11.06.2019

БЕШ ТАШАББУС БЎЙИЧА ФОРУМ

Гулҳаё ва Маҳлиё Комилжоновалар саҳнага чиқиб, ўз маҳоратини тенгдошларига намойиш этишни, устозларидан ўрганган рақс ва халфачиликнинг нозик сир-асрорларини қалб туғёнига қўшиб ижро этишни кўпдан буён ният қилган эди. Бугун икки қизнинг шу орзуси амалга ошадиган бўлди.

— Хива шаҳрида ташкил этилган форумда иштирок этаётганимдан жуда хурсандман, — дейди биз билан суҳбатда Урганч шаҳар 93-сонли ихтисослаштирилган мактаб-интернати ўқувчиси Гулҳаё Комилжонова. — Бизга имкон бераётганларга раҳмат айтаман.

Ўзбекистон ХДП Хоразм вилоят кенгаши томонидан «Эзгу ғоядан — эзгу мақсад сари!» шиори остида ўтказилган «Беш ташаббус — беш имкон!» номли 5 йўналишни ўз ичига олган ёшлар форуми Гулҳаё ва Маҳлиёга ўхшаган истеъдодли ёшлар учун яна бир имконият эшигини очиб берди.

Маълумки, жорий йилнинг 19 март куни ёшларга эътиборни кучайтириш, уларни маданият, санъат, жисмоний тарбия ва спортга кенг жалб этиш, уларга ахборот технологияларидан фойдаланиш кўникмаларини сингдириш, ёшлар ўртасида китобхонликни тарғиб қилиш ҳамда хотин-қизлар бандлигини ошириш масалаларига бағишланган видеоселектор йиғилиши ўтказилганди. Унда Президентимиз ижтимоий, маънавий-маърифий соҳалардаги ишларни янги тизим асосида йўлга қўйиш бўйича 5 та муҳим ташаббусни илгари сурганди. Мазкур форум ана шу ташаббуслар тарғиботини кучайтириш мақсадида ўтказилди.

— Бизда қобилиятли йигит-қизлар жуда кўп, — дейди Ўзбекистон ХДП Хоразм вилоят кенгаши раиси, халқ депутатлари вилоят Кенгашидаги ЎзХДП гуруҳи раҳбари Раҳимберган Юсупов. — Уларга имкон берилса бўлди. Ўз билим ва санъати, кучи ҳамда ақли билан дунёни лол этади. Бу йўлда биз уларга тиргак, ёрдамчи бўлсак бас. Бугунги тадбирда ҳам асосий эътибор шунга қаратилди. Зеро, эзгу ғоялар ва яратувчанлик руҳияти билан ёшларни бир мақсад атрофида жамлаш орқали уларни ватанпарварлик руҳида тарбиялаш, қалбларда юрт тақдирига дахлдорлик ҳиссини ошириш, мафкуравий иммунитетни кучайтириш партиямизнинг асосий мақсадларидан бири ҳисобланади.

Тадбир давомида Урганч шаҳар 93-сонли ихтисослаштирилган мактаб-интернатининг имконияти чекланган ўқувчилари томонидан ижодий ишлар кўргазмаси ташкил қилинди. Унда моҳирлик ва нозик дид билан тўқилган буюмлар, мунчоқлардан ясалган гуллар намойиш этилди ва иштирокчилар олқишига сазовор бўлди.

Шахмат ва шашка бўйича ўтказилган мусобақада ўнлаб ёшларнинг иштирок этиши бу спорт турининг нечоғли оммалашганидан далолат бериб турди. Шашка мусобақасида Янгибозор туманидан Жасур Исмоилов, Урганч шаҳридан Одилбек Маткаримов, Гурлан туманидан Озода Раҳмонова юқори ўринларни эгаллади. Шахматда эса Хива шаҳридан Гулсевар Отабаева, Хива туманидан Аброрбек Арслонов, Бекчанбой Ғоибназаров пешқадам бўлишди.

Форумда иштирок этган стол тенниси бўйича Ўзбекистон чемпиони Мафтуна Абдуллаева болаларга маҳорат дарси ўтди ҳамда ўз таассуротлари билан ўртоқлашди.

— Форум юқори шукуҳда, ўзгача кайфиятда ўтмоқда, — дейди у. — Болаларнинг хурсандлигини айтмайсизми? Мана шундай кўтаринки тадбирлар ёшларнинг янада юксак марраларни эгаллашига асос бўлиб хизмат қилади.

Ёшлар маънавиятини юксалтириш, улар ўртасида китобхонликни кенг тарғиб қилиш мақсадида «Китоблар ярмаркаси» ҳам ташкил қилинди. Шу хусусда форум қатнашчиси Ойжон Каримова ўз фикрларини билдирди.

— Китоб ўқишни жуда яхши кўраман, — дейди у. — Ёшларни китоб ўқишга қизиқтириш, улар орасида маънавий муҳитни янада яхшилашда китоб ярмаркаларининг аҳамияти катта. Бугун мўъжаз кутубхонам учун янги нашр этилган асарлардан харид қилдим. Оила аъзоларим учун ҳам совға олишни ўйлаганман.

 Форум давомида Хоразм вилоят Бандлик бош бошқармаси билан ҳамкорликда «Меҳнат ярмаркаси» ҳам ташкил этилди. Ярмарка давомида 13 та мурожаат бўлиб, уларнинг 3 нафарига шу куннинг ўзида мактабгача таълим муассасасига ишга қабул қилиш бўйича йўлланмалар берилди.

— Тадбирнинг Хива шаҳри марказида жойлашган «Нуруллабой» истироҳат боғида ўтказилиши катта аҳамиятга эга бўлди, дейди Раҳимберган Юсупов.

Тадбир якунида фаол иштирокчиларга партиянинг фахрий ёрлиқ ва эсдалик совғалари тақдим этилди.

Ўзбекистон ХДП Бухоро вилоят кенгаши ҳам Бухоро шаҳридаги Ёшлар марказида бешта муҳим ташаббус ижросига бағишланган ёшлар форуми ўтказди.

Биринчи йўналиш бўйича «Истеъдод» шоуси ташкил этилди. Унда ёшлар қизиққан йўналишларида истеъдодларини намойиш қилди.

Шунингдек, форум доирасида имконияти чекланган болаларнинг ижодий ишлари кўргазмаси ташкил этилди. Кўргазмада иштирок этган ҳар бир ёшга партия ташаккурномаси ва эсдалик совғалари топширилди.

Иккинчи йўналиш бўйича олий ўқув юртлари ҳамда маҳалла ёшлари иштирокида фавворалар хиёбонида «Ореn аir» веломарафони, ногиронлиги бўлган ёшлар ўртасида эса «Умид йўлаги» номли спорт мусобақаси ҳам ўтказилди. Хотира турнири, енгил атлетика, якка курашлар ва миллий спорт турлари бўйича мусобақалар иштирокчиларда катта қизиқиш уйғотди. Мусобақа ғолиблари Ўзбекистон ХДП Бухоро вилоят кенгаши, ҳамкор ташкилотлар томонидан диплом ва эсдалик совғалари билан такдирланди.

— Тадбирда қатнашганимдан хурсандман, — дейди «Умид йўлаги» спорт мусобақаси қатнашчиси, I-гуруҳ ногирони Ўлмас Яҳёев. — Мусобақа ҳақида эшитиб, Олот туманидан етиб келдим. Янги дўстлар орттирдим. Тенгдошларимнинг спортда эришаётган ютуқларини кўриб қувондим. Мен ҳам келажакда паралимпиячилар сафида катта мусобақаларда қатнашмоқчиман.

Аҳоли ва ёшларнинг компьютер технологиялари ва интернетдан самарали фойдаланиши учун «WiFi хона»лар ташкил этилди.

Тўртинчи йўналиш бўйича Ўзбекистон ХДП Бухоро вилоят кенгаши биносида «ВООК RООМ» китоб жавонлари, махсус кўчма кутубхоналар ташкил этилди. Вилоятнинг чекка ҳудудларида китобхонлик кечалари ўтказилишига келишиб олинди. Китобхонлик кечаларида таниқли ёзувчилар, шоирлар, актёрлар иштирокида бадиий чиқишлар қилинадиган бўлди. Ёшлар орасида ўқиган китоблари бўйича «Билимдон» танлови ўтказилди.

Форум доирасида вилоят бандликка кўмаклашиш марказлари билан ҳамкорликда меҳнат ярмаркаси ташкил этилди. Унда ташкилотлар ўзларининг бўш иш ўринлари билан иштирок этди. Шунингдек, тадбиркорликни бошлаш ниятида бўлган хотин-қизларга дастлабки бизнес-лойиҳаларини ишлаб чиқишда кўмаклашилди. Чеварчилик, пазандачилик, сартарошлик бўйича ўқув курслари, ўқув ишлаб чиқариш мажмуалари билан ҳамкорлик алоқалари ўрнатилди. Шу йўналишлар бўйича касб-ҳунар эгаллашни истаган хотин-қизлар аниқланиб, уларга ушбу ўқув курсларида ўқишга йўлланмалар берилди.

 

Умурбек БЕКТЕМИРОВ,

Ўзбекистон ХДП Марказий Кенгаши сектор мудири.


Фикр ва мулохазалар

Защита от автоматических сообщений

Сўнгги янгиликлар: