07.05.2019

ФАХРИЙЛАР УЛУҒЛАНДИ

Термиз туманидаги «Отчопар» майдонида 9 май — Хотира ва қадрлаш куни муносабати билан байрам тадбири бўлиб ўтди.

Иккинчи жаҳон уруши қатнашчилари, фронторти меҳнат фахрийлари, нуроний отахон ва онахонлар иштирок этган тадбирда ўтганлар хотираси ёдга олиниб, кекса авлод вакилларини эъзозлаш юзасидан амалга оширилаётган ишлар ёшларни Ватанга муҳаббат, юртга садоқат ва миллий қадриятларимизга ҳурмат руҳида камолга етказишга хизмат қилаётгани алоҳида таъкидланди.

Сурхондарё вилоятида 63 нафар Иккинчи жаҳон уруши қатнашчиси, уч мингга яқин фронторти меҳнат фахрийси умргузаронлик қилмоқда. Уларнинг осуда, обод ва тўкин турмуш кечириши учун барча шароит яратилган. Айни кунларда давлат ва жамоат ташкилотлари, ёшлар бугунги тинч, фаровон ҳаётимиз учун курашган уруш иштирокчиларининг ҳолидан хабар олиб, уларга меҳр улашмоқда. Совға-саломлар билан дилларини хушнуд этмоқда.

Тўкин дастурхон атрофида ўтказилган мазкур тадбир ҳам ана шундай эзгу мақсадларга йўналтирилгани билан барчага бир олам завқ улашди. Узоқ йиллар вилоятда ҳалол ва самарали меҳнати билан барчага ўрнак бўлган 51 фахрийга I, II ва III даражали «Меҳнат фахрийси» кўкрак нишонлари тантанали топширилди.

Тадбир доирасида «Отчопар» майдонида Иккинчи жаҳон уруши акс эттирилган ҳудуд барпо қилиниб, окоп ва блиндажлар, ўша даврнинг ҳарбий техника ва қурол-аслаҳалари кўргазмаси ҳам ташкил этилди.

Санъаткорларнинг қизиқарли куй-қўшиқлари даврага ўзгача шукуҳ бағишлади.

Байрам тадбирида Сурхондарё вилояти ҳокими Т.Боболов сўзга чиқди.

 

Холмўмин МАМАТРАЙИМОВ,

ЎзА мухбири.


Фикр ва мулохазалар

Защита от автоматических сообщений

Сўнгги янгиликлар: