12.03.2019

ЁШ ОЛИМЛАРНИНГ СОНИ КАМ

Миллий матбуот марказида Олий ва ўрта махсус таълим вазирлиги томонидан «Ёш олимларни қўллаб-қувватлаш ва уларни ижтимоий ҳимоя қилиш борасидаги белгиланган чора-тадбирлар, шунингдек, уларнинг фан ва техника ривожланишидаги ўрни» мавзуида матбуот анжумани ўтказилди.

— Бугунги кунда олий таълим муассасаларида илмий-даражали профессор-ўқитувчилар таркибини ёшартириш айни вақтда долзарб вазифалардан биридир, — дейди Олий ва ўрта махсус таълим вазири ўринбосари Узоқбой Бегимқулов. — Ҳозирда олий таълим муассасаларидаги фан докторларининг 51,9 фоизи 60 ёшдан катталар, 40 ёшгача бўлганларнинг сони бор-йўғи 7,5 фоизни ташкил қилади. Фан номзодлари орасида 60 ёшдан катталар эса 24,5 фоиз, 40 ёшгача бўлганлар 17 фоизни ташкил қилади, холос. Шу боис вазирлик томонидан ёш илмий тадқиқотчиларни қўллаб-қувватлаш ҳамда уларни илм билан шуғулланишга рағбатлантириш мақсадида қатор чоралар кўрилмоқда.

Жумладан, Жаҳон банки кредити ҳисобидан 2019-2021 йилларда ёш олимлар учун Академик инновациялар фонди ташкил этилиб, мазкур фонднинг 4 миллион АҚШ доллари маблағи ҳисобидан 6 та фан соҳалари бўйича инновацион илмий-ўқув комплекслар ташкил этилиши режалаштирилган. Ёш олимларга илмий фаолият билан шуғулланиши учун шароит яхшиланмоқда. Биргина 2018 йилда Ўзбекистон Миллий университети қошида 3 та янги илмий-тадқиқот муассасаси ташкил этилди. Булар — Нанотехнологиялар маркази, Ярим ўтказгичлар физикаси ва микроэлектроника илмий-тадқиқот институти, Биофизика ва биокимё институтларидар.

Бундан ташқари, республикадаги 18 та олий таълим муассасасида давлат-илмий техник дастурлари доирасида ёш тадқиқотчилар томонидан умумий қиймати 3,6 миллиард сўмга тенг жами 69 та фундаментал ва амалий тадқиқотлар олиб борилмоқда.

Шунингдек, вазирлик томонидан ёшларни янада рағбатлантириш мақсадида «Ёш академиклар клуби» ташкил этилди, «Академик шогирди» фахрий нишони ҳам таъсис этилган. Ихтирочилик патентини қўлга киритган докторант ва магистрларни ўқитувчи лавозими бўйича ойлик иш ҳақи миқдорининг 10 баробаригача корхона ҳамда ташкилотлар ҳисобидан моддий рағбатлантириш белгилаб берилди.

Матбуот анжуманида докторантура битирувчиларини олий таълим муассасалари ва илмий-тадқиқот институтларига йўлланма асосида юбориш йўлга қўйилгани ҳамда докторантларнинг меҳнат фаолиятини рағбатлантириш учун имтиёзли ипотека кредити ажратилаётгани тўғрисида ҳам маълумотлар берилди.



DB query error.
Please try later.