07.05.2019

«ҲУМО» МИЛЛИЙ ТЎЛОВ ТИЗИМИ: ЯНАДА ҚУЛАЙ, ЯНАДА ИШОНЧЛИ

Миллий матбуот марказида «Асака» акциядорлик тижорат банки томонидан пластик карточкалар орқали ҳисоб-китобларни янада ривожлантириш масалаларига бағишланган матбуот анжумани ўтказилди.

Тадбирда республикамизда туризмни ривожлантириш ва туристларга қулай шарт-шароитлар яратиш мақсадида «Асака» акциядорлик тижорат банки биринчилардан бўлиб «MasterCard», «UnionPay» ва «UzCard» тўлов тизимларининг карталарини банкомат ёки терминалда хизмат кўрсатиш амалиётини жорий қилгани таъкидланди. Шунингдек, ушбу молия муассасасидан яна бир янгилик: эндиликда ушбу банкоматлар жорий йилнинг май ойидан бошлаб «Ҳумо» миллий тўлов тизимининг карталарига ҳам хизмат кўрсата бошлаши тўғрисида маълумотлар берилди.

— Президентимизнинг 2018 йил 19 сентябрдаги «Миллий тўлов тизимини ривожлантириш чора-тадбирлари тўғрисида»ги қарори ижросига асосан банк томонидан Тошкент шаҳар ҳудудида жами 1 минг 550 дона «Ҳумо» миллий тўлов тизимига мансуб тўлов терминали ўрнатилди, — дейди «Асака» акциядорлик тижорат банки бошқаруви раиси ўринбосари Бобохон Абдуллаев. — Айни кунда «Ҳумо» миллий тўлов тизими вилоятларда ҳам татбиқ этилмоқда. Бундан ташқари, бугунги кунда республикамизнинг барча вилоятларида банкнинг 27 филиали, 16 та туну кун ишлайдиган 24/7 (бир ҳафта давомида куну тун ишлайдиган) шохобчаси, 70 банкомат ва 98 инфокиоскаси мижозлар хизматида. Шунингдек, банк томонидан муомалага чиқарилган пластик карталар сони 1,8 миллион донани ташкил этса, ўрнатилган терминаллар сони 11 мингдан ошган.

Қолаверса, мижозларга қулайлик яратиш ва масофавий хизматлар кўламини кенгайтириш мақсадида «Asaka mobile» мобиль иловасини ҳам жорий қилган. Ушбу илова орқали картадан картага пул ўтказиш, онлайн омонат очиш, онлайн конверсия амалиётини ўтказиш, кредитларни сўндириш, коммунал, бюджет, солиқ, интернет ва бошқа хизматлар бўйича тўловларни ўтказиш имконияти мавжуд. «Asaka mobile» мобиль илова орқали «оилавий карталар»ни бошқариш янги хизмат тури амалиётга татбиқ этилди. Бу хизмат тури орқали мижозлар оила аъзоларига қўшимча карталар олиши ва ўз ҳисоб рақамидан ўзи белгилаган лимит доирасида амалиётлар бажариши мумкин.



DB query error.
Please try later.