05.02.2013

ЧЕТ ТИЛИНИ ЎРГАНИШ — ДАВР ТАЛАБИ

Президентимизнинг «Чет тилларни ўрганиш тизимини янада такомиллаштириш чора-тадбирлари тўғрисида»ги қарорини Қашқадарё вилоятидаги чет тили ўқитувчилари ва чет тилини чуқур ўрганаётган ўқувчи-ёшлар кўтаринки руҳ билан кутиб олди.

Вилоятдаги 1118 та умумтаълим мактабида 2500 нафарга яқин чет тили ўқитувчиси, жумладан, 1600 нафардан зиёд инглиз тили, 600 нафарга яқин немис тили, 200 нафардан ортиқ француз тили ва 7 нафар испан тили ўқитувчиси дарс бермоқда. Улар орасида ўз касбини ардоқлаб ҳамкасбларига намуна бўлаётган тажрибали ўқитувчилар талайгина. Қарши шаҳридаги 29-мактабнинг немис тили  ўқитувчиси Зулфия Қиёмова ана шундай фидойи педагоглардан бири.

У ўқувчиларга сабоқ бериш билан бирга узоқ йиллик меҳнат тажрибасидан келиб чиқиб, немис тилини чуқур ўргатиш бўйича илмий изланишлар олиб бораяпти. «Менинг биринчи немис тили дарсим», «Алифбо», «Немис тили фанидан тестлар тўплами», олий ўқув юрти талабалари учун 4 тилдаги рангли расмли луғатлар ҳамда ўқитувчилар учун «Lehrerhandbuch» услубий қўлланмаси шулар жумласидандир. Зулфия Қиёмова таълим-тарбиядаги намунали хизматлари ва ижодий изланишлари учун «Меҳнат шуҳрати» орденига сазовор бўлган.

— Қарор биз ўқитувчилар зиммасига катта масъулият юклайди, — дейди у. — Бугунги ёшларимиз орасида чет тилини мукаммал биладиганлар, жаҳон адабиёти намуналарини аслиятдан таржима қиладиганлари, ўзлари ҳам инглиз, немис тилларида ижод қилаётганлари кўп. Биз ўқитувчилар бундай ўқувчиларнинг чет тили фанига бўлган қизиқишларини қўллаб-қувватлаб боришимиз керак. 

— Инглиз тилига жуда қизиқаман, — дейди Қарши шаҳридаги 23-мактабнинг 6-синф ўқувчиси Жаҳонгир ­РАВШАНОВ. — Бу тил орқали дунё мамлакатларининг тарихи, маданияти ва санъатини ўрганиш ниятим бор. Она тилидан ташқари, бир-неча тилларни билиш бугунги куннинг талабидир.

Музаффар ТУРОПОВ



DB query error.
Please try later.