23.04.2019

БИР УМР ЁДИМДАН ЧИҚМАЙДИ...

Андижон шаҳридаги Бобур майдонида муддатли ҳарбий хизматга чақирилган аскарлар ҳарбий қасамёд қабул қилди.

Андижондаги ҳарбий гарнизонда хизмат бурчини ўташни бошлаган аскарларнинг ҳарбий қасамёд қабул қилишига бағишланган тадбирда сержант ва офицерлар, аскарларнинг ота-оналари, яқинлари, Шарқий ҳарбий округ, вилоят ҳокимлиги ҳамда кенг жамоатчилик вакиллари иштирок этди.

Кенг майдонда саф тортган ҳарбий либосдаги аскарлар томонидан Ўзбекистон мадҳияси ижро этилди, сўнг улар тантанали равишда қасамёд қабул қилди.

— Ҳарбий қасамёд қилиш маросими мени жуда тўлқинлантириб юборди, кучимга куч қўшиб, маънавий қувват бағишлади, — дейди самарқандлик оддий аскар Дамир Каримов. — Бу тадбир бир умр ёдимдан чиқмайди. Йигитлик бурчимни юқори даражада адо этиш, ҳарбий қасамёдга содиқ, юртимга муносиб фарзанд бўлиш, ота-онам, оилам бағрига ёруғ юз билан қайтиш мен учун юксак шарафдир.

— Ҳарбий либосдаги аскарларнинг қадди-қомати, бўй-басти, қувноқ чеҳралари йиғилганларнинг ҳавасини келтирди, айниқса, ота-оналари ва яқинларининг қалбида ифтихор туйғуларини юксалтирди.

— Бугунги тадбирга фарзандим Давронбекни қутлаш учун келдик, — дейди Пастдарғом туманидан Матлубахон Эргашева. — Очиғи, миллий армиямизда хизмат қилаётган аскарлардаги шижоатни, уларнинг жисмонан ва маънан баркамоллигини кўриб, қалбим тоғдай кўтарилди. Мана шундай мард ва жасур ҳимоячиларимиз бор экан, юртимиз тинчлиги ва хавфсизлиги таъминланишига асло шубҳа қилмайман.

Хизматнинг дастлабки ойида ҳарбий хизматга лаёқати, билим ва маҳорати билан кўпчиликка намуна бўлган бир гуруҳ аскарларнинг ота-оналарига ҳарбий қисм раҳбариятининг ташаккурномаси топширилди.

Ҳарбийлар томонидан жанговар тайёргарлик, маҳорат ва жанг санъатини қай даражада эгаллагани намойиш этилган кўргазмали чиқишлар тадбир иштирокчиларида катта таассурот қолдирди.

 

Ф.УБАЙДУЛЛАЕВ,

ЎзА мухбири.


Фикр ва мулохазалар

Защита от автоматических сообщений

Сўнгги янгиликлар: