30.04.2019

ТУРИЗМ БИЗНЕС ЛОЙИҲАЛАРИ МУАЛЛИФЛАРИ АНИҚЛАНДИ ВА ТАҚДИРЛАНДИ

Миллий матбуот марказида Туризмни ривожлантириш давлат қўмитаси фаолиятининг жорий йил биринчи чораги натижалари ҳамда ёшларнинг туризм соҳасидаги бизнес ташаббусларини (Старт-ап) қўллаб-қувватлаш мақсадида ташкил этилган ёшлар ўртасида туризм соҳасидаги энг самарали бизнес лойиҳалар танлови ғолибларини тақдирлаш маросими бўлиб ўтди.

Тадбирда аввало мамлакатимизга келган хорижий ва маҳаллий сайёҳлар сони, туризмни ривожлантириш борасидаги ҳуқуқий асослар, хавфсиз туризм концепциясини таъминлаш борасида олиб борилаётган ишлар тўғрисида маълумотлар берилди.

— Жорий йил биринчи чорагида мамлакатимизда 2 мингдан зиёд хонага эга 40 та меҳмонхона қуриб битказилди, — дейди Қўмита раисининг биринчи ўринбосари в.б. Улуғбек Қасимхўжаев. — Бугунги кунда Ўзбекистонда жами 21 минг 300 хонадан иборат 966 меҳмонхона фаолият юритади. Йил охиригача тахминан 7 минг хонага эга 140 та янги меҳмонхона қурилиши кўзда тутилмоқда. Агар 2017 ва 2018 йилларда хоналар сони 4 ва 5 фоизга ошган бўлса, 2019 йилда эса 37 фоизгача ортиши кутилмоқда, бу эса меҳмонхоналарда жойлар етишмаслиги муаммосини деярли ҳал қилади.

— Президентимизнинг 2018 йил 7 февралдаги ички туризмни жадал ривожлантиришни таъминлаш чора-тадбирлари тўғрисидаги қарорида ёшларни туризм соҳасидаги тадбиркорлик фаолиятига кенг жалб этиш кўрсатиб ўтилган эди, — дейди Қўмитанинг инновациялар жорий этиш ва смарт-туризм бўлими бошлиғи Иброҳим Барноев. — Шу боисдан ёшларнинг туризм соҳасидаги бизнес ташаббусларини (Старт-ап) қўллаб-қувватлаш мақсадида туризм соҳасидаги энг самарали бизнес лойиҳалар танлови эълон қилинди.

Танловнинг биринчи босқичда танлов иштирокчилари тақдим қилинган бизнес лойиҳалар махсус комиссия томонидан кўриб чиқилди ва бизнес лойиҳанинг қуйидаги жиҳатларига эътибор қаратилди: Танлов иштирокчиси томонидан тақдим этилган лойиҳанинг туризм соҳасидаги давлат сиёсатининг устувор йўналишлари нуқтаи назаридан долзарблиги, иштирокчининг бозор конъюктураси, туризм бозорининг ўзига хослиги ва республиканинг туризм мавсумини инобатга олган ҳолда хорижий туристларни Ўзбекистонга жалб қилиш бўйича таклифларининг асослантирилганлиги ва амалга ошириш мумкинлиги, лойиҳага қўйилган мақсадларга эришишнинг механизм ва воситалари, лойиҳа харажатлари сметасининг пухта ишлаб чиқилганлиги асослантирилди.

Иккинчи босқичда биринчи босқич якуни бўйича саралаб олинган иштирокчилар ўз бизнес лойиҳаларини махсус комиссия олдида тақдимот қилди ва лойиҳага оид саволларга жавоб берди. Натижада, комиссия томонидан танлов мезонлари асосида 3 нафар иштирокчининг бизнес лойиҳаси қўллаб-қувватлаш мақсадида танлаб олинди.

Тадбир доирасида ғолибларга ўз лойиҳаларини амалга ошириш учун қўмита томонидан тегишли шартлар асосида энг кам иш ҳақининг 250 (икки юз эллик) баробаригача бўлган миқдорда пул мукофотлари топширилди.

 

Тоштемир МУРОД



DB query error.
Please try later.