02.07.2019

БУ ЙИЛГИ БАЙРАМ ЎЗГАЧА БЎЛДИ!

Ўзбекистон ХДПнинг барча даражадаги ташкилотлари 30 июнь — «Ёшлар куни» муносабати билан мамлакатимизнинг турли ҳудудларида маънавий-маърифий тадбирлар ўтказмоқда. Жумладан, Фарғона шаҳридаги «Аҳмад Ал-Фарғоний» номидаги оромгоҳда ташкил этилган фестиваль ҳам йигит-қизлар учун чинакам байрамга айланди.

— Бундай фестивалда илк бор иштирок этишим, — дейди биз билан суҳбатда Бобуржон Умаралиев. — Ўтган йили ёшлар куни муносабати билан ташкил этилган байрамларни уйда телевидение орқали томоша қилиб, тенгдошларим ёнида бўлишни орзу қилгандим. Ниятимга етдим. Бундан жуда хурсандман.

— Ҳар бир йигит-қизнинг тақдири, ўй-фикрлари билан қизиқишимиз, уларни ўйлантираётган масалалар ечимида кўмакдош бўлишимиз керак, — дейди Ўзбекистон ХДП Фарғона вилоят кенгаши раиси, халқ депутатлари вилоят Кенгашидаги партия гуруҳи раҳбари Дилбархон Мамаджанова. — Бугунги фестивал доирасида ҳам шунга алоҳида эътибор қаратдик. Айниқса, таниқли хонандалар, ёш спортчилар, эл суйган санъаткорлар иштирокидаги концерт дастури иштирокчиларнинг кайфиятини кўтарди.

Ўзбекистон ХДП Тошкент шаҳар кенгаши «Ёшлар куни» муносабати билан ногиронлиги бўлган ёшлар ҳолидан хабар олди. Улар билан самимий суҳбатлашиб, яқин орада фаол ёшлар сафидан жой олишларини тилади.

— Бугун тенгдошларим, партия вакиллари уйимизга мени йўқлаб келибди, — деди биринчи гуруҳ ногирони Маҳбуба Эгамбердиева. — Улар менга китоблар совға қилишди, ҳатто уйимизга тез-тез келиб, бу китобларни биргаликда ўқишимизни айтишди. Кайфиятим кўтарилди. Фурсатдан фойдаланиб, юртимиздаги барча ёшларни байрам билан табриклайман.

— 20 минг нафардан ортиқ йигит-қиз партиямиз сафига қўшилган, — дейди Тошкент шаҳар партия кенгаши раиси Ҳайдар Бобохонов. — Шундан 12 фоизи тиббиёт, 14 фоизи ишлаб чиқариш, 27 фоизи таълим, 7 фоизи тадбиркорлик, қолган 40 фоизи эса бошқа соҳаларда фаолият олиб бормоқда. Шунингдек, партиядошларимиз орасида фан номзодлари, турли даражадаги давлат мукофоти совриндорлари билан бир қаторда имконияти чекланган, ногиронлиги бўлган ёшлар ҳам бор. Ана шундай ёшларнинг 54 нафари бугунги кунда «Истиқбол» ёшлар қаноти етакчиси ҳисобланади. Улар бугунги кунда жойлардаги тарғибот тадбирларида жуда фаол.

— Ҳақиқатан ҳам шундай, — дейди Тошкент шаҳар партия кенгаши сектор мудири Нодира Ғафурова. — Жорий йилда сектор томонидан 32 та тадбир ўтказилган бўлса, шундан 19 таси ёшларнинг ташаббуси билан ташкил этилган. Шуни алоҳида таъкидлаш керакки, мазкур йўналишда «Ёшлар-ёшларга» усули ўз самарасини бермоқда.

Хабарингиз бор, май-июнь ойи давомида «Ёшлар-келажагимиз» шиори остида форум бўлиб ўтди. Биз бунда эътиборни жамиятда ўз ўрни ва овозига эга бўлган таниқли ёшларга эмас, балки ўз ғояси бўлишига қарамай, уни амалга оширишга киришган йигит-қизларга қаратдик. Натижа кўнгилдагидек. 25 нафар форум иштирокчисининг ҳар бири билан алоҳида иш олиб боряпмиз. Лойиҳаларини амалга ошириш бўйича тегишли ташкилотларга мурожаат ҳам қилганмиз. Айтиш керакки, ёшлар масаласи бир кунлик, ёки бир кишига тегишли эмас. У давлат ва жамиятнинг доимий эътиборида бўлиши зарур.

Тадбир давомида фаол ёшларга партиянинг эсдалик совғалари топширилди. Тадбирлар давом этмоқда.


Фикр ва мулохазалар

Защита от автоматических сообщений

Сўнгги янгиликлар: