Охирги сонда



Кўп ўқилган мақолалар



Долзарб мавзу



Мақолалар архиви

«    Sentabr 2019   
Du Se Cho Pa Ju Sha Ya
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6
28.05.2019

АГАР 2005 ЙИЛДАН КЕЙИН ИШ ФАОЛИЯТИНИ БОШЛАГАН БЎЛСАНГИЗ...

пенсия ёшига етганингизда сиздан ҳеч қандай ҳужжат талаб қилинмайди

Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси томонидан фуқароларга давлат хизматларини кўрсатишда яратилган ҳамда жорий қилинган интерактив хизматларга бағишлаб матбуот анжумани ўтказилди.

Унда тизимда жорий этилган ҳамда режалаштирилган интерактив хизматлар хусусида маълумот берилди. Хусусан, 2011 йилдан буён фойдаланилаётган ҳамда такомиллашиб бораётган хизматлардан бири — «Пенсия» электрон дастурий мажмуаси 3,5 миллиондан ортиқ пенсия ва нафақа олувчилар тўғрисидаги маълумотларни ўз ичига олувчи ягона база ҳисобланади. Дастурда пенсия ва нафақалар тайинлашдан тортиб, тўлангунга қадар жараёнлар электрон тарзда олиб борилади. Бу барча турдаги ҳисоботларни автоматик тарзда шакллантириш имконини беради.

— Замонавий технологияларни соҳага жорий қилиниши, тизимда инсон омилини минималлаштириш, шаффофликни таъминлаш, ортиқча вақт сарфи ҳамда пенсия ва нафақа олувчиларнинг оворагарчиликларини камайтиради, — дейди Молия вазирлиги ҳузуридаги бюджетдан ташқари Пенсия жамғармаси ижрочи директори ўринбосари Шуҳратжон Давронов. — Хусусан, Халқ банки билан пенсия ва нафақа олувчиларнинг тўлов қайдномаларини юбориш, тўланган ва тўланмаган пенсия ёки нафақалар тўғрисида маълумот алмашиш фақат электрон шаклда амалга оширилмоқда. Бунинг натижасида тўлов қайдномалари сохталаштирилишининг олди олиниб, пенсия ва нафақа тўловлари устидан кунлик назорат юритилмоқда. Шу билан бирга барча тижорат банклари билан банк пластик карталари орқали пенсия ва нафақа олувчилар маблағларини уларнинг ҳисобрақамига юклаш бўйича электрон ахборот алмашинуви йўлга қўйилди. Бу орқали қоғоз шаклида тўлов қайдномаларидан тўлиқ воз кечилиб, нақд пулсиз пенсия ва нафақа олувчиларга маблағлар ойнинг 2-5 санасига қадар тўланмоқда.

Бундан ташқари, амалиётга жорий қилинган «SMS-pensiya» хизмати орқали фуқароларга уларнинг пенсия миқдорлари, Халқ банки орқали тўлов амалга оширилгани ёки банк карталарига пенсиялар юклангани тўғрисида СМС хабарларни олиш имконияти яратилди. Бугунги кунда жами пенсия ва нафақа олувчи 54 фоиз фуқаро мазкур хизматдан фойдаланмоқда. Шунингдек, авваллари пенсия тўлови амалга оширишлари учун фуқаролар корхоналарга ёки Пенсия жамғармаси бўлимларига келиб, қоғоз шаклида талабнома ва ҳисоботларни тақдим этиши керак эди. Бугунги кунда эса ҳисоботлар қисқартирилган. Энди биргина талабнома тақдим этиш етарли. Электрон шаклда масофадан туриб ҳужжат тақдим этиш имконияти ҳам бор. Корхоналарга қулайлик яратиш мақсадида эса ушбу талабномани корхоналарнинг давлат солиқ қўмитасидаги «Шахсий кабинети» орқали юбориш имконияти йўлга қўйилган. Бунинг натижасида ҳар ойда 27 мингдан ортиқ корхона томонидан 150 мингдан ортиқ ишловчи фуқарога пенсия ва нафақа тўлови учун талабномаларни электрон шаклда тақдим этилишига эришилди.

— Фуқароларнинг архив идораларидан ҳужжатни олишдаги муаммоларини бартараф этиш, табиий офат, ёнғин ёки бошқа ҳолатлар натижасида ҳужжатлар йўқотилиши ҳолатларининг олдини олиш мақсадида Пенсия жамғармаси Давлат солиқ қўмитаси билан ҳамкорликда фуқароларнинг иш ҳақларини индивидуал ҳисобини юритиш борасида электрон тизими жорий қилинди, — дейди Пенсия жамғармасининг пенсияни ҳисоблаш услубиётини мувофиқлаштириш ва фуқароларнинг мурожаатларини кўриб чиқиш бўлими бошлиғи Шуҳрат Утаганов. — Бу тажриба 2015 йилда синовдан ўтказилиб, 2016 йилдан бошлаб бутун республика бўйича амалиётда қўлланилмоқда. Шунингдек, иш ҳақи тўғрисида архив маълумотлари мавжуд бўлмаганда, иш ҳақи миқдорини 2005 йилдан кейинги давр учун жамғариб бориладиган пенсия тизими (ИНПС)га тўланган бадаллар асосида олиш имконияти яратилди. Янада аниқроқ айтадиган бўлсак, 2005 йилдан кейинги иш фаолиятини бошлаган фуқаролар пенсия ёшига етганларида улардан ҳеч қандай ҳужжат талаб қилинмайди.

Яна шуни айтиш мумкинки, амалдаги тартибга асосан пенсионерни ишга қабул қилганда корхона раҳбари 5 кун ичида Пенсия жамғармасига буйруқ нусхасини тақдим этиши ва иш жойидан пенсия тўловини амалга ошириши лозим эди. 2019 йил сентябрь ойидан бошлаб, пенсионерни ишга қабул қилганлиги тўғрисидаги буйруқни жамғармага фақат электрон шаклда юбориш имконияти яратилади. Бу орқали, қоғоз шаклида маълумот алмашинувидан буткул воз кечилади.

Тадбир сўнгида ҳар бир пенсия ва нафақа олувчи фуқарога ID-card берилиши режалаштирилаётгани, бу карта пенсия гувоҳномаси ўрнида ҳам ўтиши ҳамда пенсияларини олиш вақтида паспорт ўрнига шахсини тасдиқловчи хужжат ҳисобланиши мумкинлиги таъкидланди. Шунингдек, бугунги кунда метрополитен, авиа ва темир йўллари чипталарини сотиб олишда ҳам ундан бемалол фойдаланиш мумкинлиги маълум қилинди.

 

Тоштемир ХУДОЙҚУЛОВ,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: