07.05.2019

ҲАМКОРЛИК ВА ТАШАББУС ЎЗ САМАРАСИНИ БЕРМОҚДА

Бухорога хизмат сафаримиз чоғида биринчи борган манзилимиз Бухоро шаҳридаги 19-сон давлат ихтисослаштирилган умумтаълим мактаби бўлди. У ерда ўқувчиларнинг бўш вақтини мазмунли ўтказиш, ўғил-қизларни тўгаракларга жалб қилиш юзасидан олиб борилаётган ишлар билан танишдик. Спорт залига кирганимизда бир гуруҳ ўғил болаларга улардан ёши каттароқ қиз машғулот ўтказаётганини кўрдик.

 

— Мен 8-синфда ўқийман, — дейди Шакира Муродова. — Енгил атлетика ва қўл жанги билан шуғулланаман. Бу спорт турлари менга жуда ҳам ёқади. Ҳозир эса устозларимга 6-синф ўқувчиларига машқ ўтишда ёрдамлашяпман. Бошқа тенгдошларим вилоятимиз марказида ўтказилаётган мусобақада қатнашиш учун кетишди. Спорт билан шуғулланганимда хаёлим фақат шу машғулотлар билан банд бўлади. Муҳими, синфдошларим орасида тортишувлар, келишмовчиликлар ҳақида ўйламайман. Аслида унчалик ёмон қизмасман. Фақат синфдош қизлар билан келиша олмайман. Ўғил болалардан эса узоқроқ юришга ҳаракат қиламан. Масалан, доскани артмоқчи бўлсам, кеч қолдинг, биз артиб қўйдик, дейишади ёки яна бошқа майда-чуйдалар сабаб тортишиб қоламиз. Шунинг учун улар орасида яқин дугоналарим йўқ. Сирдош дўстларим бошқа мактабда ўқишади. Оддий нарсаларга ҳам тез таъсирланиб кетаман.

Айни пайтда холамлар билан бирга яшаяпман. Онам мени ёлғиз ўзи тарбияларди. Унинг вафотидан кейин тушкунликка тушиб қолдим. Холамга раҳмат, ўз бағрига олди. Фарзандларидан кам қилмай тарбиялайди, мазали овқатлар, озода кийимлар билан таъминлайди. Аслида уларнинг меҳри туфайли ҳаётимда янги мазмун пайдо бўлди. Спортдаги ютуқларим билан янги оиламни, устозларимни хурсанд қилишни истайман. Орзуим келажакда Миллий гвардия сафида хизмат қилиш.

Маълум бўлишича, Шакира тарбияси оғир болалардан бўлиб, унинг шўхликлари чегара билмасди. Мактаб психологи ҳамда педагоглар маслаҳатлашган ҳолда уни махсус синфга ўтказишган. Эрталаб соат 8 дан 17 га қадар у мактабда бўлади. Чуқурлаштирилган дарслар, тушдан кейинги спорт машғулотлари уни бўш қолишига имкон бермайди. Доимий кузатув ва тўғри ёндашув асосида қизнинг нотўғри йўлга кириб қолишининг олди олинди. Ҳозирда Шакиранинг ўй-хаёли кўпроқ ғалабага эришиш, ўзини яхши томондан атрофдагиларга намоён қилиш билан банд экан.

У ердан чиқиб, иккинчи қаватда жойлашган фаоллар залига кирдик. Биринчи ва иккинчи қаватда ўқувчиларнинг меҳнат ва расм дарслари ҳамда тўгаракларда ўз қўллари билан яратган санъат асари намуналаридан иборат кўргазманинг гувоҳи бўлдик. Фаоллар залида эса Ўзбекистон халқ шоири, эл ардоғидаги марҳум ижодкор Муҳаммад Юсуф таваллуд куни муносабати билан ташкил этилган маданий-маърифий тадбир бўлаётган экан. Вилоятнинг нуфузли ташкилотлари вакиллари, шоир-ёзувчилари ўқувчиларга бу дунёда яхши ном қолдириш, ватанпарварлик, халқпарварлик нақадар муҳим фазилатлар эканини тушунтираётган экан. Болалар эса шоир ижодидан намуналар ўқиб, саҳна кўринишлари билан йиғилганлар олқишига сазовор бўлди.

Шу куни Ўзбекистон ХДП Бухоро шаҳар кенгаши ва мактаб маъмурияти ҳамкорлигида Президентимизнинг 5 ташаббуси ғоялари асосида меҳнат ярмаркаси ташкил этилди. Унда бандликка кўмаклашиш маркази, турли ташкилотлар ҳамда партиянинг ўзи ҳам бўш иш ўринлари билан қатнашди. Ҳудуддаги ишсиз хотин-қизлар, жазони ўташ муассасаларидан қайтганлар, битирувчилар таклиф этилаётган меҳнат турлари, ойлик маоши ва яна бошқа турли масалаларда ўзларини қизиқтирган саволларга жавоб олишди. Банкдан кредит олиш ва бизнесини бошлаш мақсадидаги опа-сингилларимизга ҳуқуқий маслаҳатлар берилди. Бир гуруҳ аёллар ўзларига мос бўлган ишларни танлаб, керакли ҳужжатларни тақдим этиш ва бафуржа суҳбатлашиш вақтларини келишиб олди.

Сафаримизнинг биринчи куни воқеаларга бой тарзда бошланди. Ўзбекистон ХДП Бухоро шаҳар кенгаши раиси Шоиста Набиева билан куннинг иккинчи ярмида навбатдаги манзил — «Меҳрибонлик» уйи томон йўл олдик. Бу ҳақда навбатдаги сонларимизда батафсил ҳикоя қилиш ниятидамиз.

 

Зилола УБАЙДУЛЛАЕВА,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: