04.06.2019

«БОЛАЛАРГА БЕРИНГ ДУНЁНИ»

Ўзбекистон ХДП Марказий Кенгаши шу шиор остида байрам тадбири ўтказди

Пойтахтимиздаги «Ашхобод» сайлгоҳи ҳар қачонгидан ҳам гавжум. Қўлида шар ва музқаймоқ тутган болажонларнинг кўзлари порламоқда.

Ёзнинг илк кунини барча интиқиб кутади. Истироҳат боғлари эса болаларнинг табассумлари билан гўёки мўъжизалар дунёсига айланади.

Ўзбекистон ХДП Марказий Кенгаши томонидан ташкил этилган тадбир ҳам пойтахт туманларидан келган ногиронлиги бўлган болалар, эҳтиёжманд оилалар фарзандларига қувонч улашди.

ЎзХДП Марказий Кенгаш раиси ўринбосари Меҳрожиддин Дархонов сайлгоҳдагиларни халқаро болаларни ҳимоя қилиш куни билан табриклади.

Шундан сўнг тадбирнинг бадиий қисми бошланди. Унда болажонлар учун байрамона дастур намойиш қилинди. Республика Қўғирчоқ театри жамоаси ижросида «Мақтанчоқ қуён», «Дангаса бола», «Китоб — яхшиликка етаклар» номли қизиқарли кўнгилочар саҳна кўринишлари тақдим этилди. Эл суйган эстрада хонандалари томонидан куйланган қўшиқлар иштирокчиларга кўтаринки ва байрамона кайфият улашди. Концерт дастури давомида болалар иштирокида ноанъанавий шоу ўтказилди. Яъни, кўй-қўшиққа қизиқадиган болаларга иқтидорларини намойиш этиш учун имконият яратилди.

— Бу тадбирда иштирок этиш учун қизим билан Юнусобод туманидан келдик, — деди тадбир иштирокчиси Гавҳар Зияева. — Қизим аслида эгизак фарзандларимдан бири. Улар Ҳасан ва Зуҳра. Кўп қаватли уйларда яшаймиз, уларни ҳар куни ҳам сайр қилдиришга имкон бўлмайди. Ўзбекистон ХДП вакиллари уйимизга бориб, байрамга таклиф этишганида болам жуда қувонди. Сайлгоҳга келиб кайфиятимиз кўтарилди. Қизимга қўғирчоқ театрининг саҳна чиқишлари, эстрада хонандаларининг куй-қўшиқлари манзур бўлди.

— Биласизми, аслида инсонга кўп нарса керак эмас, — деди тадбир иштирокчиси Ойдин Абдуқодирова. — Озгина эътибор ҳам одамни бахтиёр қилади. Тақдир тақозоси билан ўғлим Умиджон Ахроров ногирон ҳолда туғилди. Бошқа болаларни кўриб, кўнгли ўксимаслиги учун барча шароитларни яратиб беришга ҳаракат қилиб келаман. Ўзбекистон ХДП томонидан ташкил этилган байрам тадбирига фарзандим каби ногиронлиги бўлган болалар таклиф этилиши муборак Рамазон кунларидаги савоб иш, деб биламан. Ўғлимни қувончи чексиз.

Тадбир сўнггида Ўзбекистон ХДП Марказий Кенгаши томонидан болажонларга совғалар улашилди.

Жиззах вилоят партия кенгаши томонидан ташкил этилган тадбир ҳам кўтаринки руҳда ўтди. Турли аттракционлардан бепул фойдаланиши учун болаларга йўлланмалар берилди.

Ҳудудларда байрам тадбирлари давом этмоқда.

 

Улуғбек РАҲМОНОВ,

Ўзбекистон ХДП Марказий Кенгаши Ахборот хизмати раҳбари.


Фикр ва мулохазалар

Защита от автоматических сообщений

Сўнгги янгиликлар: