08.04.2019

ХОРИЖИЙ ОММАВИЙ АХБОРОТ ВОСИТАЛАРИ ТЕРМИЗ БАХШИЧИЛИК САНЪАТИ ФЕСТИВАЛИ ҲАҚИДА

Термиз шаҳрида ўтказилаётган Халқаро бахшичилик санъати фестивали санъат оламидаги муҳим тадбирлардан бири сифатида халқаро жамоатчиликда катта қизиқиш уйғотмоқда.

Шу муносабат билан фестиваль ва унинг доирасида ўтказилаётган тадбирлар юзасидан хорижий оммавий ахборот воситаларида турли хабар ва мақолалар эълон қилиб борилмоқда.

 

Жумладан, Украинанинг «Страна» интернет-нашрида «Ўзбекистонда энг катта сўзана тикилди» номли мақола чоп этилди. Унда «5-10 апрель кунлари Термизда ўтказилаётган Халқаро бахшичилик санъати фестивали муносабати билан Ўзбекистонда дунёдаги энг йирик ипак гилам — сўзана тикилди», дейилади.

Хабарда сўзана ва унинг яратилиш тарихи, ушбу меҳнат тури, уста-тикувчилар фаолияти, фестиваль ва унинг ўтказилиши ҳақида батафсил маълумот келтирилган.

 

Озарбайжоннинг «Yenicag» ахборот порталида мавзуга оид берилган хабарларда фестиваль Ўзбекистоннинг энг жанубий минтақаси, ўзига хос қадимий санъат анъаналарига эга Термиз шаҳрида ўтказилиши ҳақида алоҳида сўз боради.

«ЮНЕСКО шафелигида ўтказилаётган ушбу тадбирда дунёнинг 20 дан ортиқ давлатидан 60 га яқин ижрочи иштирок этмоқда. Санъат оламидаги ушбу муҳим тадбирни ёритиш мақсадида дунёнинг 18 давлатидан 250 дан ортиқ журналист ташриф буюрган. Меҳмонлар, шунингдек, Сурхондарёдаги Фаёзтепа, Кампиртепа тарихий манзилгоҳлари, Султон Саодат ва ат-Термизий каби ўнлаб зиёратгоҳларда бўлиш имкониятига эгалар», дейилади «Yenicag» хабарида.

 

Хитойнинг «Жэньминь жибао» газетаси ҳам ўз саҳифаларида халқаро майдонда юз бераётган муҳим воқеа-ҳодисалар ҳақидаги хабарлари орасида Термиз шаҳрида ўтаётган ажойиб ва бетакрор тантаналар тўғрисида маълумотлар чоп этган. Хусусан, нашрда эълон қилинган мақолада қуйидагилар қайд этилади: «Тадбир Ўзбекистон Республикаси Президенти Шавкат Мирзиёев ташаббуси билан илк бор ўтказилмоқда. Фестиваль ёшларни миллий қадриятларга ҳурмат руҳида тарбиялаш, халқлар ўртасидаги маданий алоқаларни янада мустаҳкамлаш каби эзгу мақсадларга хизмат қилиши билан аҳамиятлидир. Унинг доирасида турли илмий конференция ва ижодий учрашувлар ҳам ўтказилмоқда. Тадбирга кенг ҳозирлик кўрилган.

Бахшичилик тарихи, ушбу санъат турининг ўзига хос мактаблари ҳақида маълумот берувчи илмий-оммабоп китоблар чоп этилган. Унда кўплаб давлатлар қатори Хитой Халқ Республикаси вакиллари ҳам иштирок этмоқда».

Ушбу халқаро фестиваль тафсилотлари, шунингдек, «Trend az», «Казинформ», «БелТа», «REGNUM», «Daily Sabah», «Devdiscourse», «AKI Press» каби қатор хорижий ахборот тармоқларида ҳам кенг ёритиб борилмоқда.

 

З.МИРЗАБОЕВА,

ЎзА мухбири.


Фикр ва мулохазалар

Защита от автоматических сообщений

Сўнгги янгиликлар: