29.01.2019

ДАВЛАТ ДАСТУРИ ИЖРОСИ ПАРЛАМЕНТ НАЗОРАТИДА БЎЛАДИ

Парламент қуйи палатасидаги Ўзбекистон Халқ демократик партияси фракциясининг навбатдаги йиғилиши бўлиб ўтди.

Унда 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Фаол инвестициялар ва ижтимоий ривожланиш йили»да амалга оширишга оид Давлат дастуридан келиб чиқиб, фракция олдида турган вазифалар атрофлича муҳокама этилди.

Таъкидланганидек, фракция аъзолари томонидан Давлат дастури лойиҳасини шакллантириш ва муҳокамага қўйилган дастур лойиҳасини янада мукаммаллигини таъминлаш мақсадида 50 дан ортиқ асослантирилган таклифлар берилди. Уларнинг ўнга яқини Давлат дастурига киритилди. Хусусан, ижтимоий соҳани ривожлантириш, аҳолининг ижтимоий ҳимоясини кучайтириш ва меҳнатга ҳақ тўлаш тизимини янада такомиллаштириш, ногиронлиги бўлган шахсларнинг манфаатлари ҳамда аҳоли бандлигини таъминлашга қаратилган таклифлар шулар жумласидандир.

Фракция аъзолари инвестицияларни жалб этиш, қулай инвестиция муҳитини яратиш, шунингдек, мамлакатимиз ҳудудларининг ижтимоий ривожланиш даражасини ошириш соҳасидаги тадбирларнинг самарали ва ўз вақтида ижро этилишини таъминлашда парламент ва жамоатчилик назоратини кучайтириш масаласини илгари сурди. Бунда ҳар бир депутат Дастур ижроси ва назорати учун масъулликни ҳис этиши, хусусан, ўз сайлов округларида бу борадаги вазифалар ижроси билан мунтазам ишлашлари лозимлиги қайд этилди.

Давлат дастури ижросини таъминлаш билан боғлиқ муаммоларни бартараф этиш, устувор вазифалар изчил амалга оширилишида парламент ролини янада кучайтириш фракция аъзоларидан ҳам янгича шижоат руҳида ишлашни талаб этади. Бунда электорат манфаатларига дахлдор ҳар бир масала юзасидан аниқ таклифлар, зарур ҳолларда тегишли қонун лойиҳаларини ишлаб чиқиш лозимлигига эътибор қаратилди. Жумладан, бугунги кунда фракция аъзолари томонидан тайёрланаётган қонун лойиҳаларини такомиллаштириб, қонунчилик палатасига киритишни тезлаштириш мақсадида фракцияда тузилган ишчи гуруҳларнинг вазифалари белгилаб берилди.

Амалга оширилаётган ишларни аҳолининг кенг қатлами орасида тарғиб қилиш ҳамда белгиланган устувор вазифаларнинг жойларда самарали ижро этилиши устидан парламент ва жамоатчилик назоратини ўрнатиш юзасидан тавсиялар берилди. Таъкидландики, тарғибот жараёнларига сиёсатшунос олимлар, ёзувчи ва шоирлар, тарғиботчилар гуруҳларини кенгроқ жалб қилиш муҳим аҳамиятга эга.

Йиғилиш якунида муҳокама этилган масалалар юзасидан фракциянинг қарори қабул қилинди.

 

Нурилло Насриев,

ЎзА.


Фикр ва мулохазалар

Защита от автоматических сообщений

Сўнгги янгиликлар: