиллари иштирок этди.

Тадбирда Президентимиз Ислом Каримов раҳнамолигида муддатли ҳарбий хизматни ўташ шарт-шароитларини янада такомиллаштиришга қаратилаётган эътибор ўзининг юксак самараларини бераётгани, миллий армиямиз ёшларимиз ҳар томонлама камол топадиган тарбия мактабига айлангани алоҳида таъкидланди.

— Бошланғич ҳарбий билим ва кўникмага эга бўл­ган ас­карларимиз бугун ота-онаси, дўстлари, коман­дир ва бош­лиқлар олдида халқимизга, Президентимизга садоқат билан хизмат қилишга қасамёд қил­ди, — дейди ҳарбий қисм ўқув йиғини бошлиғи, офицер А.Бердиев. — Ҳарбий қисмларимизда аскарларнинг кўнгилдагидек хизмат қилиши, яшаши, билим олиши, спорт билан мунтазам шуғулланиши учун барча шарт-шароит яратилган.

Жасур ва сергак жангчи бў­лишга қасамёд қилган аскарлар сафида навоийлик Санжар Сагидов ҳам бор.

— Ватан ҳимоячилари — ҳарбийлар сафига қўшилганимдан хурсандман, — дейди Санжар. — Бор куч-ғайратим ва билимим билан эл-юртимиз тинчлиги ва осойишталиги йўлида астойдил хизмат қиламан.

Тадбирда Ватан, истиқлол, ёшликни тараннум этувчи куй-қўшиқлар янгради.

Х.САЛИМОВ,

ЎзА мухбири.