19.03.2019

«БИЗ ҲАМ СУЗИШНИ ЎРГАНАМИЗ» ДЕЙИШМОҚДА КИТОБ ТУМАНИ ЁШЛАРИ. ЧУНКИ...

— Бобо, янги бассейн қурилибди, — дейди қувониб тумандаги 20-мактабда таълим олаётган ўн беш ёшли набирам Жасуржон.

— Хўш, нима қилмоқчисан? – сўрайман ундан атайлаб.

— Бассейнга қатнайдиган аълочи ўқувчиларнинг рўйхатини тузишди. Мен ҳам сузишни ўрганмоқчиман...

— Тўғри ўйлабсан, сузишнинг фойдаси кўп, — дедим унга.

Бассейн қурилгани, набирамнинг қувончи мени ҳаяжонга солди, болалигим ёдимга тушди. Саккиз ёшларда эдим чоғи. Қишлоғимизнинг бир чеккасида чуқур ҳовуз бўларди, ҳозир кўмилиб кетган. Болаларга қизиқиб сувга калла ташлабман, десангиз. Чўкиб кетдим. Ҳушимга келганимда айтиб беришди, сузишни биладиган ўсмир қишлокдошим мени ҳовуздан олиб чиқибди. Ҳаётимни сақлаб қолган шу инсондан ҳамон қарздорлигимни ҳис қилиб яшайман. Аммо сузишни ўрганолмай ўтдим. Мабодо, дарёлар қирғоғига келиб қолсам, саёз жойида нари-бери чўмилардим, холос. Сувда эркин сузадиган кишиларга ҳавас қилардим.

Тўғриси, Китоб, Шаҳрисабз, Яккабоғ туманларида бир нечта дарё оқса, сув сероб бўлса-да, кўплаб кишилар менга ўхшаб чўмилишдан чўчийди. Сузишни билмаслик кўп кўнгилсиз воқеаларга сабаб бўлганлиги ҳам бор гап. Бугун ҳам мактаб ўқувчиларининг аксарияти сузишни билмайди. Чунки, сузишни ўрганишга шароит ҳам, ўргатувчи ҳам бўлмаган.

Мустақиллик йилларида воҳада кўплаб очиқ ва ёпиқ сув ҳавзаси пайдо бўлди. Биргина Қарши шаҳрида бир нечта замонавий ёпиқ сув ҳавзаси барпо этилди. Қарши шаҳридаги Олимпия захиралари коллежининг замонавий ёпиқ бассейинида нуфузли мусобақалар ҳам ўтказиб келинмоқда. Ҳозир бундай бассейнлар бошқа туманларда ҳам қурилмоқда.

Ана шундай ўйлар билан Китоб шаҳрининг Гулистон маҳалласига етиб келдим. Кейинги йилларда бу ерда бунёдкорлик ишлари авж олди. Йўллар кенгайтирилиб, сифатли асфальт билан қопланмоқда, қанотларини ёзган оққушга ўхшаш кўча ёриткичлари нур сочмоқда. Ёшларга атаб 48 хонадонли 2 та кўп қаватли уй тикланди. «Воҳа машъали» қурилиш ташкилотининг кўркам маъмурий биноси қуриб ишга туширилди. Унинг сал нарисида ип йигирув корхонаси фаолият кўрсатаяпти. Корхонада 400 га яқин киши меҳнат қилмоқда, уларнинг аксарияти ёшлар. Шунинг учун ҳам китобликлар Гулистон маҳалласидаги бу обод ҳудудни «Ёшлар шаҳарчаси» деб аташмоқда.

Маҳаллада дастлаб учратганим «Авангард гидро экспрес» МЧЖ раҳбари Жамол Ғаппоров бўлди. Жамол ака воҳанинг энг моҳир қурувчиларидан, қирқ етти йилдан буён шу эзгу ишда. Янги қурилиш ташкилотига асос солганига ҳам анча бўлди. Ташкилот қўплаб қурилишларда иштирок этиб, ном чиқарди. Масалан, Шаҳрисабз шаҳрининг марказий майдонидаги 30 фоиз қурилиш-ободончилик ишлари шу ташкилотга тегишли. Маҳобатли санъат саройини ҳам шу ташкилот сифатли таъмирдан чиқариб берди.

— Ёпиқ сув ҳавзасининг лойиҳасида кўзда тутилган барча ишлар бажарилди, — дейди Жамол ака. — Бинога энг замонавий қурилиш ашёлари ишлатилди. Бинонинг пастки деворларига Хитойда тайёрланган, ён-атрофига ўзимизда ишлаб чиқарилган сопол қопламалар ишлатилди. Бинога кираверишдаги улкан шиша эшиклар Тошкентдаги корхоналардан келтирилган. Мана, кенг фойе. Маъмурият, тиббиёт хоналари мавжуд. Жами 8 та душ курилган. Мана, бу баланд гумбазлик хона 32 га 22 метр. Сузиш ҳавзаси 25 га 11 метр. Қаранг, сув илиқ. Бино ва ҳавзадаги сув газ ёрдамида иситилади. Ишлатилган сув тозаланиб, чиқиб кетади.

— Бу ерда бассейндан ташқари ёпиқ кичик футбол, волейбол, баскетбол майдончалари ва 2 та теннис корти қурдик. Нафақат ёшлар, катта ёшдаги кишилар ҳам келиб, спорт билан шуғулланишлари мумкин.

Қурувчиларга ёрдамга келган туман ободонлаштириш бошқармаси боғбон ва хизматчилари 10 та кўп йиллик ўрик дарахтини сақлаб қолиб, улар қаторига янги ниҳоллар, гуллар ўтқазишибди. Турфа рангдаги гуллар барқ уриб ўсиб турибди. Бино олдида фаввора қурилибди...

Бу ерда бир гуруҳ болаларни учратдим.

— Мен албатта сузишни ўрганаман, — дейди ўн икки ёшли Акмалжон.

— Мен ҳам, — дейди унинг дўсти Алишер...

Ҳа, бу бассейнда кўплаб ёшлар сузишни ўрганади, улар орасидан моҳир сузувчилар ҳам етишиб чиқади. Энг муҳими, бу иншоот ёшлар саломатлигини мустаҳкамлашга, улар ўртасида соғлом турмуш тарзини шакллантиришга хизмат қилади.

Қутлуғ Наврўз байрами арафасида китобликларга ана шундай ажойиб сузиш ҳавзаси туҳфа қилинди. Яна шу куни Қайнар қишлоғи яқинидаги «Наврўз сайилгоҳи»да катта сайил уюштирилди. Воҳанинг барча туманларидан полвонлар, чавандозлар қатнашган кураш ва кўпкари мусобақалари ҳам эсда қоларли бўлди. Анъаналар ўлмайди, бу элдан моҳир спортчилар етишиб чиқиб, юртимиз довруғини дунёга таратади. Бунга шубҳа йўқ.

 

Юнус УЗОҚОВ,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: