14.05.2019

ХАЛҚИМИЗ ҚАҲРАМОНЛАРНИ УНУТМАЙДИ

Баҳром ОБИДЖОНОВ, Олий Мажлис Қонунчилик палатасидаги Ўзбекистон ХДП фракцияси аъзоси:

Ёдга олиш, эслаш, эъзозлаш халқимизнинг юксак қадриятларидандир. Айниқса, Ватан ҳимояси, эл-юрт тинчлиги йўлида қурбон бўлганларни хотирлаш, уларнинг оила аъзолари, яқинларига ҳурмат кўрсатиш анъанага айланган. Яхши инсонлар, айниқса, тинчлик йўлида қурбон бўлган қаҳрамонлар хотирланар экан, демак, уларнинг ўзи ҳам барҳаётдир. Тинчликни асраш йўлида азиз жонини қурбон қилган мард ўғлонларнинг хотирасини ёд этиш, фронт ортида самарали меҳнат қилиб, нафақага чиққан фахрийларни эъзозлаш муқаддас бурч саналади.

Истиқлол йилларида Иккинчи жаҳон урушида ҳалок бўлган минглаб юртдошларимиз хотирасини ёд этиш, оловли жанггоҳлардан омон қайтган боболаримизга, фронт ортида оғир кунларни сабр-бардош билан енгган, машаққатли синовларда ўзлигини йўқотмаган, иймони бутун аждодларимизга меҳр-оқибат кўрсатиш том маънода миллий анъанага айланди.

Шу нуқтаи назардан, Президентимизнинг Иккинчи жаҳон уруши қатнашчиларини рағбатлантириш тўғрисидаги фармони ҳамда Хотира ва қадрлаш кунига тайёргарлик кўриш ва уни ўтказиш чора-тадбирлари тўғрисидаги қарори муҳим аҳамият касб этади.

Иккинчи жаҳон урушида қатнашган 1,5 миллиондан ортиқ ўзбекистонликларнинг ярим миллиондан зиёди ҳалок бўлганини халқимиз ҳеч қачон ёдидан чиқармайди. Ўша йилларда олижаноб ва меҳр-мурувватли аждодларимиз уруш кетаётган ҳудудлардан Ўзбекистонга кўчирилган бир миллионга яқин оила ва болаларни қабул қилиб, охирги бир бурда нонини ҳам улар билан баҳам кўрган. Бу эса, чинакам жасорат ва одамийлик намунасидир.

Иккинчи жаҳон уруши ва фронт ортида меҳнат қилган фахрийларга, хизмат бурчини бажариш чоғида ҳалок бўлган ҳарбий хизматчилар ҳамда ҳуқуқни муҳофаза қилиш органлари ходимларининг оила аъзоларига моддий-маънавий ёрдам кўрсатилмоқда.

9 майХотира ва қадрлаш куни Иккинчи жаҳон урушининг аянчли оқибатларини унутмасликка, тинч-осуда ҳаётнинг қадрига етишга, Ватанга садоқат ҳисси билан яшашга, шунингдек, доимо огоҳ ва ҳушёр бўлишга, ёшларни тарихий хотирага садоқат руҳида тарбиялашга хизмат қилиб келмоқда. Айни пайтда урушнинг тирик афсонаси бўлган ва йил сайин сафи камайиб бораётган нуронийлар ғамхўрликлардан бениҳоят хурсанд бўлишмоқда.

Халқимиз ўз қаҳрамонларини асло унутмайди. Уларнинг порлоқ хотираси бизнинг қалбимизда абадий сақланади. Тирикларни қадрлаш, уларга меҳр ва эътибор кўрсатиш эса чин инсоний фазилатдир.

Президентимизнинг Хотира ва қадрлаш кунига бағишланган тантанали маросимдаги нутқини қайта-қайта ўқиб бу ҳақиқатни янада чуқур англадик.



DB query error.
Please try later.