28.02.2013

ОИЛАВИЙ ТАДБИРКОРЛИК

аҳоли даромадини ошириш, турмуш ободлигини таъминлашнинг муҳим омили

Бундан энг аввало ЎзХДП электорати вакиллари манфаат кўради. Шу боис партиямиз маҳаллий Кенгашлари ва депутатларимиз маҳаллаларда бандлик масаласини ўрганиб, оилавий тадбиркорликни йўлга қўймоқчи бўлган кишиларни қўллаб-қувватламоқда.

Зикрилло Ҳабибуллаев томорқасида деҳқончилик қилиш учун ўтган йили кеч кузданоқ иш бошлади. Фарзандларини ёнига олиб, ерни ағдарди. Молхонасида тўплаган табиий ўғитни солди, қишда яхоб берди.

Эрта баҳордаёқ тупроқ ма­йин тортиб бўр­силлади, яъни етилди. Сабзавот ва полизчилик учун уруғ ҳамда кўчат бўлса бўлди, ҳаял ўтмай даромадга киради. Ер­га яхшилаб ишлов берилса, ни­ҳоллар керакли минерал ўғитлар билан таъминлан­са, мўл ҳосил олиш мумкин. Аммо бу ишлар учун сармоядан бир оз етишмовчилик борлиги уни ташвишга со­ларди. Ўша кунларнинг бирида маҳалла раиси, яна икки нафар, у танимайдиган киши ҳовлисига кириб келди. Улар Ўзбекистон Халқ демократик партияси туман кенгаши вакиллари экан...

— Оилавий тадбиркорликни йўлга қўймоқчи экансиз, биз сизга кўмаклашишга тайёрмиз, — деди меҳмонлар.

Бундай таклифни кутмаган Зикрилло гапни томорқасига бурди.

— Уруғ ва кўчат учун бироз маблағ топишим керак...

Маҳалла вакиллари ва пар­тия фаоллари Зикриллонинг иш режасини ўрганиб, зарур маълумотларни ёзиб кетишди. Куни кеча уни Данғара тумани марказига, ЎзХДП туман кенгашига чақиришди. Катта анжуман бўл­ди. ЎзХДП Марказий Кенгаши раисининг ўринбосари Шарбат Абдуллаева иштирок этган тадбирда Зикрилло Ҳабибуллаевга «Агробанк» Данғара туман бўлимидан ­4 миллион сўм имтиёзли кредит олиш ҳуқуқини берувчи сер­тификат топширилди. Зикрилло бундай натижадан боши осмонга етди. Сабаби, энди у кўзлаган мақсадларини амалга ошириш, оиласи фаровонлигини таъминлаш учун барча имкониятларга эга.

Шу куни Данғара тумани ма­ҳаллаларида истиқомат қилаётган 20 нафар оилага «Агробанк», «Халқ банки», «Микро­кредитбанк»дан имтиёзли кре­дит олиш учун сертификатлар топширилди.

Абдулазиз Бойтемиров оила­си асаларичилик, Алишер Қозиев боғдорчилик, Акбаржон Ортиқов паррандачилик, Қодирали Ҳамроқулов балиқчилик соҳасида ўз фаолиятини бошлади. Бу ишлар Ўзбекистон ХДП Марказий Кенгашининг Фарғона вилоят партия кенгаши ҳамкорлигидаги «Маҳалла — аҳо­лини манзилли ижтимоий қўл­лаб-қувватлаш маркази» лойи­ҳаси доирасида амалга ошириляпти.

Дастлаб партия фаоллари, маҳаллий Кенгаш депутатлари тумандаги барча қишлоқ фуқаролар йиғинларида бў­либ, оилавий тадбиркорлик билан шуғулланмоқчи бўлган электорат вакилларини аниқлашди. Уларга танлаган соҳалари бўйича мутахассисларнинг услубий ва маслаҳат ёрдамини ташкил этишди. Республика Марказий банки ва унинг вилоятдаги бошқармаси ҳамда тижорат банкларининг филиаллари билан ҳамкорлик ўрнатилди. Тайёрланган истиқболли бизнес режалар асосида уларга кредит маблағлари ажратилди.

Шу куни ЎзХДП Марказий Кенгаши ва Олий Мажлис Қонунчилик палатасидаги фракцияси ҳамкорлигида туманда «Маҳалла — аҳoлини манзилли ижтимoий қўллаб-қувватлаш маркази» мавзусида давра суҳбати ҳам ташкил этилди.

Унда ЎзХДП фракцияси ва Марказий Кенгаши аъзолари, Республика Марказий банки ва қатор тижорат банклари ва­киллари, партия вилоят кенгаши масъул ходимлари ва экспертлари, вилоят Меҳнат ва аҳолини ижтимоий муҳофаза қилиш бош бошқармаси, Молия ва Солиқ бошқармалари, «Маҳалла» хайрия жамоат фонди мутахассислари, маҳаллий Кенгашлардаги ЎзХДП депутатлик гуруҳлари аъзолари, ҳудудий пар­тия ташкилотлари раҳбарлари, маҳалла фуқаролар йиғинлари раислари ва уларнинг маслаҳатчилари ҳамда электорат вакиллари иштирок этди.

Давра суҳбатида Данғара туманининг «Қумойли», «Пиш­қорон», «Тарғова», «Оқжар», «Бо­ғиш», «Таптиқсарой» ва «Каппа сарой» маҳалла фуқаролар йиғинларида ижтимоий ҳимояга муҳтож, боқувчисини йўқотган, жисмоний имконияти чекланган фуқароларга кўрсатилаётган ёрдам, улар учун бюджетдан ажратилаётган ижтимоий нафақаларнинг манзилига етиб бориши, хотин-қизлар бандлигини таъминлаш, касаначилик ва оилавий тадбиркорликни йўлга қўйишларида кўмаклашиш каби масалалар атрофлича таҳлил этилди. Яратилаётган иш ўринларига ёш­лар, айниқса, касб-ҳунар коллежлари битирувчилари мутахассисликлари бўйича иш­га жойлашишида ЎзХДП депутатлик гуруҳлари фаоллигини ошириш лозимлиги таъкидланди.

Бу борада фаол ишлаётган депутатлар тажрибаси ибрат қилиб кўрсатилди. Хусусан, халқ депутатлари Дан­ғара туман Кенгаши депутати Азимжон Исмоилов ташаббуси билан коллеж битирувчиларининг 20 нафари тумандаги мавжуд корхоналарга ишга жойлаштирилган, партия таш­килотлари ва депутатларнинг иш берувчи билан ҳамкорлиги натижасида «Пишқорон» маҳалласидан 47 нафар ки­ши, «Тарғова» маҳалласидан 46 нафар касб-ҳунар коллежлари битирувчилари доимий иш ўр­нига эга бўлди.

Шунингдек, давра суҳба­тида маҳаллалар ҳудудида бўш ётган биноларда сартарошхона, тикувчилик, пойабзал таъмирлаш, телевизор тузатиш устахоналаридан иборат сервис ва хизмат кўр­сатиш шохобчаларини ташкил қилиш таклифи ҳам билдирилди.

Муҳаммаджон ОБИДОВ,

«Ўзбекистон овози» мухбири.



DB query error.
Please try later.