Охирги сонда



Кўп ўқилган мақолалар



Долзарб мавзу



Мақолалар архиви

«    Aprel 2019   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
12.03.2019

СОҒЛОМ ХАЛҚ ЮРТНИ БОЙ ҚИЛАДИ

Гулрано АЗИМОВА, II даражали «Соғлом авлод учун» ордени соҳибаси, Юнусобод туманидаги имконияти чекланган болалар учун ихтисослаштирилган 87-мактаб директори:

— Президентимиз 8 март — Халқаро хотин-қизлар куни муносабати билан пойтахтимиздаги муҳташам «Ўзэкспомарказ» миллий кўргазмалар залида ўтказилган тантанали байрам тадбирида нутқ сўзлаб, барча аёлларни самимий табриклади. Тадбирда иштирок этиб, табрикда айтилган самимий сўзларни эшитиб, ич-ичимдан фахрланиб, ғурурланиб кетдим. Шу мамлакатда туғилиб, яшаётганимдан фахр ҳиссини туйдим.

Баҳор нафосати, инжиқликлари билан аёл табиатига ўхшайди. Яшариш фасли кириб келиши билан ўзбек хонадонларида байрам ва тантаналар кўпаяди. Бу йилги хотин-қизларимизнинг байрами ўзгача шукуҳ, ўзгача тантана билан нишонланди. Мен шу юртнинг бир аёли сифатида, бу айёмни кўтаринки руҳда кутиб олдим. Байрам кайфияти кўнгилга сиғиши аслида аёл учун катта бахт, деб биламан.

Юртбошимизнинг ҳар бир аёл учун эътибор ва эътирофлари, ҳар бир аёлга шахсан йўллаган табриклари хотин-қизларимизга бахт, ишонч ва шу билан бирга жасорат берди, десам адашмаган бўламан. Бугунги кунда давлат ва жамоат ташкилотлари тизимида 1 минг 400 га яқин опа-сингилларимиз раҳбарлик лавозимларида ишламоқда. Хотин-қизларнинг улуши соғлиқни сақлаш ва ижтимоий хизматлар соҳасида 82 фоиздан зиёдни, илм-фан, таълим-тарбия, маданият ва санъат соҳаларида 72 фоизни, қишлоқ хўжалигида 45 фоиздан ортиқни, саноатда 38 фоизни ташкил этар экан. Шу рақамлар ҳам бугун аёлларимизнинг ижтимоий ҳаётдаги аҳамияти ортиб бораётганини кўрсатади.

Президентимиз «Ёшлар — келажагимиз», деб айтди. Аслида ҳам шундай. Мактабда тўғри ташкил этилган таълим-тарбия келажагимиз учун оқил, доно, билимдон фарзандларни етказиб беради.

Мен фаолият юритаётган мактаб имконияти чекланган болалар учун ихтисослаштирилган бўлиб, мактабда ақлан ва руҳий ривожланишда орқада қолаётган болалар таҳсил олади. Мактабимиз давлатимиз қарамоғида. Ўқувчиларнинг таълим-тарбия олишлари учун ҳамда уларда учрайдиган нуқсонларни бартараф этиш учун қулай шароит яратилган. Мақсадимиз болажонларимизни келгусида мустақил ҳаётга мослаштириш, тенгдошлари орасида ўз ўринларини топишида ёрдамлашишдир. Бу борада Президентимиз маърузасида «Эл соғлиғи — юрт бойлиги» деб айтганлари менга жуда ёқди, чунки соғлом халқ юртни бой қила олади. Менинг мақсадим ҳам имконияти чекланган болажонларни соғломлаштириш, уларга касб-ҳунар ўргатиш, жамиятга фойда келтира оладиган инсон этиб тарбиялашдир.

Байрам тантанасида Президентимиз айтган фикрлар, давлат мукофоти менга катта маъсулият юклади. Бу баландпарвоз гап эмас, олдимизда аниқ режалар бор. Ўқувчиларимизни соғломлаштириш учун спорт ишларини жадаллаштириш, компьютер технологияларини мактабимиз ўқув дастурига киритиш (шу вақтгача ақли заиф болаларга бу фан ўқитилмайди), махсус дастурлар ишлаб чиқиш, видео дарсларни йўлга қўйиш, ўқувчиларни соғломлаштириш мақсадида «иппотерапия» (от устида даволаш) реабилитация ишларини йўлга қўйиш асосий мақсадимиз.

Илоҳим, ҳар бир аёл орзу-ниятларига етиб юрсин.



DB query error.
Please try later.