29.01.2013

МАҲОРАТ СИНОВИ

Санкт-Петербургда футбол бўйича ўтказилган МДҲ кубоги халқаро турнири ниҳоясига етди. Ўн икки мамлакат ёшлар терма жамоалари ўртасида кечган баҳсларда ҳамюртларимиз ҳам ўз маҳоратларини синовдан ўтказди.

Маълумки, Ўзбекистон (U-20) ёшлар терма жамоаси шу йилнинг 21 июнь — 13 июль кунлари Туркияда бўладиган жаҳон чемпионатида юртимиз шарафини ҳимоя қилади. МДҲ кубоги халқаро турнири ҳам­юрт­ларимиз учун ана шу мусобақага дастлабки тайёргарлик босқичи вазифасини ўтади.

Охирги ўйинда Ўзбекистон ёшлар терма жамоаси тожикистонликлар дарвозасига жавобсиз икки тўп йўллаб, ғалаба қозонди — 2:0. Голларни Владимир Козак ҳамда Аббосбек Махсталиевлар киритди.

  Ўн кун давомида олтита учрашув ўтказилган бўлса, уларда таркибга жалб этилган ҳамма ўйинчиларни майдонга туширдик, — дейди Ўзбекистон ёшлар терма жамоаси бош мураббийи Аҳмаджон Мусаев. — Албатта, бу каби турнирларда барча ғалаба қозонишни истайди. Аммо биз еттинчи ўрин билан кифояландик. Бу жамоамиз аъзолари учун келгусида сабоқ бўлади, деган умиддаман. МДҲ кубоги халқаро турнирида турли ҳудудлар футбол мактаблари вакилларига қарши майдонга чиқдик. Уларда ҳар хил услуб ва тактикаларни қўллаб, жамоавий ўйинларни шакллантиришга интилдик. Келгусида жамоамиз аъзолари билан биргаликда йўл қўйилган хато-камчиликларимиз устида жиддий ишлаб, жаҳон чемпионатида муносиб ўйинлар намойиш этишга ҳаракат қиламиз.

Мусобақа финалида Россия — Украина ёшлар терма жамоалари ўзаро куч синашди. Унда мезбонлар икки тўп фарқи билан рақибларидан устун келди — 4:2. Учинчи ўрин учун кечган баҳсда эса омад Белорусь футболчиларига кулиб боқди. Улар литваликлар дарвозасига жавобсиз икки тўп йўллади — 2:0.

Эслатиб ўтамиз, Ўзбекистон ёшлар терма жамоасининг навбатдаги ўқув-машғулот йиғинлари февралда Туркия, март ойида Марокаш, апрелда Португалияда уюштирилиши режалаштирилган. Мазкур йиғинлар давомида ёшларимизнинг бир қатор халқаро ўртоқлик учрашувларида майдонга тушиши  мўлжалланмоқда.

Эркин ХОЛБОБО,

«Ўзбекистон овози» мухбири.



DB query error.
Please try later.