Охирги сонда



Кўп ўқилган мақолалар



Долзарб мавзу



Мақолалар архиви

«    Aprel 2019   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
12.03.2019

ЭЪТИРОФ, РАҒБАТ АЁЛНИ ЮКСАЛТИРАДИ

Илк бор 8 март — Халқаро хотин-қизлар куни байрами арафасида кўплаб опа-сингилларимиз «Мўътабар аёл» кўкрак нишони билан тақдирланди. Мазкур кўкрак нишони Президентимизнинг 2018 йил 2 февралдаги «Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида»ги фармони асосида таъсис этилган.

 

Робия КАЗИМОВА, Ўзбекистон ХДП Бухоро вилоят кенгаши раиси, халқ депутатлари вилоят Кенгашидаги партия гуруҳи аъзоси, «Мўътабар аёл» кўкрак нишони соҳиби:

— Баҳорнинг илк кунлари уйма-уй юриб, опа-сингилларимизни байрам билан табриклаётган вақтимизда қўл телефоним жиринглаб қолди. Қарасам, Бухоро вилоят хотин-қизлар қўмитаси раиси экан. Улар суҳбат давомида «Мўътабар аёл» кўкрак нишони билан тақдирланганимни айтиб табриклади. Бу мукофотга номзодим қўйилганини билмагандим. Шунинг учун аввалига жуда ҳайрон қолдим, кейин ҳайратландим, қувондим. Ўзимни дунёдаги энг бахтли аёлдек ҳис этдим.

Ишонасизми, шу вақт бутун ҳаётим бирма-бир кўз олдимдан ўтди. Катта қизимни мактабга жўнатиб, кичикларини боғчага олиб бораман. Шундан ишга ўтиб, кеч қолмадимми, дея соатга қарайвераман. Йўлда уйда нималар қолмагани, кечка қандай овқат тайёрлаш ҳақида ўй сураман. Ишга етиб келгач, хаёлимни жамлаб, вазифамни аъло даражада бажаришга ҳаракат қиламан...

Эҳҳе, буларнинг бари бир қарашда осондек. Аммо шу чиғириқдан ўтиб олган аёл, албатта, роҳатга етаркан. Турмуш ўртоғим билан уч қизни тарбияладик. Турмушга узатдик. Айни пайтда улар турли ташкилотларда фаолият юритмоқда. Шу билан бирга, оилавий тадбиркорлик қилишади. Фарзандларим болалигида аёл ҳар бир вазифасини сидқидилдан бажариши лозимлигини кўрган, юрагига жо қилган. Бугун улар менинг изимдан юришмоқда.

Партиядаги фаолиятимга келадиган бўлсак, жорий йил сиёсий партиялар учун синовли йил эканини яхши биламиз. Шу боис барчамизда шижоат, ғайрат устунлик қилмоқда. 17 депутатимиз билан бирга вилоятимиз ҳудудларида бўляпмиз. Аҳоли ва мутасадди ташкилот раҳбарлари билан учрашувлар ўтказиляпти. Натижада ўнлаб масалалар жойида ҳал этиляпти, қолганлари назоратга олиняпти. Энг муҳими, аҳоли бундан жуда мамнун. Йил бошидан буён депутатларимиз ташаббуси билан тўрт мактабда болалар ўйингоҳи қурилди. Олти кишига даволаниш учун йўлланма берилди, 14 нафар ногиронлиги бўлган шахсга хусусий шифохоналарда соғлиғини тиклаши учун ёрдамлашилди. Ҳомийлар кўмагида 200 та махсус аравачалар эҳтиёжмандларга тарқатилди. Бундан ташқари, ички йўллар таъмирланмоқда, ичимлик суви билан боғлиқ муаммолар ҳам тизимли равишда ҳал этиляпти.

Ўйлайманки, ҳар бир инсон яшаётган жойидан, ишидан мамнун бўлиши, фахрланиши керак. Шундагина у олдинга юра олади, ўзгаларга ҳам шу туйғуларни тортиқ этади.



DB query error.
Please try later.