04.06.2019

НАВБАТДАН ТАШҚАРИ ПЛЕНУМ

Пленумда Ўзбекистон ХДП Марказий Кенгаши ва Олий Мажлис Қонунчилик палатасидаги партия фракцияси аъзолари, ҳудудий партия ташкилотлари раҳбарлари, маҳаллий Кенгашлар депутатлари иштирок этди.

Даставвал, Президентимизнинг Талабалар шаҳарчасида ўтказилган йиғилишдаги «Инновацион ғояларни илм-фан ва саноатга кенг татбиқ этиш — ислоҳотлар самарадорлигининг бош мезони» номли маърузасидан келиб чиқадиган, партия ташкилотлари ва депутатлик бирлашмалари олдида турган устувор вазифалар муҳокама этилди.

Давлатнинг иқтисодий салоҳиятини мустаҳкамлаш илғор илмий ишланмалар ва илмий-техникавий тараққиётнинг сўнгги ютуқларини амалиётга самарали жорий этиш билан бевосита боғлиқ. Шу маънода илм-фан мамлакат тараққиёти ва фаровонлигининг асосидир. Айниқса, барча соҳада янгиликларга интилиш ҳамда рақобат кучайиб бораётган бугунги давр иқтисодий салоҳиятни мустаҳкамлаб бориш учун илғор илмий ишланмалар ва техникавий ютуқлардан самарали фойдаланишни талаб этмоқда.

Кун тартибидаги биринчи масала юзасидан пленум аъзоларининг фикр-мулоҳазалари тингланди ҳамда тегишли таклифлар олинди. Улар асосида чора-тадбирлар режаси ишлаб чиқилишига келишиб олинди.

Шунингдек, Пленумда ташкилий масала ҳам кўриб чиқилди. Бугунги кунгача Ўзбекистон Халқ демократик партияси Марказий Кенгаши раиси лавозимида ишлаб келаётган Ҳотамжон Кетмонов бошқа ишга ўтганлиги боис, ўз хоҳишига кўра партия етакчилигидан озод этилишини сўраб пленум аъзоларига мурожаат этди ва унинг аризаси қаноатлантирилди.

Пленумда Ўзбекистон Халқ демократик партияси Марказий Кенгаши Ижроия қўмитаси аъзолари, жойлардаги партия вакилларининг таклифига асосан Ўзбекистон Халқ демократик партияси Марказий Кенгаши раиси вазифасига Улуғбек Иноятов номзоди тавсия этилди. Пленум аъзолари бу таклифни бир овоздан қўллаб-қувватлади.

Улуғбек Иноятов Ўзбекистон Халқ демократик партияси Марказий Кенгаши раиси этиб сайланди.

Улуғбек Иноятов 1962 йилда Тошкент шаҳрида туғилган. Миллати — ўзбек. Маълумоти — олий, педагогика фанлари доктори. 1985 йилда Тошкент политехника институтини, 1998 йилда Тошкент молия институтини тамомлаган.

Меҳнат фаолиятини 1985 йилда Тошкент политехника институти ассистенти вазифасидан бошлаган. 1989-1993 йилларда мазкур институтда аспирантурада таҳсил олган.

1993-1999 йилларда Тошкент архитектура қурилиш институти иқтисодиёт факультети декани ўринбосари, декани, ўриндошлик асосида иқтисодиёт ва менежмент кафедраси доценти бўлиб фаолият юритган.

1999-2003 йилларда Тошкент молия ва иқтисодиёт коллежи директори вазифасида меҳнат қилган.

2003-2006 йилларда Ўзбекистон Республикаси Президентининг Фан, таълим, соғлиқни сақлаш ва спортни ривожлантириш масалалари бўйича Давлат маслаҳатчиси хизмати Таълим ва кадрлар тайёрлаш миллий дастурини амалга ошириш бўйича гуруҳининг бош консультанти лавозимида фаолият юритган.

2006-2011 йилларда Тошкент молия ва иқтисодиёт коллежи директори, 2011-2013 йилларда Тошкент давлат педагогика университети ректори, 2013-2018 йилларда Ўзбекистон Республикаси Халқ таълими вазири бўлган.

2018-2019 йилларда Наманган давлат университети ректори лавозимида меҳнат қилган.

2006 йил «Шуҳрат» медали билан тақдирланган.

Оилали, икки нафар фарзанди бор.

 

Ўзбекистон ХДП Марказий Кенгаши

Ахборот хизмати.


Фикр ва мулохазалар

Защита от автоматических сообщений

Сўнгги янгиликлар: