21.02.2013

БАРКАМОЛ АВЛОД — ЮРТ ТАЯНЧИ

Бугун мамлакатимизда болалар спортини ривожлантириш учун мустаҳкам моддий-техник база яратилди. Биргина 2012 йилда шаҳар ҳамда туман-ларимизда 108 та болалар спорти иншоотларининг қуриб битказилгани ва фойдаланишга топширилгани фикримиз далилидир. Бундан кўзланган бош мақсад — аввало жамиятимизда соғлом турмуш тарзини шакллантириш орқали миллат саломатлигини мустаҳкамлашдир.

Болалар спорти оммавийлигини ошириш, фарзандларимизни жисмоний тарбия ва спортга кенг­роқ жалб этиш борасида Ўз­бекистон Республикаси Халқ таълими вазирлиги ҳузуридаги Болалар спортини ривожлантириш жамғармаси Сирдарё вилоят филиали томонидан қатор ишлар амалга оширилмоқда.

— Вилоятимиз шаҳар ва туманларида янги спорт иншоотларини барпо этиш манзилли дастурига мувофиқ тайёрланган намунавий лойиҳалар асосида кўплаб спорт мажмуалари бунёд этилмоқда, — дейди жам­ғарманинг Сирдарё вилоят фили­али ижрочи директори Норбобо ­Соатов. — Жумладан, 2012 йилда жам­ғарма саъй-ҳаракати билан Боёвут, Мирзаобод, Ховос, Сирдарё туманларида бешта янги спорт объекти ишга туширилди ва капитал таъмирланди. Биргина ўтган йилда манзилли дас­тур асосида вилоят ҳудудидаги болалар спорт иншоотларида 1200,0 миллион сўмлик қурилиш-таъмирлаш ишлари бажарилди.

— Спорт мажмуаларини анжом ва ускуналар билан таъминлаш масаласи қандай ҳал этиляпти?

— 2004-2012 йилларда вилоятимизда 71 та спорт иншооти қуриб фойдаланишга топширилган бўлса, шулардан 56 тасининг туман ва қишлоқларимизда барпо этилганлиги, айниқса, қувонарлидир. Мавжуд спорт мажмуаларидан самарали фойдаланиш, уларнинг моддий-техника базасини мустаҳкамлашга алоҳида эътибор қаратиб келинмоқда. Жумладан, ҳозиргача 41 та спорт мажмуасидаги яроқлилик муддати тугаган спорт анжомлари ва ускуналарини янгилаш учун Ўзбекистон Болалар спортини ривожлантириш жам­ғармаси томонидан 206,3 миллион сўм маблағ сарфланди ва йигирма турдаги спорт жиҳозлари билан таъминланди.

— Вилоятдаги мавжуд болалар спорт мажмуаларидан фойдаланиш самарадорлигини ошириш борасида қандай ишлар амалга оширилмоқда?

— Айни пайтда вилоятимиздаги спорт муассасаларида турли спорт турлари бўйича жами 1752 та тўгарак фаолият кўрсатаётган бўлса, уларда 27528 нафар ўқувчи-ёш шуғулланмоқда. Улардан 9929 нафарини қизлар ташкил этади. Бугунги кунда жойларда ҳафтасига икки мартадан спорт мусобақалари уюштириш анъанага айланган. Ўтган йил жам­ғарма саъй-ҳаракати билан вилоятнинг шаҳар ва туманларида жами 845 та спорт мусобақаси ўтказилди, уларда 164381 нафар ўқувчи иштирок этди. Айнан болалар спорт мажмуаларида илк спорт кўникмаларини олган сирдарёлик 79 нафар ёш спортчи спортнинг турли йўналишлари бўйича ўтган йили ўтказилган мамлакат, қитъа ва жаҳон чемпионатларида ғолиб ҳамда сов­риндорлар сафидан жой олди.

Қувонарлиси, кейинги йилларда вилоятимизда Олимпия ўйинлари дастуридан жой олган спорт турларини ривожлантиришга алоҳида эътибор қаратилмоқда. Жумладан, охирги вақт­да бадиий гимнастика, синхрон сузиш, енгил атлетика ва сузиш турларига қизларни кўпроқ жалб этишга алоҳида аҳамия­т бериляпти. Ҳозирги кунда вилоя­тимизда биргина бадиий гимнастика тури бўйича уч мингдан зиёд қиз ўз маҳоратини оширмоқда. Жойлардаги спорт мажмуаларини ушбу спорт тури бўйича малакали мутахассислар билан таъминлаш мақсадида Халқ таълими вазирлиги тасарруфидаги болалар ва ўсмирлар спорт мактаблари, спорт ва педагогика йўналишидаги коллежлар билан доимий алоқаларни йўлга қўйганмиз. Ҳозирда вилоятимизда эллик нафардан зиёд мураббий қизларга бадиий гимнастика сирларини ўргатмоқда. Бунда, айниқса, туман ва қишлоқларимизда фаолият кўрсатаётган аёл мураббий-ўқитувчиларнинг маошига қўшимча устама-ҳақларнинг тўланаётгани мутахассисларимизнинг ўз ишига меҳрини оширмоқда.

Эркин ХОЛБОБО суҳбатлашди.



DB query error.
Please try later.