12.02.2019

ҚЎЛИ ЭГРИНИНГ ЙЎЛИ ЭГРИ

Дарахтлар шохларида, хонадонимиз айвонида, баланд симёғочларда ин қуриб, шу инни ўзига макон деб билган қушларни кўз олдингизга келтиринг. Ин қуриш учун хасни битталаб, лойни тумшуғида олиб келади, полапонлар очади. Оғзидаги овқатни ўзи емайди, болаларига беради. Таъбир жоиз бўлса, оиласини кўз қорачиғидай асрайди. Унинг таъминоти учун тинмай бир ҳудуддан иккинчи ҳудудга учиб юради. Полапонларини тажовузлардан ҳимоя қилади. Бепоён ўрмондаги йиртқич ҳайвонлар, денгизлардаги балиқлар ёки хонадонингиздаги паррандаларни эсланг... Бу ҳолатларни барчамиз кўрганмиз, кузатганмиз.

Инсон зоти қадим-қадимдан оилани муқаддас билиб, уни асраб-авайлаб мустаҳкамлашга алоҳида эътибор қаратиб келади. Аждодларимиздан мерос бу эзгу фазилатлар асрлар оша яшаб, бугунги ва келажак авлодлар учун муқаддас қадриятга айланган. Одамзод учун энг қимматли анъаналар, яъни ҳалоллик, ростгўйлик, шарм-ҳаё, меҳр-оқибат каби инсоний фазилатлар энг аввало оилада шаклланади. Демакки, ўзбек оиласининг мустаҳкамлиги сири ва саодати унинг маънавий юксаклигидадир, десак хато бўлмайди.

Бироқ орамизда шундай тоифадаги одамлар ҳам борки, улар оила деган муқаддас даргоҳнинг қадрига етмайди, унга лоқайд қарайди. Масалан, пойтахтимизнинг Яшнобод туманида яшовчи Рустам Йўлдошевни (исм-фамилия ўзгартирилган) шундайлардан бири, десак бўлади. Муқаддам ўғрилик ва бошқа жинояти учун икки бор судланган Рустам Йўлдошев ўзига тегишли хулоса чиқармади. Икки фарзанди бўла туриб, хотини билан ажрашди. Устига-устак, спиртли ичимлик ичиб, собиқ турмуш ўртоғининг уйига телефон қилиб, ҳақоратлашни одат қилди. Бу тазйиқлардан икки фарзанд ҳам безиб қолди. Аммо Рустам Йўлдошев уларни заррача ўйламайди. Ўтган йил 19 май куни у собиқ турмуш ўртоғи билан низолашгач, ярим тунда «Янгиобод ихтисослаштирилган бозор» ҳудудига девордан ошиб киради. Гап шундаки, ушбу бозорда собиқ турмуш ўртоғи савдо-сотиқ билан шуғулланарди. Аламзада Рустам Йўлдошев унинг растасини ёқиб, воқеа жойидан яширинади. Олов эса кучайиб қўшни расталарга ҳам ўтади. Ёнғин натижасида фуқароларга жами бўлиб 150 миллион сўмдан зиёд миқдорда зарар етди.

Суд мажлисида судланувчи тариқасида сўроқ қилинган Рустам Йўлдошев айбига тўлиқ иқрорлик билдириб, жаҳл устида собиқ турмуш ўртоғининг буюмларини ёқиб юборганини билдирди. У яна судланди. Оиласидан воз кечиб, фарзандларини ўз ҳолига ташлаб қўйгани етмагандай, уларнинг ҳаловатини бузди. Уларга ризқ бериб турган савдо растасига ўт қўйди. Қўли эгрининг йўли эгри бўлади, дейишади. Бугунги кунда у жазони манзил колонияда ўтамоқда. Бу воқеа кимларгадир аччиқ сабоқ бўлиши керак, деб ўйлаймиз.

 

Равшан ШОДИЕВ,

«Ўзбекистон овози» мухбири.



DB query error.
Please try later.