14.02.2013

КОЛЛЕЖ — КОРХОНА — БАНК ҲАМКОРЛИГИ

касб-ҳунар коллежлари битирувчиларини иш билан таъминлаш самарадорлигини оширади

Президентимиз Вазирлар Маҳкамаси мажли сида қилган маърузасида касб-ҳунар коллежлари битирувчиларини муқим иш билан таъминлаш масаласига алоҳида тўхталиб, ўтган йил юртимизда 450 минг нафардан ортиқ битирув­чи иш билан таъминлангани, уларнинг 43 фоизи ўзлари ишлаб чиқариш амалиётини ўтаган корхо­наларга ишга жойлашганини алоҳида қайд этди.

— Уч томонлама шартнома им­золаниши, битирувчилар учун яратилган шарт-шароитлар, ойлик маошлар ва бошқа ижти­моий мадад хусусида ёшларнинг ота-оналарига етарли маълумот берилиши иш берувчи билан ишга кирувчилар ўртасида мустаҳкам ишончни юзага келти­ради, — дейди Самарқанд вилоят ўрта махсус касб-ҳунар таъ­лими бошқармаси бўлим бошлиғи Маъруф Бобоёров. — Ўтган 2011-2012 ўқув йилида 154 та касб-ҳунар коллежини 102 та мутахас­сислик бўйича 60 минг 856 нафар йигит-қиз битирди. Шундан 30 минг 791 нафари­ни қизлар ташкил этади. Уларни иш билан таъминлашга бевосита кўмаклашадиган кенгаш вилоят ҳокимлиги қошида ташкил этилган.

Талабаларни ўқиш давомида ўзлари амалиёт ўтаган корхоналарга ишга жойлаштириш масаласига алоҳида аҳамият берилаяпти. Чунки амалиёт давомида ёшлар корхона жамоаси, иш тартиби ва бошқа жиҳатларга кўникма ҳосил қилади.

Маълумки, давлатимиз раҳ­барининг бевосита ташаббуси билан касб-ҳунар коллежларини битирган ёшлар учун имтиёзли кредитлар берилиши жорий этилган. Шу мақсадда бош­қарма томонидан бир қатор таш­килотлар билан ҳамкорликда ўтган йили «Энг яхши бизнес ло­йиҳа», «Энг яхши мутахассис» танлови ўтказилди. Нуфузли ҳа­камлар ҳайъати лойиҳалардан 7128 тасига имтиёзли кредит маблағлари ажратилишини белгилади. Лойиҳаларнинг акса­рияти қишлоқ ёшлари томонидан тақдим этилди. Биргина, Нарпай туманида 35 нафар қиз болага тижорат банклари томонидан кредит маблағлари ажра­тилди. Натижада юзлаб қишлоқ қизлари доимий иш ўринларига эга бўлди.

— Касб-ҳунар коллежлари битирувчиларига имтиёзли кредит маблағлари берилиши — бу ёш­ларни кучли ижтимоий ҳимоя қилишнинг ёрқин бир кўриниши, — дейди Ўзбекистон Респуб­ликаси Марказий банки Самарқанд вилоят бош бошқармаси бў­лим бошлиғи Лутфулло Зиёев. — Шу мақсадда ўтган йилда 154 та коллежга тижорат банкларининг масъул мутахассисларини бириктирдик. Улар ёшларга бизнес лойиҳаларни тузиш, ажратилаётган кредитлар ва уларнинг тартиб тамойиллари ҳақида маълумот, йўриқномалар берди. Жорий йилда бу борадаги ишимизни янада жонлантирамиз.

2012 йилда коллеж битирувчи­ларига 4 миллиард сўм имтиёзли кредит ажратилди.

— Битирувчиларга имтиёзли кредит берилишига алоҳида аҳамият қаратиб келмоқдамиз, — дейди «Микрокредитбанк» Самарқанд филиали бўлим бошлиғи Шаҳбоз Музропов. — Имтиёзли микрокредитларимиздан бири бўлган бошланғич сармоя­ни шакллантириш учун бериладиган кредит маблағлари йиллик 3 фоизни ташкил этади. Шунингдек, айланма маблағларни шакллантиришга қаратилган кредитларимиз эса йиллик 6 фоиздан иборат бўлиб, устама қўйиш шарти билан амалга оширилади. Бундай имтиёзли кредит о­лувчи ёшлар учун махсус тартиб ишлаб чиқилган.

— Самарқанд молия-иқтисо­диёт касб-ҳунар коллежини тугатиб, «Ўзсаноатқурилиш» банк­нинг вилоят филиалига бизнес лойиҳамни тақдим этдим. Банк лойиҳамни қўллаб-қувватлади. Натижада 10 миллион сўм миқдорида олинган имтиёзли кредит ҳисобига «Акфа» эшик-ромлар ясашга ихтисослашган цех ташкил қилдим, — дейди Аббос Мўминов. — Ҳозир бу ерда 8 на­фар тенгдошим меҳнат қилаяпти. Келгусида цехни кенгайтириб, кичик корхона ташкил этиш­ни режалаштираяпмиз. Мақсадим амалга ошса, яна 50 та иш ўрни яратилади. Биз ёшлар давлатимиз томонидан яратиб берилаётган имкониятлардан самарали фойдаланиб, ўз мустақил ишимизни йўлга қўйишимиз лозим.

Абдували ХУДОЁРОВ,

«Ўзбекистон овози» мухбири.



DB query error.
Please try later.