12.03.2019

ШУМ БОЛАНИНГ БИЗНЕС РЕЖАСИ

Ёки бой отага айтган ёлғондан холи таклифлари

— Ассалому алайку-у-у-ум, бой ота. Аҳволларинггиз яхшими? Улоқчи отингиз омонми? Ҳалиги, қандил олма-чи, гуллай деяптими?..

— Хў-ўш, гапирчи, фақат шуларни сўрагани келмагандирсан? Яна қандай шумликни ўйладинг?

— Шу-у, таъми ўткир қамчинингизни нарироқ қўйсангиз айтаман.

— Хўш, майли... энди тезроқ гапир...

— Шу-у-у, боғингизнинг бир четидан менга озгина жой берсангиз дегандим.

— Хў-ўш, иннанкейинчи?

— Э-э, шу иннанкейинингиз омон бўлсин, бой ота. Товуқ боқмоқчи эдим. Товуқ ,жонивор, 7 хазинага кирар экан. Биласиз, тухум дегани зап хўрак нарса... Фойдасидан менга инсоф қилиб берсангиз бўлди, бой ота.

— Ҳа ҳумпар-э, да-арров фойдангдан гапирасан-а? Хўш, майли, аммо олма теришга ярамайсан-ку, қовоқ бошинг билан товуқ боқишни биласанми?

— Бунинг йўли осон, бой ота. Ҳозир интернет деганидан ҳамма нарсани билиб олса бўлади. Мен сизга бизнес режамни айтайми?

— Ия, “бизмиз” деганинг нимаси бўлди тағин?

— Э-э-эй, бизмизмас, бизнес. Бу дегани, бой отажоним, мўмай даромад дегани. Муллажиринг дегани. Бунинг учун-чи, калла керак.

— Хўш зумраша, қани, бир бошидан гапир-чи.

— Бўлмасам эшитинг! Битта хонаки товуқ кунига 80 грамм дон, 20 грамм ўт ер экан. Агар суткасига 80 граммдан дон ейдиган бўлса, уни 365 кунга кўпайтирамиз... Демак, битта хонаки товуқ бир йилда 29 килодан ошиқроқ озуқа ейди,тўғрими бой ота? 1 кило дон 1500 сўм бўлса, Бир йилда 45 000 сўмга яқин маблағ сарф бўлади. Хонаки товуқлар оддий дон билан боқилса, ҳар бири ўртача 220 – 230 дона, агар витаминларга бой омухта билан боқилса 270 – 280дона тухум бериши фанда исботланган экан. Бозор расталарида бир дона тухум тахминан 500 -600 сўм атрофида. Агар ўртача 225 та тухум деб ҳисобласак, бой ота, 123 750 сўм мўллажиринг бўлади. Биз ундан бир йиллик дон пулини ажратиб ташлаймиз. Хў-ўш, соф 78 750 сўм фойда чўнтагимизга киради. Бир дона товуқнинг бир йилда берадиган фойдаси бу.

100 дона товуқнинг фойдаси 7 875 000 сўмни ташкил қилади. Ҳар бир ойга тақсимлайдиган бўлсак, 656 250 сўмни кўрсатади. Бой отажан, мана буни иш деса бўлади. Буғдой ўрими чоғида дон нархининг тушиши сармоянгизга яна сармоя қўшади. Бундан ташқари товуқ гўнги ҳам бизга маблағ олиб келади. У азот минерал ўғити билан тенг бўлиб, экинлар учун жуда фойдали.

— Хў-ўш, иннанкейинчи?

— Жой масаласига келсак, 100 та товуқ боқиш учун узунлиги 15 метр, эни 2.5 метр ва баландлиги 1.5 метрлик бино керак бўлади. Озуқа вақтида берилиши, сув доимий ёнида бўлиши керак,бой ота. Бу ишга жиддий белбоғлаган тадбиркор албатта ўз мақсадига етади. Қани ўша тадбиркор дейсизми? Мана менда, бой ота! Жойини тайин қилсангиз бўлди, буёғини ўзим боплайман, бой ота!

— Ҳа қурумағур, жа-а-а ақилли чиқиб қолдинг-ку, сен-а?

— Энди буларни, бой ота, интернетдан олдим. Биласизми, шу соҳанинг олимлари Ломанн, Декалп, Хай-лайн ва Радонит-3 зотли товуқларни тавсия қилибди. Ҳозирги кунда бозорларимизда сотилаётган тухумларнинг кўпчилиги Ломанн зотли товуқларга тегишли экан. Аммо бу зотли товуқларни боқиш анчагина эътибор талаб қилади-да. Жўжалигидан ваксиналар билан таминланиши ва озуқаси витаминларга бой бўлиши керак. Билиб олдим, 1 кг омухта 2500 – 3000 сўм экан. Бундан ташқари, фирма товуқларига бир хил ҳарорат, бир хил намлик бўлиши лозим. Агар талаб этилган нарсаларни вақтида бажармасангиз, кутилган натижани бермаслиги мумкин. Лекин бизга хонаки товуқлар ҳам фойда олиб келади. Кичик бизнес учун зотли бўлиши шартмас, бой ота.

Тадбиркорлик оилангизга, шу билан бирга юртимизга ҳам фойда олиб келади. Ҳаракатингиз билан Ватанимиз ривожига ўз ҳиссангизни қўшган бўласиз.

— Ростдан ҳам билимдон бўлиб кетганга ўхшайсан, лекин гапларингнинг кўпига тушунмадим. Ҳа майли, давом эт. Иннанкейинчи?..

— Э-эйй! Шу иннанкейининггиз одамни хит қилади-да, бой ота. Эски боғингизга қараб ўтиргандан нима фойда? Замонага боқиб иш қилсанггиз мўмайгина маблағ кармонинггизга оқиб киради! Мени айтди дерсиз. Бизнес сари биринчи қадамингизни бугундан ташланг. Чунки, Бизнес – бу фаровон келажак демакдир...

— Ҳой – ҳой, тўхта-чи! Бу ўша, ҳалиги ёлғонларингдан биттаси бўлмасин тағин. Нақ терингга сомон тиқаман-а!

— Бой отамдан айланай, бу замонда бировни алдаб бўладими? Қасам ич десангиз ичаман, гапим рост, энди тадбир ўзингиздан.

— Ҳмм..м... унда Бадал аравакашни чақир-чи...

— Хўп бўлади, бой ота!

 

Оламгир АБДИЕВ,

Ўз ЖОКУ талабаси.



DB query error.
Please try later.