Охирги сонда



Кўп ўқилган мақолалар



Долзарб мавзу



Мақолалар архиви

«    Iyun 2019   
Du Se Cho Pa Ju Sha Ya
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
15.01.2019

МУЛКДОР ШИРКАТДАН РОЗИМИ?

Бугунги кунда мамлакатимизда 33000 дан ортиқ кўп қаватли уй мавжуд бўлиб, уларни бошқариш бўйича 4500 тага яқин ширкатлар фаолият кўрсатиб келмоқда. Давлат томонидан хусусий уй-жой мулкдорлар ширкатига имтиёзли кредитлар берилаяпти. Ҳар бир шаҳар ва туманда фаолият олиб бораётган тўртта сектор ва маҳалла фуқаролар йиғини ҳам ширкатларга ёрдам кўрсатиб келмоқда.

Улар томонидан маҳаллаларда ободонлаштириш, кўп қаватли уйларни таъмирлаш, томлардан чакка ўтиши, қувурлар носозлигини бартараф этиш ишлари олиб борилмоқда. Хўш, унда хусусий уй-жой мулкдорлар ширкати нима иш билан шуғулланади? Бу савол кўпчиликни қизиқтириб, аниқроғи, қийнаб келмоқда.

Бизнинг фикримизча, хусусий уй-жой мулкдорлар ширкатининг кунлик қиладиган ишида йўл харитасини белгилаб берилиши мақсадга мувофиқ. Йўл харитасини тузиш ва амалга ошириш учун биринчи навбатда ширкат раҳбарида иқтисодий билим, ташкилотчилик бўлиши лозим.

Ҳозирги пайтда кўп жойларда хусусий уй-жой мулкдорлари ширкатлари талабга жавоб бермаяпти. Турар-жой ва нотурар-жой мулкдорлари билан шартнома тузилган бўлса-да, уй-жой ҳамда унинг атрофидаги ҳудудларни сақлаш ва фойдаланиш бўйича тизимли ишлар олиб борилмаяпти.

Шунинг учун кўп хонадонли уй-жой фондини мавсумий фойдаланишга ўз вақтида ва сифатли тайёрлаш, уларни мукаммал ва жорий таъмирлаш ҳамда теварак-атрофдаги ҳудудни ободонлаштириш йўл харитасига асосий маълумот сифатида киритилиши лозим бўлади.

Табиийки, аҳоли ширкатга тўланаётган пулларнинг қаерга сарфланаётгани тўғрисида аниқ маълумотлар берилишини хоҳлайди. Чунки айрим уйларга йиллар давомида бирорта ҳам хизмат кўрсатилмайди. Демак, ширкат раҳбарлари аҳолидан йиғилаётган маблағ қаерга, нима учун, қанча сарфлангани тўғрисида ҳисоб бериб бориши керак.

Умуман олганда, мулкдорлар тушунчаси бўйича ширкат юқорида келтирилган ишларни ўз вақтида, сифатли амалга ошириши лозим. Хусусий уй-жой мулкдорлари ширкатида қилинаётган ишларнинг шаффофлигини таъминлаш мақсадида кўп қаватли уйларга сайланган уй бошлиғи ваколати ва масъулиятини ошириш масаласини аниқлаштиришни ўйлаб кўриши керак.

Яъни, уй бошлиғи зиммасига кўп қаватли уйларда тозаликка риоя қилиш, барча таъмирлаш ишларини, янги келган уй эгалари ва аъзоларининг назоратини амалга ошириш юкланади. У коммунал тўловларини амалга ошириши бўйича аҳолининг фикрини ўрганади, тўй-маъракаларда иштирок этади, кам таъминланган оилалардан, кекса ёшли қариялардан ва ногиронлардан хабар олиб боради. Шу билан бирга кўп қаватли уйда яшовчи уюшмаган ёшларнинг меҳнат фаолиятига эътибор беради.

Уй бошлиғи вазифасига ҳар бир кўп қаватли уйлардан танлов асосида ўз ишига масъулият ва виждонан ёндашадиган инсон танланса, ўз-ўзини назорат қилиш функцияси ишга тушади ва кўпгина муаммолар ҳал бўлади, деб ўйлаймиз.

 

Шаҳриддин ҒАНИЕВ,

Тошкент молия институти доценти.

 

Таҳририятдан: Газетхон томонидан келтирилган мулоҳаза кўп қаватли уйларда яшовчи аксарият аҳолининг дилидаги гап бўлиб, эскича усулда ишлаётган ширкатлар фаолияти кўпчиликни қониқтирмаётгани бор гап. Уй-жой ширкатлари томонидан йиғилаётган маблағларнинг тизимли ишлатилишида шаффофлик етишмаслиги ва хизмат кўрсатиш сифати пастлиги норозиликларни келтириб чиқармоқда.

Демак, тизимга уй-жой мулкдорлари талаб ва таклифини ўрганган ҳолда ёндашиш, маблағлар сарф-харажатида шаффофликни таъминлаш, энг муҳими, хизмат кўрсатиш сифатини яхшилашни даврнинг ўзи тақозо этмоқда. Бу борада газетхонларимизнинг фикр-мулоҳазалари биз учун қимматли.


Фикр ва мулохазалар

Защита от автоматических сообщений

Сўнгги янгиликлар: