12.03.2019

«ЮКСАК МУКОФОТГА МУНОСИБ БЎЛАМАН»

Ҳуснигул МУҲТОРЖОНОВА, Андижон давлат тиббиёт институти педиатрия факультети 6-босқич талабаси, Зулфия номидаги давлат мукофоти совриндори:

— Юксак марраларни эгаллаётган ёшлар қаторида эканлигимдан бахтиёрман. Юртимиздаги барча қизларнинг орзусига айланган мукофот бугун менинг кўксимда порлаб турибди. Бу мен учун аввало катта масъулият ва келажакдаги улкан режаларимнинг дебочасидир. Агар дунёдаги энг бахтли ёшлар ким, дея сўрашса, ҳеч иккиланмасдан Ўзбекистоннинг ёшлари, деб жавоб бераман. Чунки биз эришаётган марраларга бутун дунёнинг ҳаваси келмоқда. Бунинг асосий сабаби эса юртимизда бизга қаратилаётган эътибор, яратилаётган шароитдир.

Имкониятлардан фойдаланиб, айни пайтда онкология йўналишида илмий тадқиқот олиб боряпман. Бугунгача 1 та патент, 2 та ўқув услубий қўлланма, битта изоҳли луғат, 8 та рационизаторлик таклиф беришга, хориж ва республика журналларида ўнлаб илмий мақолалар чоп этишга эришдим.

2013 йилдан институт «Ёш олимлар Кенгаши», онкология ва тиббий радиология кафедраси қошидаги «Ёш онколог» тўгараги аъзосиман. Шу йил Ўзбекистон интеллектуал мулк агентлиги томонидан «Яхши ва ёмон сифатли тухумдон ўсмаларини РОМА индекси орқали прогнозлаш дастури» номли патентга эга бўлган «Онкологияда деонтолгия масалалари» ҳамда «Жарроҳлик фанидан терминология» номли электрон услубий қўлланмалар учун гувоҳномага эга бўлдим.

Мукофотни олиб уйга қайтар эканман, йўл-йўлакай хурсандчилигимни ҳамма билан бўлишгим келди. Кечаси алламаҳалгача телефон қўнғироқлари тинмади. Юрагимдаги ҳаяжон ҳар эслаганимда жўш урмоқда. Озгина меҳнатимиз шу қадар юксак қадрланиб, шахсан Президентнинг қўлидан мукофот олиш бахти барчага ҳам насиб этавермайди.

Билдирган тилаклар орасида энг ажойиби шу бўлди: «Сиз тиббиёт соҳасини танлаб, инсонлар ҳаётини, соғлиғини ҳимоя қилишга бел боғлагансиз. Бу катта савоб иш. Сизга берилган мукофот эса бунинг совғаси. Доим ушбу номга муносиб бўлишга ҳаракат қилинг».

Аввало, она халқимиз, ота-онамиз, устозларимизнинг ишончини оқлаш энг катта вазифамиздир. Келажакда катта ютуқларга эришиб, юртимизга муносиб фарзанд бўлишга ваъда бераман. Ватанимнинг тиббиёт соҳасидаги ютуқларини кўпайтиришда, соғлом турмуш маданиятини юксалтириш йўлида сидқидилдан хизмат қиламан.

 

Зилола УБАЙДУЛЛАЕВА ёзиб олди.


Фикр ва мулохазалар

Защита от автоматических сообщений

Сўнгги янгиликлар: