30.04.2019

53-ХАЛҚАРО МЕНДЕЛЕЕВ ОЛИМПИАДАСИДА

мамлакатимиз лицей ўқувчилари бир олтин, уч кумуш ва бир бронза медалини қўлга киритишди.

Россия федерациясининг Санк-Петербург шаҳрида 20-27 апрель кунлари кимё фани бўйича ўтказилган 53-Халқаро Менделеев олимпиадасида Тошкент педиатрия институти қошидаги академик лицей ҳамда Тошкент давлат аграр университети қошидаги академик лицей ўқувчилари иштирок этиб, олтин, кумуш ҳамда бронза медалларини қўлга киритишди.

 Кеча Ислом Каримов номидаги Тошкент халқаро аэропортида олимпиада ғолиблари ва уларнинг устозларини тантанали кутиб олиш маросими бўлиб ўтди. Унда Олий ва ўрта махсус таълим вазирлигининг масъул ходимлари, лицейларнинг профессор-ўқитувчи ва ўқувчилари, ота-оналар ҳамда кенг жамоатчилик иштирок этди.

— Ушбу олимпиадада 29 давлатдан 170 нафардан ортиқ ўқувчи иштирок этди, — дейди Тошкент педиатрия институти қошидаги академик лицей директори Ортиқбой Эшонқулов. — Биз бу олимпиадада беш медални қўлга киритдик. Бунга осонликча эришмадик. Боиси олимпиадада кимё фани бўйича илғор давлатлардан ҳисобланган Россия, Украина, Белорусь, Хитой, Ироқ, Австрия ва Венгрия каби давлатлардан саралиб олинган ўқувчилар иштирок этди. Бизнинг ўқувчилар бошқа давлатлар ёшларидан ҳеч кам эмаслиги, қайтага билими жиҳатдан кўпгина давлат ёшларидан устун эканлиги назарий ҳамда амалий имтиҳонларда билиниб турди.

Бу ютуқларнинг бош омили мамлакатимизда таълим соҳасини янада ривожлантириш, чуқур билимли ёшларни тарбиялашга қаратилган чора-тадбирлар билан боғлиқ. Худо хоҳласа, яна кўпгина халқаро фан олимпиадаларида юртимиз шарафини ўқувчиларимиз муносиб ҳимоя қилиб, олтин медалларимиз сонини кўпайтиришига ишонаман.

— Олтин медални қўлга киритишимда устозларимизни хизматлари катта бўлди, — дейди Тошкент педиатрия институти қошидаги 1-сонли академик лицейи 3-босқич ўқувчиси Исломжон Каримов. — Чунки Россия, Украина, Белорусь каби давлатлардан келган ўқувчиларнинг билими ҳам юқори даражада эди. Бизнинг ютуғимиз ушбу олимпиадага йил бўйи яхши тайёргарлик кўрганимизда ва бугун бизга таълим бераётган ўқитувчиларимиз ҳам ўз вақтида Халқаро Менделеев олимпиадасининг олтин медалларига сазовор бўлганидадир. Биз бу анъанани давом эттирмоқдамиз. Мен олтин медални қўлга киритиб, юртимиз байроғини баланд кўтарганимдан фахрланаман. Бундан кейин ҳам кимё фани йўналишида ишларимни давом эттириб, Ватанимиз шаънини халқаро майдонларда улуғлаш учун бор билим ва имкониятимни ишга соламан...

 

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.