16.04.2019

СИФАТСИЗ ОЗИҚ-ОВҚАТ МАҲСУЛОТЛАРИНИ ИШЛАБ ЧИҚАРИШГА ҲАМДА ИМПОРТ ҚИЛИНИШИГА АСЛО ЙЎЛ ҚЎЙИЛМАЙДИ

«Ўзстандарт» агентлиги томонидан «Истеъмолчиларни сифати кафолатланган озиқ-овқат маҳсулотлари билан таъминлашнинг долзарблиги ҳамда бу борада қабул қилинаётган техрегламентларнинг аҳамияти» мавзуида матбуот анжумани ўтказилди.

Тадбирда агентлик Президентимизнинг 2018 йил 12 декабрдаги «2019-2021 йилларда техник регламентларни ишлаб чиқиш дастури» ижросини таъминлаш ҳамда бугунги кунда қабул қилинган техник регламентларни мазмун ва моҳиятини тушунтириш борасида тарғибот ишларини олиб борилаётганлиги таъкидланди.

— Мамлакатлар ўртасида савдо ва иқтисодий муносабатларни ривожлантириш, халқаро савдодаги тўсиқларни бартараф этиш, ҳамда хавфсиз ва сифатли маҳсулот ишлаб чиқариш мақсадида ҳозирги кунда жами 40 техник регламент қабул қилинган, шулардан 10 таси озиқ-овқат соҳасига тааллуқлидир, — дейди «Ўзстандарт» агентлиги бош директори ўринбосари Жасур Шукуров. — Шунингдек, бугунги кунда республикамизда ишлаб чиқарилаётган маҳсулотларнинг юқори сифатини таъминлаш, ички бозорни сифатсиз озиқ-овқат ва бошқа маҳсулотлардан муҳофаза қилишга қаратилган қонун ҳужжатлари, Европа ва Божхона иттифоқи, ҳамда МДҲ давлатлари регламентлари нормалари ва халқаро стандартлар талаблари билан уйғунлаштиришга алоҳида эътибор қаратилмоқда. Бунинг натижасида ҳозирда техник регламентлар асосида расмийлаштирилган синов баённомалари чет давлатларда тан олиниши ҳамда сифатсиз маҳсулотларни олиб кириш, ишлаб чиқариш ва сотиш хавфини назорат қилиш тартиби ўрнатилди.

Бундан ташқари, агентлик лабораторияларнинг моддий-техник базасини мустаҳкамлаш бўйича халқаро молия институтлари маблағлари ва имтиёзли кредитларини жалб қилиш юзасидан амалий ишлар олиб бормоқда. Хусусан, «Республикада мева сабзавотчилик секторини ривожлантириш» лойиҳаси доирасида агентликка Жаҳон банкидан 20,3 миллион доллар имтиёзли кредит ажратилиши юзасидан Президентимизнинг 2018 йил 20 июндаги қарори қабул қилинди.

Ушбу қарор билан агентлик тизимидаги 8 ҳудудда ва 2 та Тошкент шаҳрида жами 10 та марказ қошидаги синов лабораторияларида янги озиқ-овқат ва қишлоқ ҳўжалиги маҳсулотларини синаш бўйича замонавий халқаро талабларга жавоб берадиган лабораториялар ташкил этилиши белгиланган.

Яна шуни айтиш мумкинки, ўтган йил сертификатлаштириш органлари томонидан жами 148,8 миллиард сўмлик маҳаллий ва импорт қилинаётган маҳсулотлар тегишли меъёрий ҳужжатларга номувофиқ деб топилди. Булардан 5,0 миллиард сўми озиқ-овқат ва қишлоқ хўжалиги маҳсулотларига тўғри келган. Номувофиқ деб топилган озиқ-овқат ва қишлоқ хўжалиги маҳсулотлари Қозоғистон, Грузия, Покистон, Туркия ва Россия давлатларидан импорт қилинган. Ҳозирги кунга қадар агентлик тизимидаги 12 та синов лаборатория халқаро даражада халқаро ташкилотларнинг аккредитлаш органлари томонидан аккредитациядан ўтказилди.

Тадбирда, шунингдек, бугунги кунда республикамиздаги маҳаллий ишлаб чиқарувчи ҳамда экспортёр корхоналар томонидан ишлаб чиқарилаётан озиқ-овқат ва қишлоқ хўжалиги маҳсулотларини дунё бозорларига экспорт қилиниши юзасидан амалий ишлар олиб борилаётганлиги тўғрисида ҳам маълумотлар берилди.

 

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.