09.07.2019

ТЕСТ СИНОВЛАРИ ШАФФОФЛИГИНИ ТАЪМИНЛАШ МАҚСАДИДА

1 минг 155 дан ортиқ видеокузатув камераси, 120 дона мобиль алоқаларини тўсувчи қурилма ҳамда бармоқ изи асосида ҳақиқий абитуриентни таниш воситалари тайёрланмоқда

Миллий матбуот марказида Вазирлар Маҳкамаси ҳузуридаги Давлат тест маркази мутасаддилари 2019/2020 ўқув йили учун олий таълим муассасаларига қабул бўйича ўтказиладиган тест синовларига тайёргарлик кўриш жараёни ҳақида журналистларга маълумот берди.

Тадбирда бу йилги тест топшириқларини шакллантириш учун умумтаълим фанлари бўйича 140 нафардан ортиқ эксперт гуруҳлари тузилгани ҳамда жорий йилдаги қабул тест синовлари учун 180 мингдан ортиқ тест топшириқларини шакллантириш режалаштирилаётгани, ушбу топшириқлар ўзбек, рус ва қорақалпоқ тилларида бир хиллиги таъминланиши айтиб ўтилди.

— Жорий йилда намунавий тест топшириқлари 1500 дан ортиқ абитуриент иштирокида синовдан ўтказилди, ишончлилиги, мураккаблик даражасининг тўғри танланганлиги ўрганилди ҳамда 74 мингдан ортиқ тест топшириғи статистик таҳлил қилинди, — дейди Давлат тест маркази директори ўринбосари Қаҳрамон Ҳақбердиев. — Шу билан бирга тест топшириқларининг хато-камчиликлари тузатилди ва айримларига ўзгартиришлар киритилди. Бундан ташқари, бу йилги тест топшириқлари базасини шакллантиришда Туркия, Жанубий Корея, Россия, Япония каби мамлакатлар тажрибалари ўрганилиб, жорий йилдан янгилик киритилди. Жумладан, тест топшириқларида график, ёзувсиз карта, расмлар қўлланилмоқда. Қолаверса, янгилик сифатида яна шуни айтиш мумкинки, фаолиятнинг очиқлигини таъминлаш мақсадида кейинги ўқув йилидан бошлаб Давлат тест марказида мавжуд тест топшириқлари базасини жамоатчилик учун очиб қўйиш режалаштирилмоқда.

Бугунги кунда тест синовларини ўтказиш учун мамлакат бўйича 69 бино танланган. Уларнинг энг каттаси 1710, энг кичиги 240 ўринлидир. Бу биноларда бир кунда 2 сменада 1 минг 277 та гуруҳда, жами 38 минг 310 абитуриент тест топшириши мўлжалланган. Тест синовларининг адолатли ўтишини таъминлаш мақсадида бир кунда 2 минг 554 нафар назоратчи жалб этилиши белгиланган.

– Бу йил абитуриентлардан олинган бармоқ изи орқали тест синовларига бошқа абитуриентларнинг кириши каби қонун бузилишларга барҳам берилади, — дейди Давлат тест маркази бош бошқармаси бошлиғи Барно Ражабов. — Натижада ўз билимига ишониб имтиҳон топшираётган ёшларнинг имконияти янада кенгаяди. Тест синовларини янада шаффофлигини таъминлаш мақсадида, Ахборот технологиялари ва коммуникацияларини ривожлантириш вазирлиги билан ҳамкорликда бинолар учун 1 минг 155 тадан ортиқ видеокузатув камераси, 120 дона мобиль алоқаларини тўсувчи қурилма, бармоқ изи асосида ҳақиқий абитуриентни таниш воситалари тайёрланмоқда.

Шунингдек, Давлат хизматлари агентлигининг марказлари ҳамда Ички ишлар вазирлигининг паспорт-виза маълумотлар базаси билан маълумот алмашиш учун идоралараро маълумотлар алмашиш тармоғи (МСПД)га уланилган. Қолаверса, имтиёзга эга абитуриентлар маълумотлар базасини шакллантириш мақсадида имтиёзли ҳужжат тақдим этувчи ташкилотлар имтиёзга эга абитуриентлар маълумотларини онлайн киритишлари учун махсус дастур ишлаб чиқилган.

Тадбирда мутахассислар томонидан абитуриент ўзининг доимий ёки вақтинча рўйхатда турган жойидан қатъи назар, исталган олий таълим муассасаларида ташкил этилган қабул комиссияларига (Давлат комиссияси томонидан белгиланган Олий таълим муассасалари учун Давлат хизматлари марказларига) мурожаат қилишлари мумкинлиги ҳамда абитуриентлар рўйхатдан ўтганда яшаб турган, вақтинча рўйхатдан ўтган ёки ўша пайтда бўлиб турадиган ҳудудда тест синовларида иштирок этиши мумкинлиги тўғрисида ҳам маълумотлар берилди.

Матбуот анжумани якунида журналистларни қизиқтирган кўплаб саволларга жавоб олинди.

 

Тоштемир ХУДОЙҚУЛОВ,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: